SOFONI 3
3
Tupuaga o te tauteai o Selusalemi
1Malaia ki te kolo agatuu mo fakalialia,
Ki te kolo ae kua fonu i te u tagata agamalohi!
2E mole pe logo ia ia ki he leo,
E mole pe ina tali he valoki,
E mole falala ia ia ki te Eteleno,
E mole fakaovi ia ia ki tona Atua.
3Ko ona pule i lotomalie o ia e hage ko ni laione kaikai;
Ko ona tui fakamaau ko ni lupo o te afiafi ae e mole ina fakatoe he mea ki te uhu.
4E matasoka mo kaka ona polofeta;
E maumaui e ana tagata faisakilifisio te u mea tapu mo te lao.
5Kae e faitotonu te Eteleno i lotomalie o ia,
E mole ina fai he mea e kovi;
I te uhu fuli e ina fakaha ki te malama ana fakamaauaga,
Pea e mole toe faihala ia ia i te mea aia;
Kae ko ae e agakovi e mole ina iloi te ufiufi.
6Nee au pulihi ni puleaga; kua maumau onatou tule;
Nee au maumaui onatou ala, e mole he tahi kei fakalaka i ai!
Kua maumau onatou kolo, e mole kei mau he tagata, e mole kei mau he tahi ke nofo i ai!
7Nee au ui: Kapau pe nee ke fia fakaapaapa kia au,
O tokaga ki taku fakatotonu,
E mole maumaui anai tou nofoaga,
Pea e mole hoko anai te u tautea fuli ae nee au fakatuutuu kia koe!
Kae nee natou fakavilivili o ulihi anatou gaue.
8Koia e ui ai e te Eteleno: Koutou talitali mai la kia au!
I te aho ae e au tuu ake ai anai o tanaki te koloa o te tau,
Koteuhi kua au fakapapau ke fakatahi te atu puleaga,
Ke fakatahi te atu puleaga hau,
O tupu ke au liligi kia natou toku hauhau,
Te mamafa katoa o toku ita;
Koteuhi e tutu anai te fenua katoa e te afi o toku finenonofo.
Tapuakina o te temi ki amuli
9I te aho aia, e au foaki anai ki te hahai ni laugutu maa,
O tupu ke natou fetapa fuli ki te huafa o te Eteleno,
Pea ke natou tauhi kia ia i he loto e tahi.
10Mai ae atu faahi o te u vaitafe o Etiopia,
E aumai anai e taku kau atolasio, taku kau mavetevete, ni molaga kia au.
11I te aho aia, e mole ke toe ufiufi anai ki au gaue fuli
Ae nee ke agahala ai kia au;
Koteuhi e au too anai i lotomalie o ou natou ae nee malo i te fiamealahi,
Pea e mole ke toe fiamealahi anai i toku mouga maonioni.
12E au tuku anai i lotomalie o ou he hahai agamalu mo masiva,
Ae e mau anai tona nonoaga i te huafa o te Eteleno.
13E mole toe fai anai e te toega o Iselaele he agakovi,
E mole natou toe fai anai he loi,
Pea e mole toe mau anai i tonatou gutu he alelo kaka;
Kae e natou kai anai, e natou malolo anai, pea e mole toe fakakovi anai he tahi kia natou.
14Taahine o Sione, ke ke kalaga fakafiafia!
Iselaele, ke ke fakamapa ni kalaga nekenekea!
Taahine o Selusalemi, fakafiafia i tou loto katoa!
15Kua fakamafuli kehe e te Eteleno ou tautea,
Kua ina fakamamao tou fili.
E nofo te hau o Iselaele, te Eteleno, i lotomalie o ou;
E mole ke toe mau anai he malaia.
16I te aho aia, e ui anai i Selusalemi:
Aua naa ke mataku ki he mea!
Sione, aua naa fakagaegae ou nima!
17E nofo te Eteleno, tou Atua i lotomalie o ou, o hage ko he tagata toa ae e ina fakamauli ia koe;
E mau anai tona fiafia lahi ia koe;
E fakalologo anai ia ia i tona ofa;
E hiva fakafiafia anai ia ia kia koe.
18E au fakatahii anai natou ae e loto mamahi, o mamao i te u aho lalahi,
Natou ae nee mavae mai tou fatu,
Natou ae e mafasia i te ufiufi.
19Koeni, i te aho aia, e au gaue anai kia natou ae nee natou fakamamahii ia koe;
E au haofaki anai te kau ketu, pea e au fakatalitali anai natou ae nee kapu,
E au fakaliliu anai natou ko he tupuaga o te fakavikiviki mo te fakakololia
I te u fenua fuli ae nee natou ufiufi ai.
20I te aho aia, e au toe aumai anai koutou;
I te aho aia, e au fakatahii anai koutou;
Koteuhi e au fakaliliu anai koutou ko he tupuaga o te fakavikiviki mo te kololia
I te lotolotoga o te u hahai fuli o te kele,
Moka au toe aumai anai takotou kau popula i mua o okotou mata,
E ui e te Eteleno.
Currently Selected:
SOFONI 3: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
