SEFELA SA DIFELA 8
8
1Eka o ka be o le kgaitsedi ho nna,
mme a o hodisitse
ka letswele la hae!
E ne etlare ha ke o fumana
o le kantle,
ebe ke a o aka,
ho se be ya ka nnyatsang.
2Ke ne ke tla tsamaya le wena
ke o ise lapeng heso,
moo mme a ileng a nkgodisetsa teng;
ke o nwese veine
e nang le metswako,
ke o nwese lero
la dikgarenate tsa ka.
3Ke samme tsoho la hae le letshehadi,
ka tsoho la hae le letona o nkopile.
4Lona baradi ba Jerusalema
ke a le laya:
Le se tsose moratuwa wa ka,
kapa la mo sisinya,
ho fihlela yena a ka rata ho tsoha.
Sefela sa botshelela
Metswalle:
5Ke mang eo ya tswang lehwatateng,
a itshetlehile ka moratuwa wa hae?
Morwetsana:
Tlasa sefate sa apole
ke ile ka o tsosa,
hona moo mmao
a o emoletseng teng,
hona moo mmao
a o belehetseng teng.
6Mpee fubeng sa hao
jwaloka setempe,
jwaloka lesekana
nthwale tsohong la hao,
hoba matla a lerato
a tshwana le a lefu,
sehloho sa lefufa
se tshwana le sa lebitla.
Lerato le tuka sa kganare
e tlola ditlhase,
jwaloka tetema e laima malakabe!
7Matlopotlopo a metsi
a ke ke be a le tima,
esita le dikgohola
di ke ke tsa le hohola;
leha motho a ka fana
ka ruo lohle la hae,
ka lona a leka ho reka lerato,
a ke ke a fumana letho,
haese ho nyediswa!
Kgaitsedi tsa morwetsana:
8Re na le letlamorwana la kgaitsedi,
matswele a yona
e sa le diolamolora.
Re tla etsa jwang
ka kgaitsedi ya rona,
ha mohlankana a rata
ho e hloma lesiba?
9Haeba kgaitsedi e le lerako,
re tla e hlomela tora ya silefera;
haeba kgaitsedi e le monyako,
re tla e kwala ka mamati a dikedare.
Morwetsana:
10Nna ke lerako,
matswele a ka a ka ditora,
mahlong a moratuwa
nna ke mmusapelo.
Mohlankana:
11Solomone
o na ena le serapa,
rapa sa morara Baale-Hamone,
rapa sena sa hae
a se hirisetsa balemi;
hore balemi ba tle ba kotule
tholwana tsa tshimo eo,
molemi ka mong a lefa
shekele tsa silefera di le sekete.
12Nna tshimo ya ka ya morara ke ena,
wena, Solomone,
nka shekele di le sekete,
seabo sa balemi
ke makgolo a le mabedi.
13Wena ya phelang ka dirapeng,
metswalle e mametse ho utlwa o bua;
ako bue,
le nna ke utlwe ntswe la hao.
Morwetsana:
14Potlakela ho nna, wena moratuwa,
o etsise tshepe
kapa namane ya kgama,
hodima thaba
tse maririela a dinoko.
Currently Selected:
SEFELA SA DIFELA 8: SSO89SO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1989. Used by permission. All rights reserved.