Mbete 1 Tesaloniri 2
2
1Ké i ya̧ na ma law ra, a woiri yi̧n wahri i tu ɓahri se, ya̧na-u kal ndikpo ya. 2Ɓay fe le ké Filipi ra ku laɓ na koseh, ku laɓ na fe-se su̧hru kara ke ŋgerna Ŋgerzah nah ruh mun gi ka-kah ɓaysuki hul Ŋgermbay ké Ŋgerzah hi̧ na ɓa teh-u hi̧ wuri i lah. 3Nzak hewna wah ra gi ke ɓay ké reh ful ya ke kerɓay a pipiri-u ya ke nzak rɔkna ya pi. 4Wara le nah gi ɓa nzukri ké ketina wah ti̧h ɓa teh-u ké nun Ŋgerzah. Ke ɓaŋ ɓaysuki ra ku̧ ndɔk wah. Kaŋaw mí nah ɓah ɓayu hi̧ wuri. Nah ƴah law rihna nzukri ya. Le nah ƴah law rihna Ŋgerzah a ye ké-e ƴo hekre law wah.
5Sew ké nah ka̧h ta̧w woiri ra, nah gi ke nzak pa̧na ɓay rah wuri ya, i tu wuri tu. Nah mbi ɓay a kala lɔm keni fe ya pi, Ŋgerzah ɓa nzuk-lu lakna ɓay wah. 6Nah ƴah riŋ ɗina tukala ya, nah ƴah riŋ ɗina ké ta̧w woiri ya pi, ké ta̧w nzuk a ɓoruri ya pi. 7Ŋgermbay mí lu na ɓa gun nzak pihna ye. Ŋgerna ké-e hi̧ na-aw ƴo ri kara nah mbi siŋ sina law a voh-u ké sakra woiri eŋ mah gun ké hu̧hru gun ye ma law. 8Kandɔk mah gun ra mí law wah sa̧h ɓay tul woiri, nah ƴo ke law rihna ka-kah ɓaysuki Ŋgerzah ra hi̧ wuri kaŋto ya. Wara le nah ƴo ke law rihna póŋ mun wah hi̧ hul ɓay tul woiri pi ɓay fe le, i ti̧h ɓa maŋlaw wah. 9Rohna wah ke ta̧hma wah ra yi̧n wahri, i ƴo ker si tulu. Nah laɓ pihna suŋ ke seh hɔl keni mun wah rɔkɔ nah ti̧h ɓa sukna ké tul nzuk mbew ké sakra woiri, kaŋ mí nah ka-kah ɓaysuki Ŋgerzah ra hi̧ wuri keni.
10A woiri gaŋ i ɓa nzuk-lu lakna ɓay siŋ sina wah, Ŋgerzah kara lu lakna ɓayu pi. Siŋ sina wah ɓa siŋ sina lawpuki, siŋ sina a ndaru ké te-teh mí nah si ké sakra woiri nzuk-kan law tul Ŋgermbayri. 11I tu-tu, nah kaɓ ziŋ wuri mbew mbew gbam kandɔk bah gun ké kaɓ ziŋ gun yeri. 12Nah hew wuri, nah voh law woiri, nah ɓah ketina hi̧ wuri ɓay í si siŋ sina ké mah nun Ŋgerzah a ye ké-e ɗi wuri kaɓ ɓil lák mbay ye, kaɓ ɓil riŋ ɗina ye pi.
13Sa̧wu mí a wah kara nah el ke tumbɔl hi̧ Ŋgerzah mgbiŋriŋ ɓay tul woiri pi ɓay fe le, i lah nzak pihna Ŋgerzah ké nah ɓah hi̧ wuri, mí i ya̧ ndɔk seɗe. I ya̧ nzak pihna-u ɓa ɓay nzuk pirmatul ya. Le i ya̧ nzak pihna-u ɓa ɓay Ŋgerzah gaŋ, mí ke ƴo laɓ pihna ye ké sakra woiri ké i kan law tul Ŋgermbay. 14A woiri yi̧n wahri ɓil Ŋgermbay fe ké ti̧h tul sa̧w in Ŋgerzah ké tusiɓa Zude-aw, ti̧h tul woiri pi. I ko seh ké ndɔk nzuk in woiri kandɔk a woyri kú-u ko seh ké ndɔk sa̧w in woyri ziɓri kaŋ. 15Ku i gun nzak pihna Ŋgerzah a lewsa̧ri, ku i Gaŋ tul feri riw a ye Zezu pi. Ku faŋ bol wah ƴo laɓ na koseh, ku tur nun nzukri gbam ke ɓay, ku ta rih law Ŋgerzah ya. 16Ku ƴo gboh na sɔ́k ɓay hi̧ sa̧wnzuk a ɓoruri rɔkɔ sa̧wnzuk a ɓoruri ɓá ziŋ ɔkna. Kaŋ mí ku ƴo mbar keni nzak suya woyri nam ke nam, mí law fa̧hna Ŋgerzah ba, na tul woyri mah gbu̧h suya woyri.
17Mí a wah ra yi̧n wahri, feri ké ziŋ na hi̧ nah kehr haniri ɓa ɗih-u sa̧wseh ndi̧ kara kerɓay tul woiri na law wah kpatara, mí nah tasa̧y él si ko nun woiri, law wah ɗaŋ kaɗ kaɗ ɓay tul woiri. 18Sa̧wu mí nah ƴah ful el si ta̧w woiri, wara le a bi Pɔl mi ƴah ful ka̧yri ka̧yri, mí nzukbaa ra ƴo yeŋ na. 19A woiri gaŋ mí i ɓa fe-vba̧ haŋ wah ké pol Ŋgermbay Zezu seh gina ye, law wah ƴo geŋ suki woiri, law wah zay ɓay tul woiri. 20Ketina i ɓa riŋ ɗina wah pi, i ɓa law rihna wah pi.
Currently Selected:
Mbete 1 Tesaloniri 2: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
