SAKALIA 14
14
Toe liliu o te Aliki ki te kele o aumai te fakamauli
1Koeni, kua hau te aho o te Eteleno,
Pea e vahe anai ou koloa i lotomalie o ou.
2E au fakatahii anai te atu puleaga fuli ke natou ohofi ia Selusalemi.
E too anai te kolo, e kaihaa anai te u fale, pea e fakamalohii anai te u fafine.
E olo anai te vaelua o te kolo ki te popula.
Kae e feala anai ke nofo te toega o te hahai i te kolo.
3E ha anai te Eteleno, pea e ina taui anai te u puleaga aena,
O hage ko tana tau i te aho o te hokoga.
4E tuu anai ona vae i te aho aia ki te mouga o Oliveto,
Ae e hagahaga ki Selusalemi, i te potu esite.
E mafaa anai te mouga o Oliveto i lotomalie, mai te potu esite ki te potu uesite,
Pea e tuu anai he vaevaeliua lahi i ai:
E holomuli anai he tahi vaelua o te mouga ki te potu noleto,
Pea ko he tahi vaelua ki te potu saute.
5E koutou feholaki anai i te vaevaeliua o oku mouga,
Koteuhi e alu anai te vaevaeliua o te u mouga o kaku ki Ateseli;
E koutou feholaki anai o hage ko takotou feholaki i mua o te mafuike,
I te temi o Osiasi, hau o Suta.
Pea e hau anai te Eteleno, toku Atua, mo ana kau sagato fuli.
6I te aho aia, e mole i ai anai he malama;
E i ai anai he momoko lahi mo he aisi.
7E toko tahi anai te aho aia, pea e iloi ia ia e te Eteleno toko tahi,
E mole aho anai ia ia pee pouli.
Kae e ha anai te malama i te afiafi.
8I te aho aia, e tafe anai ni vai mauli mai Selusalemi,
Pea e tafe anai te tahi vaelua ki te tai o te potu esite,
Pea ko te tahi vaelua ki te tai o te potu uesite;
E tatau anai i te temi vevela mo te temi momoko.
9E hau anai te Eteleno i te kele katoa.
I te aho aia, e toko tahi anai te Eteleno,
Pea e toko tahi anai tona huafa.
10E liliu anai te fenua katoa o hage ko te fenua tokalelei, mai Kepa o kaku ki Limoni
I te potu saute o Selusalemi;
Pea e malaga anai ia Selusalemi ki oluga pea e tuu anai ia ia i tona tuuaga,
Mai te matapa o Pesamino o kaku ki te uluaki matapa,
O kaku ki te matapa o te u agele,
Pea mai te tule o Ananeele o kaku ki te u tatauaga vino o te hau.
11E nofo anai i te kolo, pea e mole toe i ai anai he malaia.
E fimalie anai ia Selusalemi.
12Koeni te malaia ae e taai anai ki ai e te Eteleno te hahai fuli
Ae nee tau leva ki Selusalemi.
E pala anai onatou sino kae kei natou tutuu i onatou vae,
Pea e maluluku anai i te pala onatou mata i onatou pokoi mata,
Pea e to anai i te pala tonatou alelo i tonatou gutu.
13I te aho aia, e fakatupu anai e te Eteleno he maveuveu lahi ia natou;
E too anai e ae te nima o ae,
Pea e natou hiki anai te nima o ae ki ae.
14E tau anai ia Suta i Selusalemi,
Pea e tanaki anai te u koloa o te u puleaga fuli ae i te takatakai,
Te aulo, mo te paaga, mo ni kofu o lahi osi.
15E toe taai foki e te malaia te u hosi,
Mo te u mule*, mo te u kamelo, mo te u asino,
Pea mo te u manu fuli ae e mau anai i te u nofoaga solia:
E tatau te malaia aena mo te malaia ake ae.
16Ko natou fuli ae e toe anai i te atu puleaga fuli
Ae nee omai o tau ki Selusalemi
E hake anai i te tau fuli
O atolasio ki te hau, te Eteleno o te atu fua tau,
Pea mo fakamanatu te aho o te u tapenakulo.
17Kapau e i ai ni famili o te kele ae e mole hake ki Selusalemi
O atolasio ki te hau, te Eteleno o te atu fua tau,
E mole to anai te ua kia natou.
18Kapau e mole hake anai te famili o Esipito ki Selusalemi, kapau e mole hau ia ia o atolasio,
E mole to anai te ua kia ia;
E taai anai ia ia aki te malaia ae e taai anai ki ai e te Eteleno te u puleaga
Ae e mole hake anai o fakamanatu te aho o te u tapenakulo.
19Koena anai te tautea o Esipito,
Te tautea o te u puleaga fuli
Ae e mole hake anai o fakamanatu te aho o te u tapenakulo.
20I te aho aia, e tohi anai i te u kii pele o te u hosi: Maonioni ki te Eteleno!
Pea e hage anai te u kulo o te fale o te Eteleno
Ko ni ipu ae ia mua o te aletale.
21Ko te u kulo fuli i Selusalemi mo Suta
E fakatapui anai ki te Eteleno o te atu fua tau;
Ko natou fuli ae e natou momoli anai ni sakilifisio e omai anai
O fakamoho te u kanoi manu ki ai.
Pea e mole toe mau anai he tagata faikoloa i te fale o te Eteleno o te atu fua tau,
I te aho aia.
Currently Selected:
SAKALIA 14: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
