ɛTomɛ 28
28
ɛBulus sa So ne iKop ne iMalita
1Ne sɛ njwi kɛ wuusi ncaang, njwi ne ji seng wu bok ɛlɔ yɛ ikop ne iMalita. 2Ninyi ne ikop pɛnaa nggyɛ wo kaa ne tɔɔrek njwii iyɛnɛng gbom. Nibhɛ kaa say njwii ne ibɔ iphaa, nibhɛ murak njwii igboo njwi saa daa ɛli ne inɛn kaa reey ɛlɔ yɛ ne so ntsentseng. 3ɛBulus sa ne tumɛ itson, ne sɛ ɛɛ yaak ɛraa gha idɛ izɔ igywebhe de ne wuru ne ndɔ ne igboo wo ihywɛ sabhal ɛbhɛ ne iwɔ ihywɛ wum me nɛ laalaa. 4Ne sɛ ninaa ikop pɛnaa nggyɛ wo kɛ yaang izɔ de laalaa ne iwɔ ɛBulus so, nibhɛ ne yaa bol ndɔ nibhɛ, nibhɛ bo, “iPhɛ so nggbinggbing, ɛnyi yɛghaa wo so ɛhaa ne phobho ninyi, yaang ɛn ɛli ne ɛ kɛ jung wuru ndɔ inɛn da ɛken nɛ wo, gbik ne iphɛ ɛlɛy ibebhe ɛbhɛ de ne jung roos ɛbhɛ sɔng aa ne shɛɛ ɛken nang.” 5ɛBulus sa ne te izɔ de rarak ndɔ ne igboo wo sɔng ɛ kɛ phok ikpom nang. 6Ninyi na kaa wɛɛ te aa wara, hang aa shii ho ɛ ku yɔɔ, ne sɛ nibhɛ kɛ yaang kɛ shɛɛ gbom sɔng ɛkɔn kɛ te ne ɛbhɛ nang, nibhɛ ne hyere icwas nibhɛ da, nibhɛ ne yɔngɔ, wu ɛ so ɛdɛ ɛTaanggbey ya.
7Cɛcɛk ɛnggyɛ wo nidɛng nihyɛl la kaa sonɛ nɛ nibhɛ so ninaa ɛndiinday ne ikop pɛghaa nggyɛ wo ne kaa bok ɛbhɛ ɛFupiliyas. Ɛbhɛ kaa ne say njwii ɛ nang njwii ɛlɔ ne ra njwi shɛɛ nɛ nituk itwat. 8ɛKyɛɛ ɛbhɛ kaa ne so shwa, ɛ kɛ tɛlɛng ɛ ta i hyis ɛtini. ɛBulus sa ne lel ɛlɔ ɛbhɛ te ɛbhɛ boote ne ɛTaanggbey da ne ito ɛbhɛ. ɛBulus ne boote ne ɛTaanggbey ya ɛ bo iwɔ ɛbhɛ ɛ tek ɛbhɛ nɛ daa ne ito ɛnyi gha ne ɛ te ɛken. 9Ne sɛ ɛkɔn nɛghaa wo kɛ te wo, gbik ninaa ne shwa ne ikop pɛdee nggyɛ wo ne ku i yɛɛset ne i tes nibhɛ niken. 10Nibhɛ ne naas njwii nikɔn na ihywee-ihywee. Ne sɛ njwi aa bo nikɔn njwi lel ɛgyirigyi inɛn na, nibhɛ ne tumɛ njwii nikɔn na gbik ne njwi sim.
ɛBulus sa kɛ bhɛ Tuu iRooma De
11ɛTsim ne iphɛl itat njwi ne bo nikɔn ndɔ ɛgyirigyi inɛn na ne ɛ so ɛhaa ne ɛLɛzɛndariya ne ɛ kɛ re ikos ne ikop pɛdee nggyɛ wo. Kɛ ryɔng ɛbhɛ tɛ nidɛng nitaanggbey ifaa ne i bok ɛdɛng ɛKasito ne yaak ɛdɛng ɛPɔlus.
12Ne sɛ njwi kɛ bhɛ tuu ɛgarang ne iSirakus ne ɛ so ne ikop ne iSisili, njwi ne ra ɛnggyɛ wo nituk itwat. 13Njwi ne bo nikɔn ɛnggyɛ wo njwi bhɛ tuu iRigiyum ne iphɛ so ne ivel ne iTaliya. Ne cwiil ihwɛlɛ yɛ igbil ɛkɔrɔk ne wuru, ne ta cwiil ne ihwak ihwɛlɛ njwi ne bhɛ tuu iPutiyɔli. 14ɛNggyɛ wo njwi ne sɛ nidɛng ninaa ne roos sa, nibhɛ ne roo njwii njwi ne shɛɛ nɛ nibhɛ nituk ɛniitaa. Njwi ne le ɛnggyɛ wo njwi bhɛ tuu iRooma de. 15Ne sɛ ninaa ne roos ne iRooma na kɛ phok wu njwi yaaso wo nibhɛ ne yɛɛs nibhɛ hɔn ɛTungga ne iFiyus ne ɛdɛ ɛlɔ gha ne i bok ɛbhɛ Nilɔ iTwat ne Say Ninyi tɛ nibhɛ say njwii. Ne sɛ ɛBulus sa kɛ yaang nibhɛ wo ne ɛ tɔɔrek ɛTaanggbey ye irway ihwala ne ɛ ta hante ne sɛ irway nviit.
16Ne sɛ njwi kɛ lel ne iRooma de, ne sim ɛBulus segha nɛ ɛbhɛ shɛɛ ne ijwee ne i tal ijam i shɛɛ nɛ ne ɛsooja gha ne ɛɛ hyep ɛbhɛ wo.
ɛBulus sa kɛ Sanga iBol ɛTaanggbey ne iRooma
17Ne sɛ nituk itwat kɛ phee, ɛBulus sa ne yel-le nindiinday niYahodawa na. Nibhɛ ne tumɛy, ne ɛ yaak nibhɛ, “Nigwaa nge nzi yɛɛ sɔng nggɛ mɔn ninyi njwɛɛn na ɛkɔn ɛkpɛɛ nang, sɔng nggɛ ne ta bees ikpii nikyɛɛ-nikyɛɛ njwɛɛn da nang. Gbik ne iphɛ ɛlɛy kɛ ne jung wum me ne iYɛrushɛlɛm i rop me ne nyang i ji nang me nɛ ninyi ne iRooma. 18Ninyi ne iRooma ma kɛ ne phɛl me nibhɛ ne i sim tɛ nibhɛ yaa tek me, daa ɛli ne sɔng kɛ sɛ me ne iben ne iphɛ kɛ hɔn sɛɛ phoo me nang. 19Kɛ ne sɛ niYahodawa na kɛ mbaray, iphɛ ne te me nggbinggbing n yinɛ ɛshara nge gha n yɛɛs nɛ ɛnu ɛyisɛ ɛKɛɛsat, sɔng iphɛ ne so te nggɛ bungka ikun ninyi njwɛɛn de nang.#28.19 Ta yɛɛn: ɛTom 25.11. 20iPhɛ phɛ kɛ ne te nggɛ tɔk te naa yaang nyini wu, te ne n da boote ne nyinɛn daa ne ibol ne ɛnyi de nɛ niSɛrɛla na kɛ yɛk ne irway da nibhɛ hyep po, ibol ɛKiriti de. Daa ne ibol ɛbhɛ de ne kɛ rop me ne nyang ngɛdee wo.”
21Nibhɛ ne yaak ɛbhɛ, “Njwit to, sɔng njwi kɛ sɛ ɛdɛ ɛwee wo ne ɛbhɛ le ne iYahudiya de daa ne ito mo nang, sɔng ɛdɛ ɛgwaa njwɛɛn na kɛ ne yɛɛs ɛbɛ wo daa ne ibol mo nang, sɔng ɛdɛng kɛ ne yɛɛs ɛ mɔng idɛ ibol ikpɛɛ de daa ne ito mo nang. 22Gbik ne iphɛ ɛlɛy, njwii ne sim njwi aa phok, ɛnu mo, ɛkɔn na ne icwas mo i bo, daa ɛli ne njwi yɛɛ ninyi na nilɔ na kang-ka-kang kɛ bol ivol ne ifɛ kɛ mbaray ibol ɛguu ɛnyi ne tɔng ivol ifas sɛdaa wo.”
23Nibhɛ ne yɛk ne ɛtuk nɛ nibhɛ sɛ sɛm me nɛ, ninyi na gbom ne yɛɛset ɛlɔ gha ne ɛBulus sa kɛ tek nɛ nikɔn na, ɛBulus sa ne i kpɛl nibhɛ ivol ne igbɔm ɛTaanggbey da gbik. Ɛ kaa ne tsa ne ihwɛlɛ ne ɛ phyii bhɛ hɔn irwirywɛ ɛ kpɛl nibhɛ ivol da ɛ kyangase nɛ tɛ nibhɛ hyereey nibhɛ nang ne itin nɛ ne ɛYɛso gha lenɛ ne ɛShara ɛMuusaa gha gbik ne ibol ne iwee ninabawa na. 24Nidɛng ne sim ɛkɔn na ne ɛ kɛ tɔng ngo, nidɛng ne mbaray tang nang ne itin nɛ. 25iPhɛ ɛlɛy, nibhɛ ne yaa re en ne ishamas ndɔ nibhɛ. nibhɛ ne hosop en nibhɛ hyilis en. ɛTsim mɛ ne ɛBulus sa kɛ mɔng nibhɛ ibol idaan ɛ yɔngɔ, “iBol de ne iKabyik ɛTaanggbey de kaa boote nɛ nikyɛɛ-nikyɛɛ njwɛɛn na so itin nɛ. iBol de ne ɛnɛbi ɛShaa gha kaa boote ɛ yɔngɔ,
26‘Cwi ɛlɔ ninyi yɛnaa wo
te ɛ yaak nibhɛ,
ˆAa tenes ɛn,
sɔng ne ˆɛ seng ɛn nang.
ˆAa ne i wɛɛ ɛn,
sɔng ne ˆɛ yaang ɛn nang.
27Daa ɛli ne irway ninyi
yɛdaa wo kɛ te gɛgɛy.
Nibhɛ kɛ gangat itoro nibhɛ,
nibhɛ kɛ ne ta cwamas irwisɛ.
Tɛ nibhɛ sang yaang,
nibhɛ sang ta phok,
nibhɛ seng, nibhɛ hyereey
ɛlɔ nge gha te n tes nibhɛ niken.’ ”#28.27 Ta yɛɛn: ɛSh 6.9-10.
28“iPhɛ ɛlɛy nzi ne sim te ɛ sɛ seng ɛn, ɛTaanggbey ya kɛ tom ninyi na ne hame nibhɛ so niYahodawa ne ibol ne iphɔrɔt de, nibhɛ yaa ne tenes.”#28.28 iDɛ iWee ne ile da kaa bok iken 29 ɛlɛ: Ne sɛ ɛ kɛ boote ɛlɛ wo, niYahodawa na nɛ nibhɛ so ɛnggyɛ wo ne ho ne ishamas ndɔ nibhɛ.
30ɛBulus sa ne shɛɛ ne ijwee wo ne ɛ sonɛ wo ɛ hɔn ishay iphaa, ɛɛ saasel gbik ninyi na nɛ nibhɛ kɛ yɛɛs ɛlɔ ɛbhɛ gha. 31Sɔng kaa ne i ring ɛbhɛ ne sanga ibol ɛTaanggbey de nang, iphɛ ɛlɛy ne ɛɛ sanga ibol ne igbɔm ɛTaanggbey da, ɛ mɛmɛ ninyi na ne ibol ɛDaray ɛYɛso ɛKiriti de wɛlɛng ɛnik.
Currently Selected:
ɛTomɛ 28: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
