Mbete Zak 3
3
1Yi̧n biri, daɓa woiri ɓá ti̧h ɓa nzuk-sɔk ɓay Ŋgerzah ya ɓay fe le, i tu ɓahri se, salɓay kú-u ɓay kuŋ ku̧ tul wah nzuk-sɔk ɓay Ŋgerzahri ɓay kpuh mba salɓay nzuk a ɓoruri mba-mba. 2A wah gbam, bɔk wah ƴo ɓe ɓay bolkusolri ɓoɗ ɓoɗ kpatara. Nzak nzuk ɓa gel ɓe bɔk ye ya le, nzuku ɓa nzuk pirmatul ké eŋ Ŋgerzah gaŋ. Ke tu ɓaŋ lagambal kan nzak ye mgba keni tul ye tu. 3Gelke nah ɓaŋ lagambal ndoh haw ɗeŋe hi̧ ɗeŋe si gel a a̧y ké nah yih dale, mun ye gbam si pi. 4Í ko kumbon ke hu̧hna ye gbam. Kuna a bawu ƴo sɔkrɔ mun kumbon ndur ndur, mí nzuk hehre-u ƴo hehre ke kpuh a hu̧h ya-u. 5Kaŋ pi mí rim ɓa fe a mah gelu ké mun, mí rimu ƴo gar ɓay tul fe a lukiri.
Í ko hɔrɔ a mah gelu ndi̧ mí mah nzuh ɓaw. 6Rim ɓa hɔrɔ, ɓa sa̧w mgbɔrɔ tukala-ay. Rim ɗeh puh ɓa suki ké mun wah mí sih gel kaɓna wah birim. Rimu ƴo nzuh gel sina wah par par. Sa̧w hɔrɔ ké rim wah nzuh keni gelri ur ke záh tukala. 7Feri ké Ŋgerzah laɓ, ɓa ra nay kpahri, gundoyri, fe kuhru ke selhaŋri, nzuyri, gbamaw na ndɔk nzuk pirmatul. Fe a a̧y ké mba nzuk pirmatul ta-a. 8Mí nzuk ké mah mba rim ye ta-a. Rim la-laŋ kpatara ɓa sa̧na. Rimu mbah ke pom-i hul. 9Rim ra nah ƴo pir keni baah Ŋgerzah Gaŋ tul feri riw mí nah ƴo mgba keni nazi ku̧ tul nzukri ké Ŋgerzah laɓ niri eŋ ni.
10Rim a mbew yaŋaw mí pir Ŋgerzah pi, mgba nazi ku̧ tul nzukri pi-aw ba, yi̧n biri, fe-u ɓá laɓ kaŋ ya. 11Mbihlaw lu mbih a rih-u ke a nuŋu pi ley ? 12Yi̧n biri, kpuh nzu̧y ta leh mbuhru ya. Pukru kara leh nzu̧y ya. Lɔkɔ mbih ké nuŋ ɓa tom ta lu mbih a rih-u ya.
13A ge ké sakra woiri-aw mí ru̧-ru̧ le ? A ge mí tu goso suki le ? Fe laɓna ye ɓá sɔk pihna ke siŋ sina suki ké-e si keni sina law a voh-u ké sa̧w ɓa ru̧na. 14Mí law woiri mbah ke sere, law woiri nzek ɓay tul fe dale, í nda giri ya, í kuŋ ɓay ku̧ nzak ketina ya. 15Sam ru̧na a kaŋaw ɓa fe nunmbam ya, mí ɓa fe tukala, ɓa fe nay, ɓa fe záh 16ɓayu ké gel a a̧y ké sere ƴo ri, nzék law ɓay tul fe ƴo ri le, ɓéɓ gel ke fe laɓna a kɔkuri ɓoɗ ɓoɗ ƴo ri pi. 17Mí ru̧na ké ur ke nunmbam te-teh dara mí ɓa ɗeŋ, ƴo lah hani ke nzukri, ƴo ke suk-lah ɓay, ƴo mbar fe laɓna gbam ke law in ke suki ké mi̧hri-u leh suki. Ru̧na-u lu nun nzuk ya, mu̧h ketina ya pi. 18Mi̧hri sal in ké Ŋgerzah ŋga̧h ziŋ nzukri ɓa záh woyri, ké ruh ɓil ɗeŋ le, leh lehna hi̧ nzukri ké pihna woyri ɓa ɗeŋ.
Currently Selected:
Mbete Zak 3: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
