Rommi 2
2
Alhou’w Achipiumikucho Küghakütha
1Tighenguno nongu khunoqo no kütami shou küghathabe cheni keno nongu ye ajekukivi kiumu kühae, kughengu nongu no kiu-kiu kiqi ghenguno kütami shou küghathabe aghí namu, tiye nongu likhi nongu kiléqhive ani, kughengu khuno no kütami shou küghathabe cheni keno pano ghí kütami toi küsakügha kümlà shi cheni ke. 2Ningu no ithi akeu no Alhou’w küghakütha ye kuchou shou bepe no thime hikithipu shi chekemiqo shou küghathabe cheni. 3Tishiaye O nongu timiqo! Nongu küsakügha kümlà shi chekemi thotsü küsakügha kümlà shi chekemi kütami shou küghathabe cheni aye, nongu ye Alhou’w küghakütha lono pokajoluve nani küghashi kümsü ani keshea? 4Momu nongu ye Alhou’w küpüqhiyi keu hu kupukuno shi akeu ye nongu pelo amlo pebidelu pe nikeu ghenguno kepi vethamla no nongu ye paw küpüqhiyi keu, küsüqhikulu eno kheakulu thaigha cheni keshea?
5Ikemu nongu no kuthovi keu eno nongu mlo pebidemo keu ghenguno nongu ye Alhou loghu tsalà ghenguno nongu likhi nongu sala aghime pekike auvae, tiye Alhou no pa chipiumikucho küghakütha pephe-piye niye akeu tsalà ke. 6Alhou no, “timi lakhi-khi no kiu mülà püani keno tipau kiqi lono tsüchile nani.”#2:6 Leshe 62:12; Ahole 24:12 7Khunoqo no tamo no akümlà kivi shikeu lono ajuküvü, agigihu eno khilemu thivemo nikeu phu cheni keno, Alhou no lhokta küxü tsü nani. 8Ikemu khunoqo no alikhi asala phu cheni eno khunoqo no kuchou milive no küsakügha pape cheni keno, Alhou loghu eno aghakighide panongu shou anani. 9Tilehi küsakügha shi chekemi timi jeli kümtsü ghenguno aküküpüna eno aghime kitikhi anani: atüghishi Jewmi ghenguno, eno tithiu no Jewkumomi ghenguno anani; 10ikemu khunoqo no akivi kümlà shi cheni keno panongu ghenguno ajuküvü, agigihu eno alokiqi anani: atüghishi Jewmi ghenguno, eno tithiu no Jewkumomi ghenguno anani. 11Kughengu Alhou ye agikuju shichemo ke.
12Moses yeza küha kemi Jewkumomi khunoqo no axiné shini keno panongu no Moses yeza küha namu kütsave nani. Eno Jewmi khunoqo Moses yeza qholo ani keno axiné shikemi kümtsü shou ayeza tipau no küghathabe nani. 13Kughengu Alhou nhekithe lo ye ayeza ini kemiqo no achipiu shilu cheni ke kumoe, ikemu ayeza gholu kemiqo no achipiu mikuchomi kepi shukiphe shitsü cheni. 14(Kuchou lo ye, kughou Jewkumomi khunoqo ayeza küha kemu alhoaye lono ayeza lono shilo pikeu shini cheni keno panongu ye ayeza küha namu tino pano likhi pano ghenguno ayeza lakhi shive cheni. 15Panongu ye panongu mlo lo ayeza no avehupu shi akeqo yèpe qhipüa keu pìye cheni, panongu lolo kighithiqo ghí thopi shi cheni, eno khani lo ye panongu kükümsü no akipimí panoqo tsü cheni eno ado kütau lo ye pano süsho keu ghí shi cheni.) 16Hiye I no atsakiviu pikülha chekeu lono pive ketoi kughou Alhou no Jisü Khristo vechewo timiqow tuqhou shou küghathabe nike no tipau tsalà lono shi nani.
Jewmiqo eno Ayeza
17Nongu no nongu likhi nongu pesü Jewmi ipi ku cheni aye; eno nongu no ayeza shou pükhübe no Alhou sasü küthsükime akeu lo qheza cheni aye; 18nongu no pa pulou ithi eno ayeza vechewo nongu shikave keu ghenguno kiu no achipiu keno pulolu cheni aye; 19-20ayeza lo akighithi eno kuchou michikiphe akeu ghenguno nongu ye anhethi kighichemi ghenguno kiche-kipiyeu lakhi, àküzǘ lo akemi ghenguno aküvü lakhi, nikhanighamiw shikükau lakhi, itimiqow kükütsümi lakhi kepi nongu likhi nongu pütsaqhiluve cheni aye— 21Imaye, nongu kütami shika chekemiqo, nongu ye nongu likhi nongu shika chemo keshea? Nongu ye püka kevilo ipi kütsü cheni püzü nongu no püka cheni keshea? 22Nongu ye timi vilo shupu kevilo ipi cheni püzü nongu no shupu cheni keshea? Nongu ye ajulho mülá keu jupe aphimüqhü cheni püzü nongu no achineki lo akeu süxaluve cheni keshea? 23Nongu ye ayeza pükhü pe qheza acheni püzü nongu ye ayeza hebide keu lono Alhou thaigha cheni keshea? 24Kughengu ishi yèpüani: “Nongu Jewmi ghenguno Jewkumomiqo dolo no Alhou je pipütha cheni.”#2:24 Isa 52:5; Ezek 36:20, 22
25Nongu Jewmiqo no ayeza papelu aye aphighüyiko-küghá lo ameküa ani, ikemu nongu no ayeza hebide aye, nongu ye aphighüyiko ghamo kemi Jewkumomi toivea ke. 26Tishiaye, aphighüyiko ghamo kemi no ayeza no avehupu shi akeu papelu aghí aye, panongu ye aphighüyiko ghave kemi toi ikhilumo nani keshea? 27Nongu no akiyé yeza aghí eno aphighüyiko ghave aghí namu ayeza hekibidemi lakhi ke ghenguno Jewkumomi aphighüyiko ghamo namu ayeza gholu chekemi no nongu kiléqhive nani.
28Timi lakhi ye ashou ithukulu lo Jewmi ke ghenguno pa ye Jewmi ke kumoe, momu aphighüyiko-küghá ye ashou ithukulu eno aphi-ashi lo likhi ke kumoe. 29Ikemu, timi khuu no alolo no Jewmi keno pa ye Jewmi ke; eno akiyé yeza lo yèpüa keu vechewo kumo no Alhou Ghungu vechewo amlo kililu keu hu no aphighüyiko-küghá kuchou ke. Titoi kemi lakhi ye timi kütami lau no kumo püzü Alhou lau no akishé ithulu cheni.
Currently Selected:
Rommi 2: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
