MALAKIA 1
1
Situa a Iselaele ki te ofa o tona Atua
1Folafola a te Eteleno ki Iselaele ia Malakia.
2Nee au ofa kia koutou, e ui e te Eteleno.
Kae e koutou ui: Kotea te mea ae nee ke ofa ai kia matou?
Pe e mole ko te tehina o Esau ko Sakopo?
E ui e te Eteleno.
Kae nee au ofa kia Sakopo,
3Pea nee au mau he fehia kia Esau,
Nee au fakaliliu ona mouga ko he potu lavaki,
Nee au tuku tona tofiga ki te u kuli vao o te toafa.
4Kapau e ui e Etome: Kua matou maumau,
E matou toe lagai anai te ua maumau! Koia e folafola ai te Eteleno o te atu fua tau:
Ke natou fakatuu! E au holoi anai,
Pea e fakahigoa anai natou ko te fenua o te agakovi,
Hahai ae e itaita ki ai te Eteleno o heegata.
5E sio anai ki ai okotou mata,
Pea e koutou ui anai: E lahi te Eteleno
O fakalaka i te u tuakoi o Iselaele!
Agahala a te kau faisakilifisio
6E fakaapaapa he foha ki tana tamai, pea mo he tagata faifekau ki tona pule.
Kapau e au tamai, kofea te fakaapaapa ae e tonu ke fai mai kia au?
Kapau e au pule, kofea te mataku ae e tonu ke mau kia au?
E ui e te Eteleno o te atu fua tau kia koutou, kau faisakilifisio,
Ae e kotou fakanoai toku huafa,
Pea e kotou ui: Kotea te mea ae nee matou fakanoai ai tou huafa?
7E kotou momoli i toku aletale ni meakai uli,
Pea e koutou ui: Kotea te mea ae nee matou fakanoai ai ia koe?
O tupu nee kotou ui: E noa te laupapa o te Eteleno!
8Ka kotou momoli he failaulau aki he manu kivi, pe e mole kovi?
Ka kotou momoli he manu ketu pee maimoa, pe e mole kovi?
Ke ke momoli ia ia ki tou kovana!
Pe e ina tali lelei anai ia koe, pe e ina tuku anai kia koe he mea lelei?
E ui e te Eteleno.
9Kotou kole ki te Atua i te temi nei, ke ofa atu ia ia kia koutou!
O tupu ko koutou ae e hau mai ai te mea aia:
Pe e ina tali lelei anai koutou?
E ui e te Eteleno o te atu fua tau.
10Ko ai ae ia koutou e ina mapunui anai te u matapa,
Ke aua naa kotou tutu noa te afi i oluga o toku aletale?
E mole pe au mau he fiafia e tahi ia koutou, e ui e te Eteleno o te atu fua tau,
Pea e mole lelei kia au te u molaga o okotou nima.
11Koteuhi mai te hopo o te laa o kaku ki tona to,
E lahi toku huafa i te lotolotoga o te atu puleaga,
Pea e tutu i te u kogamea fuli te iseso ki toku huafa,
Pea e fai mai kia au ni failaulau maa;
Koteuhi e lahi toku huafa i te lotolotoga o te atu puleaga,
E ui e te Eteleno o te atu fua tau.
12Kae ko koutou, e koutou ulihi toku huafa,
O kotou ui: E uli te laupapa o te Eteleno,
Pea ko te mea ae e mau i ai ko he meakai kovi.
13E kotou ui: Ko te hoki e he mea fakakinakina! Pea e kotou fehihia kia au,
E ui e te Eteleno o te atu fua tau.
Koia e kotou aumai ai kia au ni manu kaihaa, mo ketu pea mo maimoa!
Pea koena te u molaga ae e kotou fai mai kia au!
Pe e feala ke au tali lelei natou mai okotou nima? E ui e te Eteleno.
14Malaia te tagata kaka ae e ina mau i tana faga manu he manu tagata,
Kae e ina foaki ke momoli ki te Aliki he manu sino kovi!
Koteuhi ko au ko he hau lahi, e ui e te Eteleno o te atu fua tau,
Pea e fakamatakutaku toku huafa i te lotolotoga o te atu puleaga.
Currently Selected:
MALAKIA 1: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
