AKESEO 1
1
Fakamalohii o te hahai ke toe lagai te fale tapu
1I te lua tau o te hau ko Taliusi, i te uluaki aho o te mahina ono, nee tuku leva te folafola a te Eteleno ki te polofeta ko Akeseo, kia Solopapele, foha o Saletiele, kovana o Suta, kia Sosue, foha o Sotesatake, tagata faisakilifisio lahi, i te u kupu aeni:
2E folafola te Eteleno o te atu fua tau: E ui e te hahai aeni: E heeki hoko mai te temi, te temi ke toe laga ai te fale o te Eteleno.
3Koia nee tuku ai te folafola a te Eteleno kia natou ia Akeseo, te polofeta, i te u kupu aeni:
4Pe ko te temi aeni ke koutou nonofo ai i okotou fale aofi papa,
Kae kua maumau te fale aeni?
5Koia e folafola ai i te aho nei te Eteleno o te atu fua tau, o ui:
Koutou fakakaukau ki okotou ala!
6Kua lahi takotou nunusi, kae siisii takotou utu,
E koutou kai, kae e mole kotou makona,
E kotou inu, kae e mole kotou malie,
E koutou kofu, kae e mole kotou mafana,
Ko te totogi o ae e gaue paaga,
E to ki he taga pu.
7Koia e folafola ai te Eteleno o te atu fua tau:
Kotou fakakaukau lelei ki okotou ala!
8Kotou hahake ki te mouga, kotou aumai ni akau,
Pea kotou laga te fale:
E au mau anai i ai toku fiafia, pea e au kololia ai anai,
E folafola te Eteleno.
9Nee kotou amanaki ki he mea lahi,
Kae koeni e kotou mau he kii mea siisii pe;
Nee kotou fakaulu ia ia ki okotou fale, kae nee au puhii ia ia.
Kotea tona tupuaga? E ui e te Eteleno o te atu fua tau.
O tupu ko toku fale, ae kua maumau,
Kae kua kotou tahi feohoaki ki tona fale.
10Koia kua fakafisi ai e te atu lagi tona hahau kia koutou,
Pea kua taofi ai e te kele ona fua.
11Nee au aumai te tai laa ki te fenua, ki te u mouga,
Ki te fulumeto, ki te vino, ki te lolo,
Ki te u mea fuli ae e feala ke mau mai te kele,
Ki te tagata mo te u manu,
Pea ki te u gaueaga fuli o te u nima.
12Ko Solopapele, foha o Saletiele, mo Sosue foha o Sotesatake, te tagata faisakilifisio lahi, pea mo te toega fuli o te hahai, nee natou logo leva ki te leo o te Eteleno, tonatou Atua, pea mo te u folafola a Akeseo, te polofeta, o mulimuli ki te fekau ae nee tuku kia ia e te Eteleno, tonatou Atua. Pea nee mau leva e te hahai he mataku ki te Eteleno. 13Nee ui leva e Akeseo, te tagata faifekau a te Eteleno, ki te hahai, o mulimuli ki te fakatotonu a te Eteleno: E ui e te Eteleno: E au nofo mo koutou.
14Nee fafagu leva e te Eteleno te laumalie o Solopapele, foha o Saletiele, kovana o Suta, pea mo te laumalie o Sosue, foha o Sotesatake, te tagata faisakilifisio lahi, pea mo te laumalie o te toega katoa o te hahai. Nee natou omai leva, pea nee natou kamata leva te gaue i te fale o te Eteleno o te atu fua tau, tonatou Atua, 15i te aho uafulu ma fa o te mahina ono, i te lua tau o te hau ko Taliusi.
Currently Selected:
AKESEO 1: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
