Mbete 1 Kɔrenteri 3
3
1Yi̧n biri, i ɓa nzukri ké sa̧w woiri ɓa Tempuki kara ɓay mí ɓah ɓay hi̧ wuri ɓay í lah ɓay ké si ke Tempuki se-se. Le mi ɓah ɓay hi̧ wuri kandɔk nzuk pirmatul a sa̧w som siɓa, kandɔk gun a leleri kaŋ, a woiri ké i ƴo ziŋ Ŋgermbay. 2Ɓay bi ké mi tih ɓah hi̧ wuri mah ke pam, mí-i hi̧ wuri i nzo. Huru le i mah laku ya, ɓayu ké i ŋger ya ɓáy. Mí aŋay kara i mah ya ɓáy, 3ɓayu ké ka̧h guri i poŋ fe laɓna tukala ya. I ƴo laɓ sere, i ƴo ɓal hani ra wa, i laɓ mun woiri ɓa nzuk tukalari, kaŋ ya le wo ? I ƴo si siŋ sina kandɔk nzuk pirmatul a sa̧w tusiɓa kaŋto, ya le ? 4Gelke nzuk a mbew ɓahri : « A bi mi ɓa nzuk Pɔl », nzuk a ɓoru ɓahri : « A bi mi ɓa nzuk Apolo » ra wa, i laɓ mun woiri ɓa nzuk pirmatul a sa̧w som siɓa kaŋto munu, ya le wo ?
5Apolo ɓa ge ? Pɔl ba, ɓa ge le ? Ku ɓa gun-laɓ pihnari kaŋto. Ɓay nzak pihna woyri-aw mí i kan law tul Ŋgermbay. Ku laɓ pihna kandɔk ké Gaŋ tul feri riw wal niri. 6A bi mi ma̧ kpuh. Apolo ba, ku̧ ri mbih, Ŋgerzah mí hi̧ kpuh-u hu̧h. 7Dale nzuk ma̧-u ɓa fe ya pi, nzuk ku̧ ri mbih kara ɓa fe ya pi, le Ŋgerzah ké hi̧ kpuh hu̧h ra a ye mbew yaŋ mí ke ɓa nzuk a kpakpaŋu. 8-9Nzuk ma̧-u ke nzuk ku̧ ri mbih, ku ɓa bɔh pihnari. A ge ge le ɓay ziŋ kpaŋndɔk ye mah ke ta̧hma ye ta̧hma ye, ɓayu ké gbam wah nah ɓa bɔh pihna Ŋgerzah. A woiri ra i ɓa waka Ŋgerzah, i ɓa vul ké Ŋgerzah yih mboh-u pi.
10-11Lawsuki Ŋgerzah hi̧ mi, mi ti diŋ vulu ɓa nzuk goso fe mbohna. Diŋ vul Ŋgerzah ra ɓa Ŋgermbay Zezu mbew yaŋ. Nzuk a ɓoruri gi ƴo mboh mun vulu, mí a ge ge le, ɓá ko ani mí ke mboh-u, ɓayu ké tí diŋ vul Ŋgerzah a ɓoru, nzuk mah ya. 12-13Mí nzuk mboh mun vulaw ke lari lɔr, lari a si̧h-u, kasaw a felu, kpuh, suy mini sihri le, sam pihna nzuku ɓay ten mun nam-kuŋ salɓay. Ɓay fe le namu, hɔrɔ mí ɓay sɔk sam pihnari gbam. Mun pihna-u ɓay te-teh ke hɔrɔ. 14Pihna a a̧y ké hɔrɔ kal mí vulu se ya le, nzuku ɓay ziŋ kpaŋndɔk. 15Pihna a a̧y ké hɔrɔ se-se le, nzuku ɓay kaɓ ndɔk zolom. Mí ke tí̧h kandɔk nzuk ké hɔrɔ zo ni kaŋ. 16I tu ya lo ? A woiri i ɓa vul kani Ŋgerzah, Tem Ŋgerzah ba, ƴo ɓilu. 17Nzuk ɓeɓ vul kani Ŋgerzah le, Ŋgerzah ɓay ɓeɓ ni, ɓayu ké vul kani ye ɓa fe ye. Kaŋ mí i ɓa vul kani ra.
18Mí nzuk a hani ké sakra woiri ɓá rɔk mun ye ke mun ya. Gelke nzuk ko mun ye ɓa nzuk nun ru̧na a tukala-ay le, ké ti̧h mun ye ɓa kɔkɔ dara mí ke tí̧h ɓa nzuk ru̧na ɓáy, 19ɓayu ké ru̧na a tukala ɓa kɔk fe ké ta̧w Ŋgerzah kandɔk kú-u vbeh lewsa̧ ɓahri, kerlaw ru̧nari ti̧h ɓa ndaw ké-e mgba niri keni. #3.19 Ɓayay na ɓil Mbete Job 5.12,13. 20Ku vbeh ra ɓáy ɓahri, Gaŋ tul feri riw tu kerɓay ru̧nari. Ke tu-tu, kerɓay woyri ɓa kuna. #3.20 Ɓayay na ɓil Mbete Siŋ (Psaumes) 94.11. 21Kaŋ le garɓay ké si tul nzuk mbew ɓá ta-a, ɓayu ké feri gbam ké Ŋgerzah laɓ ɓa nzuku a woiri. 22Pɔl, Apolo, Sefas, nunmbam ke tusiɓa, ɔkna ke hul, feri ké laɓ da ke feri ké laɓ ya ɓáy, gbam ɓa nunu a woiri. 23A woiri le i ɓa nzuku a Ŋgermbay, Ŋgermbay ba, ɓa nzuku a Ŋgerzah.
Currently Selected:
Mbete 1 Kɔrenteri 3: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
