SAKALIA 10
10
E fakamalohii anai ia Suta mo Efalaimi
1Koutou kole ki te Eteleno te ua, te ua o te temi mafana!
E fakatupu anai e te Eteleno ni hila,
Pea e ina tuku atu anai kia koutou he ua lahi.
E ina foaki anai ki te tagata taki toko tahi ni luna i tana gaueaga.
2Koteuhi e noa te u palalau a te u telafimi,
E fakaha ni loi e natou ae e kikite,
E loi te u moemisi pea e mole he uhiga o anatou fakafimalie.
Koia kua hehe ai te hahai o hage ko he faga manu,
Kua natou malaia koteuhi e mole kei mau he tagata tauhi manu.
3Kua ulo toku hauhau ki te kau tauhi manu,
Pea e au tauteai anai te u ovi tagata;
Koteuhi kua ahiahi te Eteleno o te atu fua tau ki tana faga manu, te fale o Suta,
Pea kua ina fakaliliu ia ia ko tana hosi fakakololia i te tau;
4E ulu anai maia ia te maka agele, maia ia te fao, maia ia te nahau tau,
E ulu anai maia ia te u pule tau fuli, fakatahi.
5E natou hage anai ko ni kau toa i te tau o malamalaki natou ae e tau kia natou o hage ko te efu o te ala.
E natou tau anai, koteuhi e nofo anai te Eteleno mo natou;
Kae e fonu anai i te ufiufi natou ae e heheka i ni hosi.
Fakatahi a Iselaele
6E au fakamalohii anai te fale o Suta,
Pea e au haofaki anai te fale o Sosefo;
E au toe aumai anai natou, koteuhi e au ofa anai kia natou,
Pea e natou hage anai ko ni ihi ae nee mole au siaki;
Koteuhi ko au ko te Eteleno, tonatou Atua, pea e au tali anai natou.
7E hage anai ia Efalaimi ko he tagata toa;
E mau anai e tonatou loto te fiafia ae e tuku e te vino;
E sisio anai ki ai onatou foha pea e natou fiafia lahi anai,
E fakavikiviki anai onatou loto ki te Eteleno.
8E au vekai anai natou pea e au fakatahii anai natou,
Koteuhi e au totogi natou, pea e natou liuliuga anai o hage ko te temi mua.
9E au veteki anai natou i te atu puleaga,
Pea e natou manatui anai au i mamao.
E natou mauli anai mo anatou fanau, pea e natou toe liliu mai anai.
10E au aumai anai natou mai te fenua o Esipito,
Pea e au fakatahii anai natou mai Asilia;
E au aumai anai natou ki te fenua o Kalaate pea mo te fenua o Lipane,
Pea e mole feauga anai te fenua kia natou.
11E natou fakalaka anai i te tai o te mamahi, e natou taai anai te u galu o te tai,
Pea e moamoa anai te u takele fuli o te u vaitafe.
E taai anai ki lalo te fiamealahi o Asilia,
Pea e puli anai te tokotoko fakahau o Esipito.
12E au fakamalohii anai natou i te Eteleno,
Pea e natou haele anai i tona huafa,
E folafola te Eteleno.
Currently Selected:
SAKALIA 10: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
