ɛTomɛ 27
27
ɛBulus sa kɛ Lel ɛGyirigyi iNɛn Ɛ phɛɛs ne iRooma
1Kaa ne sɛ kɛ taal ibol lɛ wu njwi yaa roos ɛgyirigyi inɛn njwi phɛ ne ivel ne iTaliya de ne nang ɛBulus segha nɛ nidɛng ninaa nɛ nibhɛ so ne nyang ngge ndɔ ne iwɔ ɛdɛ ɛgbaang ɛndiinday nisooja wo ne bok ɛbhɛ ɛYuliyɔs ne ɛ so ɛndiinday ɛguu nisooja ɛGɔsitus. 2Njwi ne lel ɛgyirigyi inɛn ne ɛ kaa so ɛhaa ɛdɛ ɛgarang nga ne i bok ɛbhɛ ɛDiramitiyum, ɛgyirigyi gha kaa phɛɛs nigarang nga kang-ka-kang nɛ nibhɛ so ne ivel ne iSiya da; njwi ne tsa ihywel da, ɛRisitakus ne ɛ kaa so ɛnyi ne iTasɔlɔnika ne iphɛ so ne ivel ne iMakyidɔniya kaa ne sonɛ njwit. 3Ne cwiil ihwɛlɛ njwi ne tuu iSidɔn. ɛYuliyɔs sa ne mɔn ɛBulus segha iyɛnɛng, ɛ kaa tek ɛbhɛ ɛbhɛ yaang nitaay nibhɛ naas ɛbhɛ nikɔn na gbik ne ɛ sim ndɔ ne ihywel da. 4Ne sɛ njwi kɛ bo nikɔn ne iSidɔn de ndɔ ɛgyirigyi inɛn na igbil ne ring njwii ne hyel cik daa ɛli ne njwi kɛ nang ifɛ ɛyisɛ. Njwi ne hyeeme njwi bhɛ roos ɛtsim ne ikop ne iKuburus daa ɛli ne sɔng igbil lo kaa bok ihwet ɛnggyɛ wo nang. 5Ne sɛ njwi kɛ bere ɛling nga ne so cɛcɛk ne ɛgarang ne iSilisiya gbik ne iPamifiliya, njwi ne bhɛ hɔn ɛgarang ne iMira ne ɛ so ne ivel ne iLisiya. 6Ne iMira de ne ɛndiinday nisooja na ne bhɛ sɛ ɛdɛ ɛgyirigyi ne iMasad ta ne ɛ so ɛhaa ɛgarang ne ɛLɛzɛndariya ne ɛ phɛɛs ne ivel ne iTaliya, ne ɛ cwaak njwi nɛ.
7Njwi ne bo nituk ka da ɛco nituk, njwii hyel hywɛɛ, njwi ne kyangase nɛ njwi hɔn ɛgarang ne iKinidus. Ne sɛ igbil lo kɛ ring njwii ne re ɛnu ɛyisɛ, njwi ne hyereey njwi roos ɛlɔ gha ne ɛ sang igbil, ɛtsim ne ikop ne iKɛrɛt ne ɛ so cɛcɛk ne ɛSalamone. 8Njwi ne kyangase ne ihywel da njwi phee ɛlɔ yɛ njwi bhɛ hɔn ɛdɛ ɛlɔ gha ne i bok ɛbhɛ ɛLɔ nɛ Nigyirigyi iNɛn i Sɛ ne iPhɔrɔt ne ɛ so cɛcɛk ne ɛgarang ne iLasiya.
9Ɛlɛy njwi kɛ ku bees nten gbom, ihywel mos da ne yɛk ɛnik daa ɛli ne nten de kaa ku yek ghe kyakyak, ɛTuk ne iDira ne Hana ɛFɔt#27.9 ɛTuk ne iDira ne Hana ɛFɔt: niYahodawa na kaa re idira yɛdee nggyɛ wo ne iFɛl ɛNduwujɛng, hang ifɛl ɛnduwubɔ yɔɔ. Nten nɛdee nggyɛ wo, ɛgbaang ne igbil kaa ne i tel ɛzay nibhɛ gha ndɔ ɛling nga. kaa ku phee. ɛBulus sa ne kpɛng kɛ nibhɛ, 10Ɛ yɔngɔ, “Nindiinday nzi yaang ihywel lɛdaa wo so ɛnu ne izɛn gbom, yaa wɔs nikɔn na gbom, sɔng nikɔn ne ɛgyirigyi zɔng nang, yaa wɔs ikpen njwɛɛn.” 11Sɔng ɛndiinday nisooja na ne roos ibol ɛBulus de nang, ne ɛ roos idee ɛhaa ne hɔ ɛgyirigyi gha gbik ne ɛhaa ɛgyirigyi yɛwo. 12Sɔng iphɛ kaa ne jam mɛ nigyirigyi inɛn na shɛɛ ɛlɔ gha ne i bok ɛbhɛ ɛlɔ nɛ Nigyirigyi iNɛn i Sɛ ne iPhɔrɔt da ne ikos sang, nten nɛ kaa ne so nten ne ikos, iphɛ ɛlɛy iday ninyi de ne sim wu te re ɛnu ɛyisɛ ne ihywel da te yung yaang hang yaa bhɛ hɔn iFɔnis yɔɔ. iFɔnis de kaa so ɛdɛ ɛlɔ gha ne ikop ne iKɛrɛt nɛ nigyirigyi na i kyinasek ngɛ ne ikos de daa ɛli ne sɔng igbil i sonɛ nɛ ɛlɔ yɛ nang.
ɛGbaang ne iGbil ndɔ ɛLing
13Kɛ ne sɛ igbil ne iwap ɛkɔrɔk kɛ wuru ifɛ waase ninaa ɛgyirigyi inɛn na ne yaa wɛɛ tɛ nibhɛ kɛ ji sɛ ɛkɔn na nɛ nibhɛ kɛɛ ku sim, nibhɛ hɔwɔ igyɔs de ne ihywɛ wum ɛgyirigyi inɛn na ɛ kyinak ko nibhɛ cwaak ndɔ ɛgyirigyi gha, njwi ne ji roos ɛmbimbang ne ikop iKɛrɛt ta cɛcɛk ne ɛnu ɛling nga. 14Sɔng ne phyɔngɔle nang ɛdɛ ɛgbaang ne igbil ne wuru daa ne iwap ɛdak ifɛ yaaso ne ikop ne iKɛrɛt de. 15iGbil lo ne i bɛm ɛgyirigyi inɛn na ifɛ ring njwii ne ihywel da, ninaa ne hɔ ɛgyirigyi inɛn na ne kɔɔng nge tang tɔɔ tak iyɔm ne ihywel da nibhɛ tek igbil lo ku i tobhos ɛgyirigyi inɛn na. 16Ne sɛ njwi kɛ bhɛ hɔn ɛdɛ ɛkyikyop pa ne i bok ɛbhɛ iKawuda igbil lo ne tɛy, njwi ne ji kyangase nɛ njwi phɔt ɛgyirigyi ɛshɛɛrɛng nga ne ɛ so kɔrɔ ɛtsim ɛgyirigyi gha. 17Ne sɛ ninyi na kɛ leesel ɛgyirigyi ɛshɛɛrɛng nga ndɔ ɛgyirigyi gha, nibhɛ ne byinki ɛbhɛ ne ɛgyirigyi inɛn nibhɛ robhos ne irik wu ɛgyirigyi inɛn na yaa yung tɛɛ ye. ɛNik ne wum nibhɛ wu ɛgyirigyi inɛn na yaa yung bhɛ sɛm imumu ne ikop ne iSitiris ne ifɛ ku bees nigyirigyi na ne i sɛ nibhɛ kɛ sɛm mo. iPhɛ ɛlɛy, nibhɛ ne tɔmɔsek ɛzene gha ne ɛ phyik ɛgyirigyi gha ne ihywel da nibhɛ tek ɛgyirigyi gha. 18iGbil lo ne maa hante nɛ nisan, ifɛ ne re ɛnu ɛyisɛ ifɛ subhus njwii, ne cwiil ihwɛlɛ ninyi na ne yaa tang nikɔn na nɛ nibhɛ sonɛ ndɔ yɛwo nibhɛ han ndɔ ɛling nga. 19Ne sɛ ɛtuk ne itwat tɛ, nibhɛ tang nidɛng nikɔn ɛtomɛ ndɔ ɛgyirigyi inɛn na ne ibɔ nibhɛ nibhɛ han. 20Njwi ne bo nituk ka daa ɛco nituk, sɔng njwi kɛ yaang iroy nɛ niyuyɔrɔ nang. ɛGbaang ne igbil lo ne maa ku i tel, njwi ne tul irway mos wu hang njwi yaa tang phɔt te.
21Kɛ ne sɛ nibhɛ kɛ bo nituk ka gbom mo tang ɛnyi kɛ re ɛkɔn nang, ɛBulus sa ne yilitsik, ɛ kyinak ɛnu ɛyisɛ ninyi na, ne ɛ yɔngɔ, “Nisaa ɛn, sɛɛ yɔng ɛ kɛ sim ɛn ibol nge de ne nggɛ yɔng wu hang yilitsik ne ikop ne iKɛrɛt de, sɔng ɛ sɛɛ ne lel ndɔ ne nggbang ngɛdaa wo ne ihywel ɛnu ne izɛn nɛghaa wo nang. 22ɛLyilyɛghaa wo, nzi ne bok nyini tɛ ɛn irway nviit sɔng ɛdɛ mon yaa wɔs iken ɛbhɛ nang, ɛgyirigyi inɛn na zɔng ne yaa wɔs. 23Ne ɛtuk ɛdɛ ɛmalɛka ɛTaanggbey ya ne nzi mɔn ɛbhɛ ɛtomɛ, nzi ta re ɛbhɛ ntsong kɛ yɛɛs ɛlɔ nge. 24Ɛ kɛ ne yaak me, ‘ɛBulus, sɔng ɛ phok ɛnik kang, iphɛ so ngbingbing yaa bhɛ bol lɛ ɛshara gha ɛnu ɛyisɛ ɛKɛɛsat ta. Ndɔ ne izɛɛng ɛTaanggbey de aa ne phɔt ikpen ninyi da ne ɛ so ɛn ne ihywel da nɛ nibhɛ wo.’ 25iPhɛ ɛlɛy, nɛ te ɛn irway nviit, ninyi yɔɔy daa ɛli ne nggɛ nang ne itin nɛ ɛTaanggbey wu nikɔn nɛnaa wo yaa tes ɛli ne ɛmalɛka gha kɛ tɔng me wo. 26Gbik ne iphɛ ɛlɛy, igbil lo yaa ne bo ɛgyirigyi inɛn na ifɛ bhɛ sɛm ne imumu ne idɛ ikop be.”
27Njwi kaa ne hɔn nituk ɛnduwubɔ nɛ nibhɛ nwaas igbil lo kaan ne njwit ndɔ ɛLing ne iMɛditareniya gha. Ne sɛ ɛceree ɛtuk, ninaa ɛgyirigyi inɛn na ne yaa wɛɛ te njwii phɛɛs ne tuu ne ivel. 28Nibhɛ ne bo irwik nibhɛ phɔwɔ ne ikyukyum inɛn da, nibhɛ sɛ ikyukyum mɛ so nihyay ikɔl idaan ne nzuwubɔ ifaa. Ne sɛ njwi kɛ re ɛnu ɛyisɛ ncɛt nibhɛ ne ta phɔwɔ ikyukyum inɛn da dɔng, nibhɛ ne ji sɛ ikyukyum mɛ so nihyay nzuwubɔ ɛnduwujɛng. 29Ninaa ɛgyirigyi inɛn na ne wum ɛnik ɛlɔ ne aa yung bhɛ sɛme ne ikpɛɛ, nibhɛ ne bo igyɔs de ne ihywɛ wum ɛgyirigyi inɛn na ɛ kyinak ko ihywɛ nywaas nibhɛ cwaasek ndɔ inɛn da te ihywɛ ring ɛgyirigyi inɛn na ne hyel. Nibhɛ ne ji sit irwisɛ nibhɛ roro ne ɛTaanggbey wu te ihwɛlɛ wuru. 30Ninaa ne hɔ ɛgyirigyi inɛn na ne yaa tɔk tɛ nibhɛ yaa tel. Nibhɛ ne tɔmɔsek ɛgyirigyi ɛshɛɛrɛng nga ndɔ ɛling nga nibhɛ ne ji mɔn te sɛɛ yɔng nibhɛ yaa bo ɛdɛ ɛgbaang ne igyɔs so ne ihywɛ so righitik tɛ nibhɛ cwaak ndɔ ɛling nga daa ɛyisɛ ɛgbaang ɛgyirigyi inɛn na. 31ɛBulus sa ne yaak ɛndiinday nisooja gha gbik nɛ nisooja na, “Wu ninyi yɛnaa wo kɛ sang shɛɛ ndɔ ɛgyirigyi inɛn na aa ne kus ɛn.” 32Ne sɛ nisooja kɛ phok ɛlɛ wo, nibhɛ ne hyɛghɛ irik ge ne kɛ robhos ne ɛgyirigyi ɛshɛɛrɛng nga nibhɛ tek ɛbhɛ ɛ ho ndɔ inɛn da.
33Ne sɛ ɛlɔ yɛ yungaa teye ihwɛlɛ, ɛBulus sa ne yaa roro nɛ ninyi na wu tɛ ɛrɔngɔ cwaak ɛkɔn ɛnu. Ɛ boote ɛ yaak nibhɛ, “iZenge wo kɛ hɔn nituk ɛnduwubɔ nɛ nibhɛ nwaas ne ɛ so ɛn ɛbung ngɛghaa wo, sɔng ɛ kɛ re ɛn ɛkɔn nang. 34iPhɛ ɛlɛy nzi ne roro ne nyinɛn ɛlyilyɛghaa wo te ɛrɔngɔ cwaak ɛkɔn ɛnu, iphɛ yaa nang nyini ihwet. Sɔng ɛdɛ mon yaa wɔs itsotso ne ito ɛbhɛ ifɛ ijwaan nang.” 35Ne sɛ ɛBulus sa kɛ boote ɛlɛ wo, ne ɛ bo ibɛrɛdi ne ɛ tɔɔrek ɛTaanggbey ye irway ihwala ɛnu ɛyisɛ nibhɛ gbik, ɛ kpɛl ne ɛ tsa ɛ yaa re. 36iPhɛ ne te nibhɛ itsɔngɔl gɛgɛy nibhɛ ne ma ji re ire de. 37Ninyi na kaa so ninyi ikpɔl ifaa nɛ ninyi nzuwubɔ ɛniitaa nɛ nibhɛ ɛtaraa ndɔ ɛgyirigyi inɛn na. 38Ne sɛ nibhɛ kɛ re ire de nibhɛ kɛ sighisi en, nibhɛ ne tuul ɛlikama ndɔ ɛgyirigyi inɛn na nibhɛ cwaasek ndɔ ɛling nga tɛ nibhɛ tɛ ɛbhɛ ɛ te yaay.
ɛGyirigyi iNɛn na kɛ Nzɛɛng Nge
39Ne sɛ ihwɛlɛ kɛ wuru sɔng ninaa ne hɔ ɛgyirigyi inɛn na ne seng ɛlɔ gha nɛ nibhɛ sonɛ nang, nibhɛ ne yaang ɛdɛ ɛnu ne ɛling nga ne ɛ bok ne ivel. Nibhɛ ne i sim tɛ nibhɛ yaa phɛ ne ɛgyirigyi inɛn na ne ivel da wu nibhɛ yaa yɛɛ nɛ. 40Nibhɛ ne hyɛghɛ irik ge ne kɛ robhos igyɔs ne wumus ne ɛgyirigyi inɛn na nibhɛ teesek igyɔs sɛ ndɔ inɛn da, nibhɛ ta biisi irik ge ne kɛ robhos ne ɛkɔn ne hyeem ɛgyirigyi gha nten idaan nɛ. Nibhɛ ne ji yinɛ ɛzene ɛdaa ɛyisɛ gha ne ɛ phyik ɛgyirigyi inɛn na ne ihwel da, nibhɛ ne ji bo nikɔn nibhɛ phɛɛs ɛlɔ gha ne ivel da sonɛ wo. 41Ne sɛ njwi kɛ bhɛ tuu ɛdɛ ɛlɔ gha ne inɛn da kɛ sɛm me nɛ, ɛgyirigyi inɛn na ne kyiri imumu ɛyisɛ yɛ ne lel ne imumu da ɛli ne hame aa tang yɛɛ ne hyeete. ɛGyirigyi inɛn na ne ho ne nzɛɛng nge kɔrɔ ɛtsim daa ɛli ne igbugbung inɛn da kaa so gbom ifɛ ne yaa nzɛɛng ɛbhɛ. Ne sɛ njwi kɛ bhɛ tuu ɛdɛ ɛlɔ gha ne inɛn da kɛ sɛm me nɛ, ɛgyirigyi inɛn na ne kyiri imumu ɛyisɛ yɛ ne lel ne imumu da ɛli ne hame aa tang yɛɛ ne hyeete. ɛGyirigyi inɛn na ne ho ɛ nzɛɛng nge kɔrɔ ɛtsim daa ɛli ne igbugbung inɛn da kaa so gbom ifɛ ne yaa nzɛɛng ɛbhɛ.
42Nisooja na ne mɔn tɛ nibhɛ yaa phobho ninyi na nɛ nibhɛ so ne nyang ngge ɛlɔ nɛ nibhɛ yaa yung lok idan nibhɛ tel. 43ɛndiinday nisooja na ne i sim te ɛ sɛɛ phɔt ɛBulus segha, ne ɛ ring ngɛ. Ne ɛ yɛk ngɛ wu te gbik ninyi na nɛ nibhɛ yɛɛ ne lok idan tɛ tɔm ndɔ inɛn da nibhɛ lok idan de nibhɛ wuusi ɛling nga nibhɛ phɛ ne ivel. 44Tɛ ɛbyin nɛ nɛ nibhɛ doo ne idan de ne wumus ibap ne itson nɛ ɛbyin nikɔn na nɛ nibhɛ kɛɛ so ndɔ ɛgyirigyi inɛn na tɛ nibhɛ roos nibhɛ wuusi ndɔ ɛling nga nibhɛ phɛ ne ivel ncaang.
Currently Selected:
ɛTomɛ 27: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
