Mbete 1 Kɔrenteri 4
4
1Su-su ɓay ko na ɓa gun-laɓ pihnari ké ƴo laɓ pihna hi̧ Ŋgermbay kaŋto, su-su ɓay ko na ɓa nzuk-mgba sa̧w kerɓay ké Ŋgerzah mu̧h lewsa̧ ra hi̧ nzukri lah. 2Mí fe mbew ké nzuk yih ké ta̧w nzuk-mgba sa̧w fe ye ra le, ké ƴo tul mgbá sa̧wu ke law mbew. 3Dale ɓay ɓahna woiri ké tul bi mini nzukri goh mi kara se mi ya. Law bi kara laɓ ɓay kan tul bi ya 4ɓayu ké law bi nzah ɓay ya. Keni-aw kara ta ɓa a a̧w mí lu ɓay ké tul bi ya. Ɓay fe le nzuk-kuŋ salɓay tul bi ɓa Gaŋ tul feri riw. 5Kaŋ le í takra kuŋ salɓay ya, í geŋ sa̧wseh-u. Í geŋ elna Gaŋ tul feri riw. A ye ke téh gel tul ɓayri ké mu̧h ɓil tirima. Ke tén ɓayri ké na law nzuk ma kala dale, a ge ge le ɓay ya̧ pirna ye ké ta̧w Ŋgerzah.
6Kaŋ mí yi̧n biri mi mbi lawɓayri-aw ra ɓah keni ɓay bi ke Apolo ɓay so wuri hi̧ í firma ɓayay ké ta̧w wah ɓahri, ɓá zo tul fe vbehna ya rɔkɔ mgbá nzuk mbew tuh ke nzuk a ɓoru ɓá hi̧ í hu̧h tul el kehr hani. 7Kandɔkaw a ge mí ɓa sa̧w-kehr mu ke nzuk a ɓoru ɓa nzuk le ? A fe mú-u ya̧ mí mu nda giri ɓahri, fe ziŋna wo munu le ? Ké mu ziŋ kara ɓay fe mú-u ƴo vba̧ haŋ ɓahri, sa̧wu ɓa ŋgerna wo le ?
8I ker ɓahri, i ƴo ɓil vana da, i ɓa nzuk fe ziŋna da. Nah ta-a kara i ƴo lak mbay da. Nah mbi kɔk kerɓay woiri el ɓah hi̧ wuri ɓahri, í lak mbay si wɔrɔk ge ɓay hi̧ a wah kara náh lak mbay ziŋ wuri pi. I tu ya ɓáy le wo ? 9A wah gun nzak pihna Ŋgermbayri ra mi ko ɓahri se, Ŋgerzah ten na ɓa sar nzukri mgbaɗ. Ke ten na ké nun nzukri, ké nun tem nzak pihnari, ké nun tukala pi ɓa fe-yi̧h yi̧hna eŋ mgbalri kú-u laɓ niri ɓay i-u kaŋ. 10A wah nah ɓa kɔk nzuk ɓay riŋ Ŋgermbay, mí a woiri ké i ƴo ziŋ ni i ru̧-ru̧. Nah ta̧-ta̧h, mí i ŋge-ŋger. I ƴo ke riŋ ɗina, mí a wah nah ɓa fe ndikpo. 11Kpu̧ru ka̧h guri nah ƴo lih ɗaka, kɔkmbih ƴo i na, nah si mun ndikpo, nah ƴo ya̧ vba̧na, nah ta ke puh ya. 12Nah ƴo kah rohna laɓ pihna ke ndɔk wah. Ku ƴo far na le, nah lu mgbɔkɔ hi̧ niri. Ku ƴo laɓ na koseh le, nah su̧h law. 13Ku ƴo laɓ nani ke riŋ wah le, nah el ke ɓay a voh-u hi̧ niri. Nzuk tukalari ƴo laɓ na eŋ ɗikma-ku̧ tul nzakseh, ku ƴo laɓ na eŋ vbi̧ri woyri ka̧h aŋay.
14Mi vbeh ɓayaw ɓay ɓaŋ su̧hru kan nun woiri ya. Le kandɔk ké i ɓa gun sana biri mí-i kɔklɔ suk woiri keni 15ɓayu ké a bi mi ɓa bah-mbuŋ wuri ke ɓaysuki hul Mbay Zezu hi̧ sa̧w woiri ƴo mbew ziŋ ni. Bah-hɔl wuri ɓil ɓay Ŋgermbay ɓa sɔɗ sɔɗ boh kara bah-mbuŋ wuri ɓa mbew. 16Kaŋ le mi ƴo hew wuri, í ndɔl fe laɓna bi.
17Sa̧wu mí-i pih Timote a ye gun sana bi ɓil Ŋgermbay, ke ƴo lah mi ɓa suki ɓil Ŋgermbay pi. Ke él dum law woiri ké tul siŋ sina bi ké si mbew ziŋ Ŋgermbay kandɔk ké mi sɔk sa̧w in Ŋgermbay ké gelri ɓoɗ ɓoɗ gbam.
18Nzuk a haniri ké sakra woiri hu̧h tul. Ku ker ɓahri, mi ta el si ko wuri mba. 19Mí Gaŋ tul feri riw poŋ ful hi̧ mi si ta̧w woiri ɓa gah-u le, mi si-u. Mi tú ɓay ké nzuk-hu̧h tulri-aw ƴo ɓah-u kaŋto ya. Wara le mi tú ŋgerna woyri pi 20ɓayu ké lák mbay Ŋgerzah ta ɓa ɓay ɓahna ya. Le ɓa ŋgerna ye. 21Fe a suŋ mí i yih le ? Mí si ta̧w woiri ke ndeh mini mí si ta̧w woiri ke law sana Tempuki a ye ké-e ɓa sa̧w law a voh-u ra le ?
Currently Selected:
Mbete 1 Kɔrenteri 4: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
