SAKALIA 9
9
Maumaui o fili o Iselaele; hau o te Mesia
1Folafola kikite, folafola a te Eteleno ki te fenua o Atalake;
E kaku foki tana folafola ki Tamaso,
Koteuhi e tuku e te Eteleno ona mata ki te tagata fuli
O hage ko tana sio ki te u faahiga fuli o Iselaele;
2E tuu foki ia ia i Hamate, i te tuakoi mo Tamaso,
I Tile mo Sitone, logo ai tona poto lahi.
3Kua fakatuu e Tile he kolo tau kia ia;
Kua ina tanaki te paaga o hage ko te efu,
Pea mo te aulo o hage ko te pela o te ala.
4Koeni, e too anai ia ia e te Aliki,
E ina si anai tona malohi ki te tai,
Pea e tutu anai ia ia e te afi.
5E sio anai ki ai ia Asekaloni, pea e mataku anai ia ia.
Pea mo Kasa foki, e too anai ia ia e he mataku lahi;
Pea mo Ekeloni foki, koteuhi e puli anai tana amanaki lelei.
E puli anai te hau i Kasa,
Pea e mole toe nofoi anai ia Asekaloni.
6E nofo anai te matapule i Asetoti,
Pea e au taai anai ki lalo te fiamealahi o te kau Filisitini.
7E au too anai te toto i tona gutu,
Pea mo te u mea fakalialia i ona nifo;
E kau anai mo ia foki ki totatou Atua,
Pea e hage anai ia ia ko he pule i Suta,
Pea e hage anai Ekeloni ko te kau Sepusi.
8E au nofo anai o takatakai toku fale o puipui ia ia ki he solia,
Maia natou ae e olo pea omai,
Pea e mole toe fakalaka anai te tagata fakakovikovi ia tafa o taku hahai;
Koteuhi i te temi nei e sio mau oku mata kia ia.
9Ke ke nekenekea, taahine o Sione!
Ke ke fai ni kalaga fakafiafia, taahine o Selusalemi!
Koeni, e hau tou hau kia koe.
E faitotonu ia ia mo malo,
E agamalu ia ia pea e heka ia ia i he asino,
I he asino, te uhi o he asino fafine.
10E au maumaui anai te u saliote o Efalaimi, pea mo te u hosi o Selusalemi;
Pea e too anai te u nahau tau.
E ina fakaha anai te tokalelei ki te atu puleaga,
Pea e pule anai ia ia mai te tai ki te tai,
Mai te vaitafe o kaku ki te potupotu o te kele.
11Kae kia koe, o tupu ko tau hai nee fakamooni aki te toto,
E au fakamavae anai tau kau popula i te luo ae e mole mau ai he vai.
12Koutou toe liliu ki te kolo malohi, kau popula kua fonu i te amanaki lelei!
I te aho nei foki e au fakaha mooni,
E au toe foaki anai kia koe o liuga lua.
13Koteuhi e au fakamakona anai ia Suta o hage ko he kalolo,
E au fai anai ki Efalaimi taku nahau,
Pea e au lagai anai au fanau, oi Sione,
Ki au fanau, oi Savani!
E au fakaliliu anai ia koe o hage ko te heleta a he tagata toa.
14E ha anai te Eteleno i oluga o natou,
Kae e makamu anai tana kaui nahau o hage ko te hila.
E pupuhi anai e te Aliki, te Eteleno, te fakatagi pupuhi,
E hau anai ia ia i te ahiohio o te potu saute.
15E puipui anai natou e te Eteleno o te atu fua tau;
E natou kai anai, e natou malo anai i te u maka o te makamaka;
E natou inu anai, e natou logoaa anai o hage ko ni mea kua konana i te vino;
E natou fonu anai o hage ko he ipu, o hage ko te u tuliki o te aletale.
16E fakamauli anai natou e te Eteleno, tonatou Atua i te aho aia,
O hage ko te faga manu o tana hahai;
Koteuhi ko natou ko ni maka mauhiga o he kolona fakahau,
Ae e gigila anai i tona fenua.
17Io! Kua lahi osi tona manuia! Kua lahi osi tona matalelei!
E tupu lalahi anai te tamaliki tupulaga i te fulumeto,
Pea mo te u taahine tupulaga i te vino.
Currently Selected:
SAKALIA 9: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
