Mbete Luk 7
7
1Kandɔkaw Zezu ɓah ɓay ye ɔh hi̧ nzukri ké ƴo dih fal ye, mí ke tɔr si Kapernayum. 2Kumandah a hani mbew kaɓ puh-aw, sa̧w ye ɓa gun Izarayel ya. Ke ɓa mbay tul sozeri ké sɔɗ. Mgbal ye na nun hul. Mgbal ra law kumandah na sa tul ye. 3Ɓay Zezu toh suk kumandah dale, ke pih ŋgernzuk puh woyri ziɓri ɓá si goŋ Zezu, ké gi ko mgbal ye ɓay gah ni.
4-5Ku ka̧h ta̧w Zezu, mí ku vbi ni ke kɔkrɔya ɓahri se : « Ŋgernzuku-aw yih ɓay sa̧w wah gun Izarayelri mbamba. Ke mboh vul misoŋ hi̧ na. Kaŋ dale ke mah ɓay mú lah goŋna ye. »
6Mí Zezu si ziŋ niri. Ke ɗih ya tɔɓ ke kerpuh kumandah ra bale, kumandah pih ya̧h yeri si ɓah hi̧ Zezu kandɔkay : « Ŋgernzuk, í yɔklɔ mun woiri ya. Mi mah ɓay í rih ɓil kerpuh bi-ay ya. 7Sa̧wu mí-i si ta̧w woiri ke mun bi ya. Í ɓah ɓay dale, mun mgbal bi ra ɓay gah-u. 8A bi kara mi ƴo lah nzak ŋgernzuk biri pi. Mi ɓa mbay tul sozeri pi. Gelke mi ɗi soze ɓahri, ké gi le, ke gi gaŋ ba. Mi ɓah hi̧ soze a ɓoru ɓahri, ké tɔr le, ke tɔr gaŋ ba. Mi ɓah hi̧ mgbal bi ɓahri, ké laɓ fe-ay le, ke laɓ fe-u laɓ gaŋ ba. »
9Zezu ɓá lah nzak pihna kumandah bale, fe-u na ni yer. Ke el sɔɓ nun ye ma ta̧w daɓa nzukri ké ƴo dih fal ye, mí ke ɓahri se : « Ɓay ké kumandah ɓah-ay ɓa ketina. Mi ƴo ɓah hi̧ wuri. Gun Izarayel mbew ké kan law ye sa tul bi mah ke nzukay ké sa̧w ye na ɓoɗay, mi ko ya. »
10Gun nzak pihna kumandahri el rih kerpuh, mí ziŋ mgbal ra ke mun gahna ɓa suki.
11Bol falu Zezu tɔr si puh a ɓoru ké riŋu ɓa Nayin. Nzuk-dih fal yeri ke daɓa nzuk a ɓoruri ɓa ŋgi̧-u ƴo si ziŋ ni. 12Ku ɗih ya ɓay ka̧h nzakful mahol ké ɗoŋ Nayin bale, nzukri suk hul ke dakan. Daɓa nzukri ɓaŋ niri ƴo ti̧h ke ɓil puh-aw ma gel-gɔr hul. Hulu ɓa gun seke wu̧y kaŋpele, gun ye ké mbew yaŋ. Nzukri ro mah fe ké mgba wu̧y seh si keni. 13Ŋgermbay ko wu̧yaw, mí law ye sa̧h. Ke el ɓah hi̧ ni ɓahri : « Mú vuh rew ya. »
14Ke loh si ke za dakan, mí nzuk-suk hulri el ƴo. Zezu ɓah hi̧ hul ra ɓahri : « Seke, mi ƴo ɓah hi̧ mu, mú el gi, mú ur síɓa. »
15Seke ra el gi, ke kaɓ síɓa, mí ke el ɓah ɓay. Zezu mgba ni ndoh ndɔk mah ye. 16Bale hȩkme se nzukri riw. Ku ƴo dim Ŋgerzah ɓahri se : « Gun nzak pihna Ŋgerzah a luki mí ti̧h sakra wah-ay ɓay fe le, Ŋgerzah ɗer gi ko sa̧w nzuk yeri. »
17Mberem fe laɓna Zezu seh ɔh puh a lukiri ke puh a ɓil suyri riw ké tusiɓa Zude. 18Nzuk-dih fal Za̧hri ndazi ɓayu hi̧ Za̧h, mí ke ɗi nzuk-dih fal yeri seɗe. 19Ke pih niri si ta̧w Gaŋ tul feri riw ke nzak pihna-ay : « A wo mú-u ɓa Ŋgermbay ké Ŋgerzah wahɓay pih ni hi̧ na ziɓri ra, ké ɓay gi lák mbay tusiɓa gbam mini nah geŋ nzuk a ɓoru le#7.19 Ziɓri geŋ Ŋgermbay lewsa̧. Í ki̧ gun gel ki̧na ké na diŋ Mbete Matiye 11.3. ? »
20Ku ka̧h ta̧w Zezu, mí ku ɓahri se : « Za̧h batisi pih na náh ɓah, a wo mú-u ɓa Ŋgermbay ké Ŋgerzah wahɓay pih ni hi̧ na ziɓri ra mini nah geŋ nzuk a ɓoru le ? »
21Ke sa̧wseh-u-aw Zezu ƴo gah nzukri ɓa ŋgi̧-u. Ke gah nzuk senari ke nzukri ké sena woyri ŋger mbamba pi. Ke ni̧h záhri ké tul nzukri. Ke hi̧ daɓa ra̧wri ko gel. 22Mí ke yih nzak nzuk-dih fal Za̧hri-aw ɓahri : « Í si ɓah hi̧ Za̧h ɓá lah ɓay feri-ay ké i ko ke nun woiri, ké i lah ke suk woiri ɓahri se, ra̧wri ko gel, kpereri si sina, mun nzuk ndɔɓeri teh mí saŋna-si gel kani Ŋgerzah lu ké tul woyri, mbikiri lah ɓay, hulri el kaɓ ke nun, ko̧hkori lah ɓaysuki ma law woyri. 23Pol tehna teh tul nzuk ké riŋ bi ti̧h ɓa ndaw lihna ye ya. »
24Nzuk-dih fal Za̧hri tɔr ba, mí Zezu el ɓah ɓay tul Za̧h hi̧ daɓa nzukri ɓahri : « Sina woiri ɓil lawkɔraw, i si ɓay ko fe le ? I si ɓay ko sihri ké kuna laŋ mgba̧ya mgba̧ya lo ? 25Uwa. I si ɓay ko fe le ? I si ɓay ko nzuk ké ndoh gar lari a ndu̧yu mgbelek mgbelek le wo ? Nzukri ké ndoh gar riŋ ɗina a ndu̧yu le kaɓ kerpuh mbayri. 26Uwa. I si ɓay ko fe le ? I si ɓay ko gun nzak pihna Ŋgerzah le wo ? I si ɓay ko gun nzak pihna Ŋgerzah gaŋ. Mí-i ƴo ɓah hi̧ wuri ɓahri se, Za̧h ra ke mba tul gun nzak pihna Ŋgerzah a ɓoruri mba-mba. 27Za̧h ra Ŋgerzah vbeh ɓay tul ye lewsa̧ hi̧ zih woiri ɓahri : í ko, mi pih gun nzak pihna bi ƴo pol woiri#7.27 Ɓayay na ɓil Mbete Exode 23.20. Ɓayu vbeh kandɔkay : Í ko, mi pih gun nzak pihna bi ƴo pol wo. Ké gel ki̧na-aw Ŋgerzah ƴo ɓah ɓay hi̧ gun Izarayelri. Ke ɗi niri « wo » kandɔk ke ƴo ɗi nzuk mbew. Sa̧wu mí nzuk-sɔɓ mbete vbeh ɓahri, woiri ɓay hi̧ lahna-u ɓá se ya. ɓay lek ful geŋ ni#7.27 Ɓayay na ɓil Mbete Malachie 3.1. Malachie vbeh ɓayu kandɔkay : a ye ke ɓay lek ful geŋ mi. Luk vbeh ɓahri : a ye ke ɓay lek ful geŋ mu. Ɓil Mbete Malachie ra Ŋgerzah ƴo ɓah ɓay tul ye. Ɓil Mbete Lukay ke ƴo ɓah ɓay Ŋgermbay. Ŋgerzah ti̧h ɓa nzuk pirmatul mí ɓa Zezu a ye Ŋgermbay. Sa̧wu mí nzuk-sɔɓ mbete vbeh ɓahri, ni ɓay hi̧ lahna-u ɓá se ya.. »
28Zezu el ɓahri se : « Mi ƴo sɔk wuri ɓahri, ké sakra nzuk pirmatulri kú-u mbuŋ niri ké tusiɓa gbam, nzuk mbew ké mba tul Za̧h ta-a. Mí gun a mah gelu ké ɓa gun puh lakna Ŋgerzah mí mba ni. 29Nzuk-mbu̧h lampoh ke nzuk a garuri riw kú-u lah ɓay Za̧h mí ku hi̧ ni soh niri mbih batem ra fe laɓna woyri teh ɓay Ŋgerzah. 30Fariziri ke nzuk goso fe tuna mbete bolkusol Ŋgerzahri ba, poŋ kerɓay Ŋgerzah ké-e lek ɓay tul woyri ma fal, ku sa hi̧ Za̧h ɓá soh niri mbih batem ya. 31A a̧w ba, sam nzuk a suŋri mí-i mgba tuh ke gun tukala-ayri le ? Ku na ani le ? 32Ku eŋ gunri ké kaɓ ndiseŋe ƴo yi̧-yi̧hna. Ku ɗi haniri ɓahri : “Nah ul ti̧w, mí i sa nda nday ya. Nah ɗi siŋ rew, mí i sa vuh rew ya.” 33Kaŋaw mí Za̧h batisi gi, ke lak huru ya, ke nzo yim ya, mí i ɓahri, eh ɗuk ni. 34Gun nzuk pirmatul ba, gi. Ke su̧ fe, ke nzo fe le, i ɓahri, bahu̧hmi mí na-aw, ke ɓa nzuk-ta yim. Ke mgba ya̧h ziŋ nzuk-mbu̧h lampohri ke nzuk suya a ɓoruri pi. 35Kandɔkaw mí gun sa̧w ru̧nari teh ɓay ketina sa̧w ru̧na Ŋgerzah. »
36Mí farizi mbew, riŋ ye ɓa Simu. Ke ɗi Zezu, ké si su̧ fe ziŋ ni. Zezu si rih kerpuh ye, mí ku kaɓ nzak fe su̧na. 37Wu̧y-laɓ suya a hani ƴo puh-aw. Ke ɓa wu̧y nunpuki. Ke lah ɓahri, Zezu ƴo su̧ fe ké kerpuh farizi ra dale, ke mbi kuh num ba̧ri a suki ké lari-u ŋger mbamba#7.37 Num ba̧ri a suki suy lari-u mah hani ke lari pihna mbihmbam mbew.. 38Ke gi ka̧h ɓel bɔk Zezu. Ke ƴo vuh rew ke mbihnun ye mgbɔk mgbɔk hi̧ mbihnun ye zuh ku̧ bɔk Zezu, mí ke tak ke pirmatul ye le, ke el tak ɓáy. Ke mgba bɔk Zezu ma haŋ ye, mí ke el nu̧h ri num ba̧ri ra.
39Farizi ké ɗi Zezu su̧ fe ziŋ ni ra ko fe laɓna wu̧yaw, mí ke ɓah ké law ye ɓahri, nzukay ɓa ra gun nzak pihna Ŋgerzah ketina le, ke tú wu̧y ké ƴo za ni-aw ra ɓa wu̧y a suya-u. 40Zezu tu kerɓay farizi ra, ke el ke ɓayu ɓahri : « Simu, mi ƴo ke mberem a hani-u ɓay lu ziŋ mu. »
Simu ɓahri : « Ŋgernzuk, mú ɓah ge. »
41Zezu ɓahri : « Nzukri seɗe ta lari. Mbɔl ké tul nzuk a mbewu mah ke lari pihna mbihmbam seɗe#7.41 Sa̧w nzak ɓahri, denari sɔɗ ndiɓi, mí nah ten ŋgerna lari-u ɓay hi̧ karaŋri ɓá lah ɓa gah-u. Ɓay denari na ɓil Mbete Tɔh riŋri.. Mbɔl ké tul nzuk a ɓoru ba, mah ke lari pihna few seɗe#7.41 Sa̧w nzak ɓahri, denari bon ndiɓi, mí nah ten ŋgerna lari-u ɓay hi̧ karaŋri ɓá lah ɓa gah-u.. 42Seɗe mbɔk woyri ku ziŋ ŋgerna púh mbɔlu ya. Wara mí nzuk ké hi̧ niri lari ra lu mbɔlu ké tul woyri. Kaŋaw ba, ké sakra nzukri ké seɗe-aw wa, a ge mí ɓay sa nzuk ké lu mbɔl ra mbamba le ? »
43Simu yih nzak ye ɓahri : « Mi ko ɓa nzuk ké mbɔl a ŋgi̧-u lu ké tul ye mí ɓay sa ni mbamba. »
Mí Zezu ɓahri : « Simu, kerɓay wo ƴo gelu. »
44Ke sɔɓ nun ma tul wu̧y ra, mí ke ɓah hi̧ Simu ɓáy ɓahri : « Mu ko wu̧yay ko le ? Mi rih kerpuh wo, mí mu hi̧ mi mbih ɓay wɔk bɔk bi ya#7.44 Lewsa̧ ziɓri wɔk bɔk gahru mgba ni keni. Na kandɔk mbih sona ké ta̧w karaŋri. . A ye ba, ke wɔk bɔk bi ke mbihnun ye, ke el tak ke pirmatul ye. 45Mu ul suk bi ya. Wu̧yay ba, ke gina bi, ke mgba bɔk bi ma haŋ ye giri giri. 46Mu suh num ku̧ tul bi ya. A ye ba, ke fer num lari ké ba̧ri-u fu̧ ɓa suki ku̧ bɔk bi. 47Sa̧wu mí-i ƴo ɓah hi̧ mu ɓahri, salɓay a suyari ké ŋgi̧ mbamba ra lu ké tul ye lu-lu ɓay fe le, ke sa nzuk ké lu ɓayu ŋgi̧ mbamba. Mí nzuk a a̧y ké salɓay ye a ndi̧-u lu ké tul ye le, ke sa nzuk ké lu ɓayu ndi̧ kaŋto. »
48Bale ke el ɓah hi̧ wu̧yu ɓahri : « Salɓay a suyari lu ké tul wo lu-lu. »
49Gahru a ɓoruri ké kaɓ nzak fe su̧na ziŋ ni su̧h ɓay ziŋ haniri ɓahri se : « Nzukay wa ɓa ge mí lu salɓay suya ké tul nzuk le ? »
50Zezu el ɓah hi̧ wu̧y ra ɓahri : « Mú si ke ɗeŋ. Law wo ké te sa tul bi ten mu ke ndɔk hul te-ten. »
Currently Selected:
Mbete Luk 7: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.