MATHIUS, NOPUKU AFASAO SORE, 26.
NOPUKU AFASAO SORE, 26.
1ANE nei nimai, nopogera Iesu nifasaoce iotshi afasaora, aia neitucage ia niana tagata aia nifakairo,
2Acowa keiro wamuri nopoge erua komai tacripoga o ta paska, ma ta nontariki o tagata kofakareresia keitucia aia ia tererakau fakaravasia.
3Nopogera nifetacina fatoriki o tafare mori, ma fakau fakairo, ma fakau sore o tagata, ia tafare sore o teriki o tafare mori, neitapa neigo tshana Kaiafas,
4Nikotamau pe acre mapurutshia Iesu, ia karasia ma kotshi aia komate.
5Kaia acre neitucage, Jimra ia nopoge o tacripoga, ma acre nimatacu tagata iai nifiatu iateia.
6¶ Nopogera Iesu neinofo ia Bethane, ia ta fare o Saimona ta Leprose.
7Iai nimai iateia tasi fine nakamo taganea o alebaster kofonu o ane iamosia nomata sore su, ma neiregia aia ia tshana nouru, hepe aia neinofo ia takai.
8Kaia iai niana tagata aia nifakairo neicitia anera, acre nifakainina, nokoutucua, Tiaha aia iauiai anera?
9Ma anera iamosia, pe aia nifakamata keiamo nomata sore iateia, keitufwa acre niare ane jimra.
10Iai Iesu nikeiro anera, aia neitucage iacre, Tiaha acowa iauiai aroto o tafine? ma aia neimna vere erefia iatavau.
11Ma tagata niare ane kojimra nokonofo iacowa atou ma tou, kaia avau sekonofo iacowa atou ma tou.
12Ma aia neirigia anera iamosia tshaku notshino, aia neimna anera ia tshaku tanumea.
13Tamari avau koutucua iacowa, Wehe ia fanua iotshi afasao erefia tinei kakova i afanua, iai foci, ane nei ta fine nei neimna, katucua keimentua aia iai.
14¶ Nopogera iai tasi o ta twelv, nitapa neigo Jutas ta tane o fanua Kariot, nifana ia fatoriki o tafare mori.
15Aia neitucage iacre, Taha acowa ioria avau, ma avau kafakareresia aia iacowa? Acre neitucua mukei iateia ma therte nopito mune o selver.
16Ma wamuri tira aia neisara pe aia kafakaresia aia iacre.
17¶ Iai nopogera mokagi o tacripoga tsha bret leven jimra iai tagata aia nifakairo nimai ia Iesu, nokoutucua iateia, Wehe akoi acitiafakarafia pe acime keipenpena ma akoi keina ta paska?
18Aia neitucage, Roro ia tumrai sore ia tatane tira iai, koutucua iateia, Ta Teriki koutucua, Tshaku nopoge koitata; Avau kakeina ta paska ia tshou fare ia tshaku tagata avau fakairo.
19Niana tagata aia nifakairo neimna vere iateia hepe Iesu nifakairo iacre, ma acre neipenpena erefia ta paska.
20Iai ta fiafii nimai, aia neinofo ia ta twelv.
21Hepe acre nikeina, aia neitucage, Tamari avau koutucua iacowa, pe tasi o acowa kafakareresia avau.
22Ma acre iai arotorea nimy sore iateia, ma nikamata tasi ma sece o acre iotshi keitucua iateia, Teriki, aia avau mo?
23Aia nifasao neitucage, Aia kofua ia taganea iatavau, aia kafakareresia avau.
24Ta Nontariki o tagata nokofano hepe neisereace o aia; kaia Kowe ia tatane tira kafakareresia ta Nontariki o tagata! erefia ia tagata tira pe nana sefarere aia.
25Iai Jutas aia nifakareresia aia, nifasao neitucage, Teriki, aia avau mo? Aia neitucage iateia, Akoi nakatucua.
26¶ Hepe acre nikeina, Iesu niamo aofa nimori iateia, neitufwa niana tagata aia nifakairo, ma neitucage, Amo, keina; tinei tshaku notshino.
27Aia niamo taganea kup, nimori iateia, neitufwa iacre nokoutucua, Numea faru o aia acowa iotshi;
28Ma tinei tshaku toto o tafasao fou, aia korigia nomata o tagata nalupai, ma ioria amaganisa tshare.
29Kaia avau koutucua iacowa, Avau senumea foci o tavai tira nohua avaini, ia taha nopoge avau kanumea aia fau ia acowa ia tavaka o tshaku Tata.
30Wamuri acre nifeke tagoro tasi, acre niroro watafa ia ta ora Olivet.
31Iai Iesu neitucage iacre, Acowa iotshi arotowa kamy iatavau tupo nei; ma aia neisereace, Avau katshi tatane karafia ta sip, ma ta sip o fakatapuria kafura papai.
32Kaia wamuri avau kamasike foci, avau kafano mokagi acowa ia fanua Calili.
33Pitrus nifasao neitucage iateia, Pe arota o tagatotshi kamy ma kanatshicina akoi, avau senatshicina akoi.
34Iesu neitucage iateia, Tamari avau koutucua iatakoi, Pe tupo nei, mokagi ta moa koko, akoi kafeiva toru akoi puspusi avau.
35Pitrus neitucage iateia, Pe avau komate iatakoi, avau sekatucua avau puspusi akoi. Hepera foci ma acre iotshi aia nifakairo neitucua.
36¶ Tupora Iesu niarafia acre ia none neitapa neigo Cethsemene, ma neitucage ia niana tagata aia nifakairo, Nofo iraro acowa, icunei, tari avao fano mori ecora.
37Aia niarafia iateia Pitrus ma eruan tariki o Sebeteius, ma neikamata tshana roto keimy sore ma mafa ana.
38Iai aia neitucage iacratau, Tshaku nokano komy sore su, ia ta mate; tari acoutou icunei fatshigeia, iatavau.
39Aia nifano fakasisi foci iai, nito ia tshana foimata, nimori, nokoutucua, Alofa tshaku Tata, pe akoi acitiafakarafia erefia taganea kup tenei natshicina avau; kaia jimra hepe avau acitiafakarafia, kaia erefia hepe akoi acitiafakarafia.
40Aia nimai ia tagata aia nifakairo, neicitia acre nokomero iai, ma neitucage ia Pitrus, Taha acoutou kotaru fatshigeia iatavau tasi our.
41Fatshigeia ma mori, pe acoutou sefanomana ia ane isa; nokano tamari keicitiafakarafia, kaia ta notshino kotaru.
42Aia nifano foci fakarua, nimori iai, nokoutucua, Alofa tshaku Tata, pe taganea kup tenei senatshicina avau, kaia avau numea aia, erefia hepe akoi acitiafakarafia.
43Aia nimai neicitia acratou neimero foci; ma tshare foimata mafa keifeimero.
44Aia natshicina acratou, ma nifano foci, nimori fakatoru, nokoutucua afasaora foci.
45Iai aia nimai ia niana tagata aia nifakairo neitucage iacre, Mero palo acowa milou, ma amo tshowa kogapu; kowcitia, ta our koitata, ma ta Nontariki o tagata kofakareresia ia anorima o tagata isa.
46Masike erefia acitia nokororo kowcitia, aia koitata kofakareresia avau.
47¶ Iai hepe aia nifasaora, kowe, Jutas tasi o acre ta twelv, nimai, ma ia aia tagata nalupai su ia amatshira palo ma ia arakau, ia fatoriki o tafare mori ma fakau sore o tagata.
48Iai aia fakareresia aia neitucage iacre, nokoutucua, Aia avau kasogi, aia tamari, apurutshia aia mukei.
49Milowa aia nimai ia Iesu, neitucage, Alofa Teriki; ma neisogia aia.
50Iesu neitucage iateia, Neli, tiaha akoi komai? Iai acre niromai, ma nipurutshia Iesu, niarafia aia.
51Neicitia, tasi o acre ia Iesu nifakatonusia norima tshana, nitorotshia tshana tomatshira palo, ma neitshi tasi fitshicou o teriki o tafare mori, nisawace tshana nontariga.
52Iai Iesu neitucage iateia, Fakafecina tshou tomatshira palo ia tshana takato, ma acre iotshi kamo tomatshira palo, kasawace acre ia tomatshira palo.
53Kamentua akoi pe avau taru mori milou ia tshaku Tata, ma aia milowa katufwa avau twelv lijon o agelo ma faru foci?
54Kaia tiaha kamna ane neiseri ia tatapuria o Ihova, pe ane iotshi hepe nei tamari komai?
55I our tira Iesu neitucage ia tagata nifetacina iai, Tiaha acowa koromai hepe keipurutshia tagata tshigo ia tomatshira palo ma atokotoko keipurutshia avau? Avau neinofo iacowa nopoge ma nopoge nokofakairo acowa ia tafare sore o Ihova, ma acowa sepurutshia avau.
56Kaia ane iotshira nimai hepe neiseriace ia tatapuria o aprofita iateia. Iai acre iotshi tagata aia nifakairo natshicina aia, ma nifura.
57¶ Acre neipurutshia Iesu niarafia aia ia Kaiafas ta teriki o ta fare mori, iai fakau fakairo ma fakau sore nifetacina.
58Kaia Pitrus nifano wamuri aia papai ia tafare sore o teriki o ta fare mori, nifano efare, ma neinofo ia acre afitshicou, keicitia taha komai wamuri.
59Iai ta fatoriki o ta fare mori, fakau sore, ma iotshi fakau arapakau keifasao, neisara tagata korefu ia magane o Iesu, keitshi aia komate iateia;
60Kaia acre secitia mana tasi; keini, ma iai tagata korefu nalupai niromai keifasao, acre secitia mana tasi. Wamuri erua tagata korefu niromai.
61Neitucage, Ta tane tira neitucage, avau tomatua takaroiai ta fare sore o Atua, ma keimna tasi foci ia nopoge toru.
62Ta Teriki o tafare mori nimasike, neitucage iateia, Akoi sefasao mo? taha acre fasosa iatakoi?
63Kaia Iesu sefasao, Ma ta teriki o tafare mori nifasao neitucage iateia, Avau fakowia mukei akoi ia neigo o Atua mouri, pe akoi Koutucua acime, pe akoi ta Kristo, ta Nontariki o Atua.
64Iesu neitucage iateia, Akoi neitucage aia; ma avau koutucua iacowa, Wamuri nei acowa kacitia ta Nontariki o tagata nokonofo ia norima matau o tomatua, ma nokomai ia apa o taragi.
65Iai ta teriki o ta fare mori neifasia tshana miga, nokoutucua, Aia nakafasao isa ana ma tapu; tiaha acime fatshigeia faru foci afasao iateia? kowcitia, milou acowa nifakarogona tshana fasosa tapu.
66Taha acowa kamintua? Acre nifasao neitucage, Erefia kotshi aia komate iateia.
67Iai acre nisavari ia tshana foimata nitacritshia aia, ma faru foci niferpacia aia ia arimore.
68Nokoutucua, Fakairo acime, akoi Kristo, Akai aia neitshi akoi?
69¶ Iai Pitrus neinofo efuafo ia ta fare sore; ma tasi fine sisi nimai iateia nokoutucua, Akoi ma neinofo ia Iesu o Calili.
70Kaia aia nifeiva emoa acre iotshi, nokoutucua, Avau puspusi taha akoi koutucua.
71Iai wamuri aia nifano efuafo ia nopito fare efuafo tafeitoca, tasi foci fine sisi neicitia aia, ma neitucage iacre nokonofo iai, Tatane tenei ma neinofo ia Iesu o Nasareth.
72Foci aia nirefu ia tasi fasao tapu, Avau puspusi tatane.
73Nagimana iai niromai iateia acre tagata nikotu fakaliki, neitucage ia Pitrus, Tamari akoi ma tasi o acre; ma tshou afasao fakareresia akoi.
74Iai wamuri tira aia neikamata keifasosa tapu ma keifasosa isa tapu, nokoutucua, Avau puspusi tatane tira. Milowa ta moa nikoko.
75Pitrus iai nimentua ta fasao o Iesu, aia neitucage iateia, Mokagi ta moa koko, akoi kafeiva akoi puspusi avau fakatoru. Ma aia nifano efuafo neitagi sore iateia.
Currently Selected:
MATHIUS, NOPUKU AFASAO SORE, 26.: ANT
Highlight
Share
Compare
Copy
Want to have your highlights saved across all your devices? Sign up or sign in