Mbete Luk 6
6
1Nam ɔkna bale, Zezu sak sina ɓil waka fe pay ke nzuk-dih fal yeri, mí nzuk-dih fal yeri ƴo haw tul fe pay o̧kro su̧#6.1 Ɓay tu ɓay o̧kro tul fe pay ké waka nzuku a ɓoru le, í ki̧ Mbete Deutéronome 23.25-26. . 2Farizi a haniri ba, ɓah ɓay ɓahri : « Bolkusol Ŋgerzah hah láɓ pihna ke nam ɔkna wa, ani mí i ƴo laɓu le ? »
3Mí Zezu yih nzak woyri ɓahri : « I ki̧ ɓay fe laɓna Daviɗ a lewsa̧ ki̧, kaŋ ya le#6.3 Fe ké Daviɗ laɓ na ɓil Mbete 1 Samuel 21.1-6. ? Ɗaka i ni ke bɔh sina yeri. 4Ke si vul Ŋgerzah. Peŋ ké nzuk fe puhnari puh hi̧ Ŋgerzah, mí a ye ke su̧, ke el wal hi̧ bɔh sina yeri su̧ pi-aw ba, mí bolkusol Ŋgerzah hah nzuk a garuri sú̧-u. Nzuk fe puhnari kaŋto mí ƴo ke ful ɓay su̧-u, kaŋ ya le ? »
5Zezu ƴo ɓahri se, mbay ké ko tul nam ɔkna mí ɓa gun nzuk pirmatul.
6Nam ɔkna a ɓoru bale, Zezu si vul misoŋ. Ke ƴo firma niri ɓay lák mbay Ŋgerzah. Nzuk mbew ké ndɔk ye a fál lakna hu yɔh kaɓ ri. 7Nzuk-sɔk mbete bolkusol Ŋgerzahri ke fariziri ƴo ri pi. Mí ku ko kona yi̧m ma tul Zezu ɓay ko-u. Ke gáh nzuk ke nam ɔkna dale, ku láɓ ɓay kan tul ye. 8Zezu ba, tu kerɓay woyri tu, mí ke ɓah hi̧ nzuk ké ndɔk ye hu yɔh ra ɓahri : « Ur síɓa. Mú ƴo. »
Nzuku ur síɓa ƴo. 9Bale Zezu el ɓah hi̧ ŋgernzuk woyri-aw ɓahri : « Mi ƴo vbi wuri ɓayay : Bolkusol Ŋgerzah hi̧ nzukri ful ɓay laɓ suki mini ɓay laɓ suya ke nam ɔkna le ? Ɓay ya̧ nzuk mini ɓay i nzuk le ? »
10Zezu ko gel ma tul nzukri ɗoŋ gbuk, mí ke ɓah hi̧ nzuk ké ndɔk ye hu yɔh ra ɓahri : « Mú ndar ndɔk wo. »
Nzuk ra ndar ndɔk bale, ndɔk ye el kpuh kpaŋ ƴo gelu. 11Kaŋ mí law ŋgernzukri-aw fa̧h tuh tuh. Ku el lek ɓay ke haniri ƴah ful ɓay laɓ Zezu.
12Ɓil namri-aw bale Zezu tɔr si tul kpar si ɓah ɓay ziŋ Ŋgerzah. Ke ƴo ɓah ɓay ziŋ ni ke suŋ kpu̧ru ka̧h tipele. 13Tipele teh ni, mí ke el ɗi nzuk-dih fal yeri gi, ke lu gun nzak pihnari ɓa boh falu seɗe ké sakra-aw. 14Riŋ gun nzak pihna-uri mí na-ay : Simu ké Zezu tu riŋ ye ɓa Piyer, yi̧n ye Andere, Zak, Za̧h, Filiɓ, Bartelemi, 15Matiye, Toma, Zak gun Alfe, Simu kú-u ɗi ni ɓa nzuk-ri̧h si̧w ɓay tul sa̧wnzuk woyri ziɓri, 16Zudas ké ɓa gun Zak, Zudas Isikariyoɗ a ye ké-e ti̧h ɓa nzuk-te Zezu ra pi.
17Mí Zezu ɗer ke tul kpar ziŋ niri ta̧h ƴo bɔk kparu. Daɓa nzuk-dih fal yeri ɓa ŋgi̧-u ƴo ri. Daɓa gun Izarayel a ɓoruri ɓa ŋgi̧-u, a ur ke tusiɓa Zude, a ur Zurusalem mbu̧h ri pi, nzukri a ur ke ɓel mahmbih Medeterani ké fál puh a lukiri Tir ke Sidoŋ kara pi. 18Ku gi ta̧w ye ɓay lah ɓay ye, ɓay ké gah sena woyri pi, mí nzukri ké záh tukalari ƴo tul woyri ziŋ mun gahna. 19Gbam woyri ku yih ɓay za ni ɓay fe le, ŋgerna ké ƴo ti̧h ke mun ye mí gah nzukri.
20A ye ba, ke ko kona ma tul nzuk-dih fal yeri ra, mí ke ɓah hi̧ niri ɓahri :
« A woiri ko̧hkori i ɓa gun pol tehnari ɓay fe le, lák mbay Ŋgerzah na ɓay woiri.
21A woiri ké ɗaka i wuri guri, i ɓa gun pol tehnari ɓay fe le, i ɓay su̧ fe mah gel ɗaka woiri.
A woiri ké rew ƴo mbaŋ law woiri guri, i ɓa gun pol tehnari ɓay fe le, i ɓay sak sakna.
22Pol tehna Ŋgerzah teh tul woiri gelke nzukri fu̧y wuri, gelku-u ni̧h wuri, ku ɓal riŋ woiri, ku sɔɓ riŋ woiri ti̧h ɓa riŋ a pipiri-u ɓayu ké i ƴo wuri ke gun nzuk pirmatulay. 23Namu-aw, í laɓ wuri law rihna, í zo zakra zakra. Í ko, kpaŋndɔk woiri a ŋgeru ƴo nunmbam. Suya kú-u laɓ wuri-aw mah hani bin ke suya ké zih woyri laɓ gun nzak pihna Ŋgerzah a lewsa̧ri.
24Kúy, koseh a luki ɓa nzuku a woiri nzuk va̧nari ɓay fe le, i ƴo kaɓ ɓil bela woiri.
25Koseh a luki ɓa nzuku a woiri nzukri ké i su̧ tukala guri ɓay fe le, i ɓay kaɓ ɓil ɗaka.
Koseh a luki ɓa nzuku a woiri nzukri ké i sak sakna guri ɓay fe le, rew ɓay kal law woiri, i ɓay vba̧ haŋ zaɗ zaɗ.
26Koseh ɓa nzuku a woiri gelke nzukri gbam pir riŋ woiri. Zih woyri pir riŋ gun nzak pihna Ŋgerzah a fohri lewsa̧ kaŋ pi.
27A woiri nzukri ké i ƴo ke suk ké lah ɓay bi, mi ƴo ɓah ɓayay hi̧ wuri : í sa nzukbaa woiri. Í laɓ suki hi̧ nzukri ké fu̧y wuri. 28Í lu mgbɔkɔ ku̧ tul nzukri ké mgba nazi ku̧ tul woiri. Í goŋ Ŋgerzah ɓá laɓ suki hi̧ nzukri ké mgba wuri ɓu law woyri. 29Nzuk vba̧ gam wo le, mú sɔɓ fál a ɓoru hi̧ ni, ké vba̧ pi. Nzuk nah mah gar wo le, mú gboh ni nah gar a ɓilu ya pi. 30Nzuk a suŋ suŋ goŋ mu fe le, mú hi̧ ni. Ke nah fe wo le, mú sor nzuku ya. 31Kandɔkaw mí lawsuki ké i yih ɓay hi̧ nzuk a ɓoruri ɓá laɓ ziŋ wuri ra, í laɓ lawsuki-u ziŋ niri.
32I sa nzukri ké sa wuri kaŋto ra wa, tumbɔl fe í-i ziŋu le ? Nzuk-laɓ suyari sa nzuk suya mbaŋ woyri. 33Gelke i laɓ suki hi̧ nzuk ké laɓ wuri suki ra wa, tumbɔl fe mí-i ziŋu le ? Nzuk-laɓ suyari mí ƴo laɓ kaŋ. 34Gelke i ta lari ziŋ nzukri ké mah el ke lari ra wa, tumbɔl fe mí-i ziŋu le ? Nzuk-laɓ suyari mí ƴo ta lari ziŋ nzuk suya mbaŋ woyri ɓay kú el ke lari-u kaŋto.
35Kaŋ dale í sa nzukbaa woiri, í laɓ niri suki. Nzuk ta wuri lari le, í lu kerɓay ya̧ mbɔlu. Kpaŋndɔk a ŋgeru ƴo geŋ wuri. I ɓay na ɓa gun Ŋgerzah ké deɓ ye ta-a ɓay fe le, a ye ke ƴo laɓ suki hi̧ nzukri ké tu suki ya pi, nzuk law a pipiri-uri pi. 36Í laɓ law in ziŋ nzukri kandɔk Bah woiri Ŋgerzah ké ɓa nzuk-laɓ law in ziŋ nzukri. 37Í kehr nzukri ɓa nzuk a sukiri, ɓa nzuk a suya-uri ya rɔkɔ kehrna-u ké i kehr nzukri ɓá el mbu̧h wuri ɓa nzuk a suya-uri. Í laɓ ɓay kan tul nzuk ya, le salɓay suya ta mgba tul woiri ya. Í sel nzuk ké laɓ wuri suya, le salɓay suya ɓay lu ké tul woiri pi. 38Kandɔkaw, suki ké i laɓ hi̧ nzukri, suki-u ɓay el ziŋ wuri pi. Sam ŋgoro fe ké i mbi leh keni fe hi̧ nzukri ra, ŋgoro-u ɓay el tikri fe laɓna-u yik yik mí mbah zɔk gbɔh gbɔh ku̧ tul woiri pi. »
39Zezu el ɓah lawɓay hi̧ nzuk-lah ɓay yeri ɓahri : « Ra̧w mgba ka̧w ra̧w mbaŋ ye ani le ? Seɗe mbɔk woyri ku líh ɓil lɔkɔ kavbaw ya le wo ? 40Gun likɔl mba tul metere ye ya. Gunu tu pihna ye tu-tu dale, ke ɓay mah ke metere ye ɓáy. 41Le ɓay fe mú-u ko suy ké na nun mbaŋ wo mí baw kpuh ké tik sa̧w nun wo mú-u ko ya lo ? 42Ani mú-u ɓahri : “Ya̧h, mú hi̧ mi mí lu suy ké ɓu nun wo ?” Mí baw kpuh ké tik sa̧w nun wo, mu ko ya le ? Nzuk-mu̧h ketina, mú ten kpuh ké tik sa̧w nun wo dara mú-u kó gel ɓa teh-u ɓay el lu suy ké nun mbaŋ wo ɓáy. 43Ɓayu ké kpuh a suki leh lehna a suya-u ya, kpuh a suya-u kara leh lehna a suki ya pi. 44Kandɔkaw mí i tu kpuh a suŋ suŋ ɓay lehna ye lehna ye. Nzuk ta hal nzu̧y ké tul kpuh ŋgatukru ya, nzuk hal lehna vo̧ko ké tul ŋgatukru gun gay ya. 45Nzuk lawsuki ƴo hi̧ suki ké-e mbek ku̧ ɓil law ye ƴo ti̧h kala. Nzuk law a pipiri-u ba, ƴo hi̧ fe a pipiri-u ké-e mbek ku̧ ɓil law ye ƴo ti̧h kala. Fe mbekna ké nzuku mbek ku̧ ɓil law ye ƴo ur dukuku mí ti̧h ke nzak ye.
46Uwa. Ɓay fe í-i ɗi mi “ŋgernzuk, ŋgernzuk” ba, mí láh ɓay bi ta-a le wo ? 47Nzuk a suŋ suŋ gbam ké gi ta̧w bi mí ke ƴo tul ɓay biri ké-e lah le, nzuku na ani munu le ? Mi ƴo sɔk wuri. 48Nzuk ra ɓa nzuk ké mboh diŋ vul ye ké gel ké kasaw na diŋu. Ke ɗeh kpu̧ru si ka̧h fihri-u dara mí ke mboh diŋ vul ye kan ri ɓáy. Mbih uh mí vba̧ vulu paw paw mí ziŋ ŋgerna haw vulu ya ɓayu ké nzuku mboh vulu ké gel ké kasaw na diŋu. 49Nzukay ké lah ɓay ké mi ɓah mí ke poŋ ma fal bale, ke ɓa nzuk ké mboh vul ye tul siɓa gel garu dan kerɓay tul diŋu. Mbih uh vba̧ vul ra paw paw mí haw vulu wuruk vba̧ siɓa. Ɓeɓna vul ra ti̧h ɓa baw ɓeɓna. »
Currently Selected:
Mbete Luk 6: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.