Rommi 3
3
Alhou’w Pükhübekulu
1Tishiaye, Jewmi lakhi shi akeu lo kiu alá ani, momu aphighüyiko-küghá lo ameküa kiu ani kea? 2Alaghi jeli thowkha lo ameküapu kutomo ani! Kümtsü nguno atüghiu shi, Alhou no akükütsü sütsa pesü Jewmiqo pelo qhipüalu penike pichebetsü ke.
3Ike panongu khami no pükhübe müla kepu shive aye kishini kea? Panongu pükhübe kümla no Alhou’w pükhübekulu shipühaluve nani keshea? 4Khilemu tishimo thono! Timi jeli kümtsü no kimkimi shive namu Alhou ye kuchou shi anani. Kughengu ishi yèpüani:
“Tishianguno kughou nono atsa pìní keno no ye achipi kepi kimchilu peniye ke
eno kughou nono küghathabeni keno tokulu shilu peniye ke.”#3:4 Leshe 51:4
5Ikemu ningu chipiumikucho kumo no Alhou chipiumikucho alau mütsümishei pephelu aye, ningu ye kiu pìní kea? Alhou no pa loghu ningu shou süghi keu ye achipikumo ke ipini keshea? (Ni ye timi no kütsala chekeu ghola peitha ani.) 6Mütsüqhei no tishimoe! Tsalá tishiaghi aye, Alhou ye kíshi ayeghiqha shou küghathabe luni kea? 7Timi khami no ishi kütsala luvi, “I mikucho kumo no Alhou mikucho kighishelu eno tishi keu vechewo pa juküvü kighishelu aghí aye, ni ye kushiye axinemi lakhi kepi kiléqhive achephi kea?” 8Tishiaye kushiye, “Akivi ipeghilu penike ningu alhoküsa shinie,” ipimo kea? Timi khami no ningu thaigha ghi ningu no hikithipu pi acheni ipi nguku ke. Panongu kiléqhive keu ye achipie!
Timi Khumu Amikucho Kumoe
9Tishiaye ningu Jewmiqo ye kütami nguno akiviu ke ipi pìní keshea? Khilemu tishimoe! Kughengu ningu ye Jewmi ngò Jewkumomi kinikujo axiné küká qholo anike ipi ngukuvea ke. 10Kughengu ishi yèpüani:
“Amikuchomi lakhimu kühae, lakhimu kühae;
11vethakulumi lakhimu kühae;
Alhou phu chekemi lakhimu kühae.
12Timi kümtsü Alhou lau no kughosü wuvae,
panongu kümtsü ameküha keu shivae;
akivi shikemi timi lakhimu kühavae,
lakhimu kühae.”#3:12 Leshe 14:1-3; 53:1-3; Yetsa 7:20
13“Panongu kughoki ye akumoki lhaphe pepüa keqo toi ke;
panongu mili no pishikiqhi tsa pi cheni.”#3:13 Leshe 5:9
“Apighi tüghü no panongu milibo lo ani.”
14“Panongu kichí ye ghusho keu ngò kukhukimiji no chhitoi ke.”#3:14 Leshe 10:7
15“Timi pìthíve nikeu lo panongu pukhu ye müthüthei ke;
16shiküpüsa eno amloghuju no panongu laghi chhitoi ke,
17eno panongu ye külakishi laghi mtha ke.”#3:17 Isa 59:7-9
18“Panongu gizülo ye Alhou sükümsa ipikeu kühae.”#3:18 Leshe 36:1
19Ningu no ithi akeu no ayeza lo kiu-kiu pi püaghi namu tiye ayeza qholo akemiqo vilo piani, tishianguno timi no jekukivi shi chekeu kümtsü ghaküyiqüve no ayeghiqha kümtsü Alhou lau kihikülai tsüpe niye ke. 20Tighenguno ayeza lo shikupulu keu vechewo timi khumu Alhou zülo achipiu kepi shuphelu chemoe; tike kumo no ningu ye ayeza vechewo ningu xiné kümsülu chenie.
Aküpülü Vechewo Achipiumikucho
21Ikemu itehi ye ayeza nguno alau Alhou chipiumikucho pephe-piyevae, eno hipau lo Ayeza ngò tungkupumiqo no ashepe shipüani ke. 22Alhou chipiumikucho hipau ye Jisü Khristo pülü kemi kümtsü lau aküpülü akeu vechewo tsüpüani ke. Tighenguno Jewmi ngò Jewkumomi dolo kiumu kütüqü keu küha, 23kughengu timi kümtsü axiné shivae eno Alhou juküvü lau no putosüvae, 24ikemu Alhou no kümsá no küpükini Khristo Jisü vechewo xachilekulu ighi keu lono timi kümtsü achipikaluvae. 25Alhou no Khristo pesü aghakishi kümlagho lakhi shi ikhiphe pesü tsü, tiye pa jì pele keu vechewo—eno tiye aküpülü lono ikhilu peniye ke. Alhou no hipau shikeu ye itodolo pa chipiumikucho pephe-piye niye ke, kughengu paw küsüqhikulu lono timiqo no wove keu lo axiné shive keu aghime tsümove no juzüve tsüke. 26Pa no tishi keu vechewo achipiu shilu pe eno khunoqo no Jisü shou aküpülü ani keno panoqo pelo achipikalu peniye ke.
27Tishiaye tile qheza kepu kiu ani kea? Kiumu qheza akepu kühae. Kiu yeza ghenguno kea? Ayeza lo akümlà avehupu shi akeu no keshea? Moe, ayeza lo aküpülü avehupu shi akeu ghenguno ke. 28Kughengu ningu no ithi akeu no timi lakhi ye ayeza papelu keu lono kumo püzü aküpülü vechewo achipikalu cheni ke. 29Imaye Alhou ye Jewmi Lhou likhi keshea? Pa ye Jewkumomi Lhou ghí ke kumo keshea? Iyei, Jewkumomi Lhou ghí ke, 30kughengu Alhou lakhi likhi ani, pa no aküpülü vechewo aphighüyiko ghave kemi pelo achipikalu pe nani, eno aphighüyiko ghamo kemi pelo ghí tipau tho lono aküpülü vechewo achipikalu pe nani. 31Tishiaye ningu ye aküpülü hipau pesü ayeza shipühaveni keshea? Khilemu tishimo thono! Kuchou lo ningu ye aküpülü aghí anguno ayeza pekupulu chenie.
Currently Selected:
Rommi 3: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
