Mbete Zak 2
2
1Yi̧n biri, kéhr nzukri ɓay riŋ ɗina woyri ɓá ta-a, law woiri ɓá na ɓa mbew ke Gaŋ wah Ŋgermbay Zezu, a ye nzuk riŋ ɗina ké lu nun nzuk ya#2.1 Í mgba Mbete Filipiri 2.5-11 tuh ke gel ki̧na-ay.. 2Gelke nzuk riŋ ɗina ké ɓaŋ ɓarmandɔk lari lɔr kan ndɔk ye, ke ndoh gar lari rih sakra woiri ké ɓil vul misoŋ, mí ko̧hko ké gar ye gɔh za̧ri za̧ri ba, rih pi dale, 3i ko kona ma tul nzuk ké ndoh gar lari ra, i ɓah hi̧ ni ɓahri : « A woiri, í gi ma pol. Gel kaɓna a suki ƴo ri-ay. » Ko̧hko ba, i el ɓah hi̧ ni ɓahri : « A wo le, mú ƴo síɓa ma fal sa̧ » mini « Mú kaɓ tusiɓa ké ɓel bɔk bi-ay. » 4Kaŋaw wa, i kehr nzukri kehr, kaŋ ya le wo ? I laɓ mun woiri ɓa nzuk-kehr nzukri, kerɓay woiri ɓa a pipiri-u, kaŋ ya le ? 5Í lah wuri, yi̧n biri, gun sanari. Ko̧hkori ra wa, Ŋgerzah lu niri ké haŋsekle nzuk tusiɓari hi̧ kanlaw woyri ŋgi̧-ŋgi̧ ɓa fe ziŋna, ku ɓa gun-ya̧ fe baah ké-e wahɓay hi̧ nzukri ké sa ni, kaŋ ya le#2.5 Í mgba Mbete Luk 6.20 tuh ke gel ki̧na-ay. ? 6Mí a woiri ba, i ko ko̧hkori ɓa nzukri ké na kpo̧k kaŋ. Nzuk fe ziŋnari-aw wa, ɓa a woyri mí ku ik tul woiri ma siɓa, ku kɔklɔ wuri si gel-kuŋ salɓay, kaŋ ya le wo ? 7Ku ƴo ɓeɓ riŋ Ŋgermbay a suki ké ku ɗi kan tul woiri ra, kaŋ ya le wo ?
8Gelke mu ƴo tul ɓayay ké mba tul ɓayri gbam ɓil bolkusol Ŋgerzah ɓa mbay : « Mu sá nzuk mbaŋ wo eŋ mun wo kaŋ » le, su-su. 9Mí i kehr nzukri kehr le, i laɓ suya. Bolkusolaw laɓ ɓay kan tul woiri goh wuri ɓa nzuk-mba nzak Ŋgerzah, 10ɓayu ké nzuk ké ƴo tul bolkusol Ŋgerzah gbam, mí bɔk ye ɓe tul ɓay mbew le, salɓay-mba bolkusol riw mgba tul ye da#2.10 Í mgba Mbete Galaɗri 3.10 tuh ke gel ki̧na-ay., 11ɓayu ké a ye ké-e hi̧ bolkusol ɓahri, mú mbi wu̧y nzuk mbaŋ wo ya, a ye mí ke el ɓah ra ɓáy ɓahri, mú i hul ya pi. Mu laɓ nunpuki ya, mí mu i hul dale, mu ti̧h ɓa nzuk-mba nzak bolkusol munu. 12Kaŋ dale í ɓah ɓay, í laɓ fe ké mah hi̧ bolkusol ɓá sel wuri sel, 13ɓayu ké salɓay ké Gaŋ tul feri riw kuŋ ké tul nzuk a a̧y ké sa laɓ law in ziŋ mbaŋ ye ya ƴo ɓa kpuh-u#2.13 Í mgba Mbete Matiye 18.21-35 tuh ke gel ki̧na-ay. . Láɓ law in mí ɓa fe-haw ŋgermu ké gel-kuŋ salɓay.
14Yi̧n biri, gelke nzuk ɓahri, ke kan law tul Ŋgermbay, mí pihna kanlaw ye ta-a ra wa, ɓay ɓahna ye-aw ti̧h suk gaŋ le ? Sam kanlaw a kandɔkaw mah ya̧ ni gaŋ ley ? 15Gelke yi̧n wah a wu̧yu mini a wo̧ro-u ta ke gar ya, fe su̧na ké mah gel ɗaka ye poh ni nam ke nam, 16mí nzuk ké sakra woiri u̧m nun ye, mí ke ɓah hi̧ niri ɓahri : « Í si ɓa suki, í kaɓ ɓa suki, ɗaka kara ɓá i wuri ya, » dan so niri ra wa, ɓay ye-aw ti̧h suk gaŋ le ? 17Kanlaw na kaŋ pi. Kanlaw ta ke pihna ké falu ya le, na kpo̧k mah hani ke hul.
18Mí nzuk ɓay el ke ɓay ɓahri : « A ye-aw ke kan law tul Ŋgermbay, a bi le, pihna bi ƴo ri. » Mú sɔk mi kanlaw wo ké pihna ta falu ya. A bi mi sɔ́k mu pihna laɓna biri ké sa̧wu ur ke kanlaw ba. 19Mu mgba ɓahri, Ŋgerzah mbew, deɓ ye ta-a. Su-su. Záh tukalari kara tu kaŋ pi, mí mun woyri to kpak kpak ɓa hȩkme. 20Kɔk nzuk, mu yih ɓay mí sɔk mu ɓa teh-u ɓahri, kanlaw ké pihna laɓna-u ta-a ra na kpo̧k ley ? 21Í ko zih wahri Abaraham ra. Ŋgerzah ko ni ɓa gun ye ɓay pihna laɓna ye, kaŋ ya le ? Ke gi ke gun ye Isak kan gel fe puhna ɓay i ni hi̧ Ŋgerzah kandɔk ké-e vbi#2.21 Ɓayay na ɓil Mbete Sa̧w fe 22.1-14. . 22Mú ko kanlaw ye si sina ke pihna laɓna ye mbɔk, mí pihna ye mí ɓa sa̧w fe ké mbar nzak kanlaw ye tuɓ tuɓ. 23Kaŋ mí bolkusol Ŋgerzah laɓ ƴo gelu. Abaraham kan law sa tul Ŋgerzah, mí Ŋgerzah ko ni ɓa gun ye gaŋ ba, mí ke ɗi ni ɓa ya̧h. 24I ko ɓahri, sa̧wɓay ké Ŋgerzah ko nzuk ɓa gun ye ra ɓa pihna ké ti̧h ke law nzuku ké tu Ŋgerzah ɓa záh ye, sa̧wu ta ɓa nzak ké ɓah ɓay kanlaw ndikpo ya. 25Kaŋ pi mí Rahaɓ wu̧y-laɓ nunpuki, sa̧wɓay ké Ŋgerzah ko ni ɓa gun ye ɓa pihna laɓna ye-ay. Gun Izarayelri gi hekre gel ké tusiɓa sa̧w nzuk yeri ɓay ruh ŋgermu ké ri, mí ke mgba niri gahru. Ke el hi̧ niri ku ƴahra ke mahful a nzɔŋ gel, mí ku tɔr fe woyri#2.25 Ɓayay na ɓil Mbete Josué 2. . 26Kandɔkaw mí kanlaw ké pihna laɓna-u ta-a ra na kpo̧k mah hani ke mun dan tem ɓa hul.
Currently Selected:
Mbete Zak 2: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
