MATHIUS, NOPUKA AFASAO SORE, 27.
NOPUKA AFASAO SORE, 27.
1TA popo tira nimai iai, iotshi fatoriki o ta fare mori ma fakau sore o tagata nifakatamau macre ia fakainina ia Iesu keitshi aia keimate;
2Wamuri acre nifousia aia, acre niarafia aia efuafo, neitufwa aia ia Pontius Pailet ta teriki.
3¶ Iai Jutas, aia nifakareresia aia, wamuri aia neicitia acre neitucua katshi aia komate, neitagi tshana magane isa, ma amai foci iacre ta therte anopito selver ia fatoriki o ta fare mori ia fakau sore,
4Nokoutucua, Avau nimaganisa ia nifakareresia toto o aia semaganisa. Macre neitucage, Taha tira iacime? Tshou maganera.
5Aia nifakarerecea iraro iai anopito selver ia ta fare sore o Ihova, ma nifeke efuafo, nifano neinoutshia aia nimate.
6Fatoriki o ta fare mori niamo anopito selver, ma neitucage, Itapu nage acre ia tupurerakau o mune, ma acre nomata o toto.
7Acre nifakatamau iateia, ma nifakamata ia acre ta none o tagata neimna taganea o takere, keitanumea tagata o fanua papai iai.
8Ia anera ta none tira neitapa neigo iai, Ta none o toto, ia nopoge nei.
9Nopogera nimai iai anera hepe neitucage ia Jeremaia ta profeta, nokoutucua, Acre niamo ta therte anopito selver, ta nomata o aia acre neiioria, aia acre tagata o Isreil nefakairo, nomata iateia.
10Neitufwa acre nomata o none o tagata neimna taganea o takere; hepe Ihova nifakairo avau.
11¶ Iesu nikotu emoa ta teriki, ma ta teriki nifakowia aia, nokoutucua, Akoi ta teriki o tagata o fanua Juteia, mo jimra? Iesu neitucage iateia, Akoi koutucua.
12Nifasosa iateia iai fatoriki o tafare mori ma fakau sore, aia sefasao.
13Pailet neitucage iateia, Fakarogona akoi, mo jimra, ane nalupai acre neitucua isa iatakoi?
14Aia sefasao aia ma; neimna teriki nimasaro sore iateia.
15Ia tacripogira magane o teriki eivetea ta vava o tasi tagata nifousia aia tafare mukei iacre, aia acre nifakowia.
16Neinofo ia tafare mukei tshare tasi tatane isa, neitapa neigo tshana Barabas.
17Ia ane nei acre nifetacina iai ia none tasi, Pailet neitucage iacre, Akai o acrawa acowa acitiafakarafia avau eivetea ta vava tshana keitufwa iacowa? Barabas mo Iesu neitapa tshana neigo Kristo?
18Ma aia nikeiro ia fakainina tshare acre neitufwa aia.
19¶ Iai aia neinofo ia tafata tsha fakairo ioria o maganisa, tshana nahune nikowna iateia, nokoutucua, Natshicina akoi asitu iauiai tatane maganerefisa ma totonu tira; ma kuroto nimy sore i ane nalupai iateia iraneia ia tamatshi.
20Kaia fatoriki o tafare mori ma fakau sore nifakairo tagata nalupai nifetacina iai, pe acre nifakowia Barabas, ma takaroiai Iesu.
21Teriki nifasao neitucage iacre, Akai o acrawa avau eivetea ta vava tshana iacowa katufwa? Acre neitucage, Barabas.
22Pailet neitucage iacre, Taha avau kamna ia Iesu neitapa neigo tshana Kristo? Acre iotshi neitucage iateia, Erefia tucia aia ia tererakau fakaravasia.
23Ta teriki neitucage, Tiaha taha ane isa aia neimna? Kaia acre nitapa fakasore foci ma foci, nokoutucua, Erefia tucia aia ia tererakau fakaravasia.
24¶ Iai Pailet neicitia aia nitaru fakafecina arotorea, kaia acre hepe kofiatu, aia niamo tavai nifakafano tshana norima emoa acreiotshi nifetacina iai, nokoutucua, Avau seasitu rigia toto o tatane maganerefisa ma totonu tira; sara acowa iateia.
25Tagatotshi iai nifasao, neitucage, Ioria o tshana toto konofo iacime ma tshome erecriki.
26¶ Iai aia neivetea ta vava o Barabas neitufwa aia iacre; ma wamuri aia neitshi Iesu ia toura, aia neitufwa aia keitucia ia tererakau fakaravasia.
27Wamuri tira fakau kotaia tagata tsha teriki niarafia Iesu ia nopito sore o tafare, nifetacina iateia iotshi fakau o acre nitaia tagata.
28Acre niamke umiga ishana, nitaka aia ia tumiga sore ouroura.
29¶ Iai acre raga topurau o tasoni, nitavisia aia ia tshanu nouru, ma nagi tagasao tasi ia norima matau tshana; macre nifakaturia enturi emoa aia, nifakamana aia, nokoutucua, Alofa, Teriki O tagata o Juteai!
30Acre nisavari aia, niamo ta tomatshira ma neitshi aia ia tshana nouru.
31Wamuri acre nifakamana aia, acre niamke tumiga ouroura nitakaia aia iateia, nitakaia aia ia tumiga tshana, ma niarafia aia watafa keitucia aia ia tererakau fakaravasia.
32Hepe acre niroro, watafa, acre neicitia tasi tatane o fanua Sairine, neitapa neigo tshana Saimona; acre nifakumtakutshia aia keitakoia tshana tererakau fakaravasia.
33Acre niromai ia none nitapa neigo Colcotha, nokano o neigo tira, Ta none o noipu o tagata.
34¶ Acre neitufwa aia venicar neirepua ia cal keinumea; aia neisopotshia aia, natshicina neinumea.
35Acre neitucia aia ia tererakau fakaravasia, nitarowiai tshana miga, neimna aloti iateia; ane nei nimai hepe ta fasao o ta profeta, Acre nitarouiai tshaku miga iacre, ma ia tshaku miga iluga acre neimna aloti.
36Acre nokonofo iraro, neiratshia aia iai;
37Neitucia ia tererakau fakaravasia iluga tshana nouru, afasao ia tshana magane neisiria, TINEI IESU TA TERIKI O TAGATA O JUTEIA.
38Iai erua tatane nitshigo, acre neitucia ia tererakau fakaravasia ia aia, tasi ia norima matau tshana, ma tasi foci ia norima masui tshana.
39¶ Acre niroro secece neiseciria aia, nokotataia tshare anouru,
40Nokoutucua, Akoi pe iauiai ta fare o Ihova, ma keimna tasi foci ia nopoge toru, kapare akoi. Pe akoi ta nontariki o Atua, fanifo ia tererakau fakaravasia.
41Hepra ma fatoriki o tafare mori nifakamana aia, ia fakau fakairo, ma fakau sore, neitucage.
42Aia kapare tagata faruke; aia kotaru kapare aia. Pe aia teriki o tagata o Isreil, erefia aia milou fanifo ia tererakau fakaravasia, ma acime kafakarogrogo aia.
43Aia nifakarogrogo Atua; erefia aia kapare aia milou pe aia acitiafakarafia aia; ma aia neitucage, Avau ta Nontariki o Atua.
44Tagata tshigo ma acre neitucia ia tererakou fakaravasia ia aia nifasosa iateia hepra.
45¶ Ia our ono apouri neinofo ia iotshi fanua ia our eva.
46Itata our eva Iesu nitapa ia norio fakapolo, nokoutucua ELI, ELI, LAMA SABAKTHANI? nokano tafasao tira, Tshaku Atua, tshaku Atua, tiaha akoi natshicina avau?
47Faru o acre nikotu iai neirogona afasaora, neitucage, tatane tinei nakatapa Elaija. 48Milowa tasi o acre nitere, niamo taremremu nifuia aia nifonu iai venecar, neisucia aia ia tomatshira, neitufwa aia keinumea.
49Faruke iai neitucage, Natshicina aia, Erefia acitia kacitia pe Elaija kamai kapare aia.
50¶ Iesu wamuri aia neitapa foci ia noreo palo neitufwa iluga tshana nokano.
51Ma neicitia, tumiga touria pofna nuntafa tapu o tafare tsha Ihova neifasia fakarua iluga ma fanifo iraro; afanua tamahuke, afatu sore ma neifasia;
52Arua neitanumea tagata iai nifakamama; ma nalupai noaga o tagata erefisa nimero iai nimasike.
53Nimai watafa arua neitanumea acre iai wamuri aia nimasike ia nimate, niroro ia tumrai erefisa, tagata nalupai neicitia acre.
54¶ Wamuri ta senturio, ma acre ia aia iai, naratshia Iesu, neicitia tumahuke ma ane iotshi neimna iateia, acre nimtacu sore su, nokoutucua, Tamari aia ta Nontariki o Atua.
55Nalupai afine iai neinofo papai neicitia, acre niroro wamuri Iesu ia Calili, nifitshicou mare iateia;
56Tasi o acre Mere o fanua o Mactala ma Mere ta nana o Jakobus ma Joses, ma nana o erecriki o Sebeteius.
57Fiafi nimai iai, nimai tasi tatane o Aramathia tshana mune nalupai su, nitapa neigo Josef, aia ma tasi Iesu nifakairo;
58Aia nifano ia Pailet, neinogia ta noaga o Iesu. Iai Pailet nifakairo mukei keitufwa ta noaga iateia.
59Wamuri Josef amweifo ta noaga, aia nitakaia aia ia tumiga ema o lenen,
60Ma neinagi aia ia tshana tapunaga fou tsha noaga o nimate, tira aia nesawa ia aroto o tafatu sore; ma aia nifurusia tafatu sore tasi tafeitoca o tapunaga, ma nifano.
61Iai Mere o fanua Mactala, ma sece Mere, nokonofo itata ta tapunaga.
62¶ Milou ia nopoge wamuri nopogera neipenpena ta paska, fatoriki o tafare mori ma Afarasi nifetacina niromai ia Pailet,
63Nokoutucua, Teriki, acime kamentua tatane tira neiresia tagata neitucage, ia nopogera aia nimouri, Wamuri nopoge toru avau kamasike foci.
64Koutucua akoi keimna tapunaga mukei ia nopoge toru komaice, pe niana tagata aia nifakairo semai ia tupo ma tshigo tshana noaga, ma koutucua ia tagata, Aia nimasike ia tagata nimate; ma korefu tira isa sore, sisi isa aia mokagi.
65Pailet neitucage iacre, Tagata fatshigeia konofo iacowa; roro tshowa retu, acowa kapare aia fakamukei.
66Hepra acre niroro neipofna fakamukei ta tapunaga, nokofakarogeina ta fatu, ma neinagi iateia tagata keifatshigeia aia.
Currently Selected:
MATHIUS, NOPUKA AFASAO SORE, 27.: ANT
Highlight
Share
Compare
Copy
Want to have your highlights saved across all your devices? Sign up or sign in