Mbete Luk 6:27-49

A woiri nzukri ké i ƴo ke suk ké lah ɓay bi, mi ƴo ɓah ɓayay hi̧ wuri : í sa nzukbaa woiri. Í laɓ suki hi̧ nzukri ké fu̧y wuri. Í lu mgbɔkɔ ku̧ tul nzukri ké mgba nazi ku̧ tul woiri. Í goŋ Ŋgerzah ɓá laɓ suki hi̧ nzukri ké mgba wuri ɓu law woyri. Nzuk vba̧ gam wo le, mú sɔɓ fál a ɓoru hi̧ ni, ké vba̧ pi. Nzuk nah mah gar wo le, mú gboh ni nah gar a ɓilu ya pi. Nzuk a suŋ suŋ goŋ mu fe le, mú hi̧ ni. Ke nah fe wo le, mú sor nzuku ya. Kandɔkaw mí lawsuki ké i yih ɓay hi̧ nzuk a ɓoruri ɓá laɓ ziŋ wuri ra, í laɓ lawsuki-u ziŋ niri. I sa nzukri ké sa wuri kaŋto ra wa, tumbɔl fe í-i ziŋu le ? Nzuk-laɓ suyari sa nzuk suya mbaŋ woyri. Gelke i laɓ suki hi̧ nzuk ké laɓ wuri suki ra wa, tumbɔl fe mí-i ziŋu le ? Nzuk-laɓ suyari mí ƴo laɓ kaŋ. Gelke i ta lari ziŋ nzukri ké mah el ke lari ra wa, tumbɔl fe mí-i ziŋu le ? Nzuk-laɓ suyari mí ƴo ta lari ziŋ nzuk suya mbaŋ woyri ɓay kú el ke lari-u kaŋto. Kaŋ dale í sa nzukbaa woiri, í laɓ niri suki. Nzuk ta wuri lari le, í lu kerɓay ya̧ mbɔlu. Kpaŋndɔk a ŋgeru ƴo geŋ wuri. I ɓay na ɓa gun Ŋgerzah ké deɓ ye ta-a ɓay fe le, a ye ke ƴo laɓ suki hi̧ nzukri ké tu suki ya pi, nzuk law a pipiri-uri pi. Í laɓ law in ziŋ nzukri kandɔk Bah woiri Ŋgerzah ké ɓa nzuk-laɓ law in ziŋ nzukri. Í kehr nzukri ɓa nzuk a sukiri, ɓa nzuk a suya-uri ya rɔkɔ kehrna-u ké i kehr nzukri ɓá el mbu̧h wuri ɓa nzuk a suya-uri. Í laɓ ɓay kan tul nzuk ya, le salɓay suya ta mgba tul woiri ya. Í sel nzuk ké laɓ wuri suya, le salɓay suya ɓay lu ké tul woiri pi. Kandɔkaw, suki ké i laɓ hi̧ nzukri, suki-u ɓay el ziŋ wuri pi. Sam ŋgoro fe ké i mbi leh keni fe hi̧ nzukri ra, ŋgoro-u ɓay el tikri fe laɓna-u yik yik mí mbah zɔk gbɔh gbɔh ku̧ tul woiri pi. » Zezu el ɓah lawɓay hi̧ nzuk-lah ɓay yeri ɓahri : « Ra̧w mgba ka̧w ra̧w mbaŋ ye ani le ? Seɗe mbɔk woyri ku líh ɓil lɔkɔ kavbaw ya le wo ? Gun likɔl mba tul metere ye ya. Gunu tu pihna ye tu-tu dale, ke ɓay mah ke metere ye ɓáy. Le ɓay fe mú-u ko suy ké na nun mbaŋ wo mí baw kpuh ké tik sa̧w nun wo mú-u ko ya lo ? Ani mú-u ɓahri : “Ya̧h, mú hi̧ mi mí lu suy ké ɓu nun wo ?” Mí baw kpuh ké tik sa̧w nun wo, mu ko ya le ? Nzuk-mu̧h ketina, mú ten kpuh ké tik sa̧w nun wo dara mú-u kó gel ɓa teh-u ɓay el lu suy ké nun mbaŋ wo ɓáy. Ɓayu ké kpuh a suki leh lehna a suya-u ya, kpuh a suya-u kara leh lehna a suki ya pi. Kandɔkaw mí i tu kpuh a suŋ suŋ ɓay lehna ye lehna ye. Nzuk ta hal nzu̧y ké tul kpuh ŋgatukru ya, nzuk hal lehna vo̧ko ké tul ŋgatukru gun gay ya. Nzuk lawsuki ƴo hi̧ suki ké-e mbek ku̧ ɓil law ye ƴo ti̧h kala. Nzuk law a pipiri-u ba, ƴo hi̧ fe a pipiri-u ké-e mbek ku̧ ɓil law ye ƴo ti̧h kala. Fe mbekna ké nzuku mbek ku̧ ɓil law ye ƴo ur dukuku mí ti̧h ke nzak ye. Uwa. Ɓay fe í-i ɗi mi “ŋgernzuk, ŋgernzuk” ba, mí láh ɓay bi ta-a le wo ? Nzuk a suŋ suŋ gbam ké gi ta̧w bi mí ke ƴo tul ɓay biri ké-e lah le, nzuku na ani munu le ? Mi ƴo sɔk wuri. Nzuk ra ɓa nzuk ké mboh diŋ vul ye ké gel ké kasaw na diŋu. Ke ɗeh kpu̧ru si ka̧h fihri-u dara mí ke mboh diŋ vul ye kan ri ɓáy. Mbih uh mí vba̧ vulu paw paw mí ziŋ ŋgerna haw vulu ya ɓayu ké nzuku mboh vulu ké gel ké kasaw na diŋu. Nzukay ké lah ɓay ké mi ɓah mí ke poŋ ma fal bale, ke ɓa nzuk ké mboh vul ye tul siɓa gel garu dan kerɓay tul diŋu. Mbih uh vba̧ vul ra paw paw mí haw vulu wuruk vba̧ siɓa. Ɓeɓna vul ra ti̧h ɓa baw ɓeɓna. »