Tohi a Paulo ki te kau LOMA 9
9
Manatu loto a Paulo ki Iselaele
1E au fakaha te mooni ia Kilisito, e mole pe au loi, e fakamooni mai toku loto kia au i te Laumalie Maonioni: 2E au mafasia lahi pea e au mamahi tuumau i toku loto. 3Koteuhi e au fakaamu age ke au malaia mo au motuhi maia Kilisito o uhiga mo oku tehina, mo aku matua i te kakano, 4ae e Iselaele, ae e natou mau te vavae, mo te kololia, mo te u hai, mo te lao, mo te atolasio, mo te u fakapapau, 5pea mo te kau pateliaka, ae nee tupu mai ai, i te kakano, te Kilisito, ae e maoluga i te u mea fuli, te Atua manuia o heegata. Ameni!
E kehekehe te hakoga fakanatula mo te hakoga fakalaumalie
6E mole au ui nee mole fua te folafola a te Atua. Koteuhi e mole Iselaele natou fuli ae e omai mai te hahai o Iselaele. 7Pea e logo ai ko te hakoga natou o Apalahamo, e mole ko natou fuli ko ana fanau; kae e ui: Ia Isaake, e ke mau anai he hakoga e fakahigoa anai ki tou higoa, 8ko tona uhiga: E mole ko te u fanau a te kakano ae ko te u fanau a te Atua, kae ko te u fanau a te fakapapau ae e lau ko te hakoga. 9Koteuhi koeni te folafola a te fakapapau:
I te temi totonu aeni, e au toe hau anai, pea e mau anai e Sala he foha.
10Pea e mole gata i ai, kae nee toe fai fena kia Lepeka, ae nee faitama ia Isaake tatatou tamai; 11koteuhi nee heeki tupu te u toe pea nee heeki pe fai e naua he mea e lelei pee ko he mea e kovi, kae ke tuumau te fakatuutuu a te Atua o mulimuli ki te filifili ae e mole fakalogo ki te u gaue kae ki ae e ina paui, 12nee ui leva kia Lepeka: E fakalogo anai te mua ki ae e muli, o mulimuli ki te mea nee tohi:
13 Nee au ofa kia Sakopo
Pea nee au fehia kia Esau.
Filifili o te kau pagani
14Kotea anai ka tou ui? Pe e mole faitotonu te Atua? Kailoa! 15Koteuhi nee ina ui kia Moisese:
E au manavaofa anai ki ae e au manavaofa ki ai, pea e au fakaofaofa anai ki ae e au fakaofaofa ki ai.
16Koia anai, e mole fakalogo te mea aia ki ae e loto, pee ki ae e lele, kae ki te Atua ae e manavaofa. 17Koteuhi nee ui e te Tohi kia Falaone:
Nee au fakatupu pe ia koe ke fakaha ia koe toku mafimafi, pea ke ke fakaha toku huafa i te malamanei katoa.
18Koia e manavaofa ai ia ki ae e loto ia ki ai, pea e ina fakafefeka ae e loto ia ki ai.
19E ke ui mai anai kia au: Kotea kei ita ai ia? Koteuhi ko ai e ina taofi tona finegalo? 20Oi tagata, ko ai ia koe, ke ke fakafihi ki te Atua? Pe e ui anai e te ipu kele ki ae nee ina fau ia: Kotea nee ke fau ai au ke au fenei? 21Pe e mole pule te tagata faiipu ki te kele, ke ina fau, mai he kele e tahi, he ipu mauhiga pea mo he ipu mahani? 22Pea kapau kua loto te Atua ke fakaha tona hauhau, pea mo fakaha tona mafimafi, nee ina katakii i he kataki fualoa lahi ni ipu o te hauhau ae nee fau aki te malaia, 23pea kapau kua loto ia ke fakaha te u koloa o tona kololia aki ni ipu o te manavaofa ae nee teuteui fakatomua ki te kololia: Ko ai anai ke toe palalau kia ia? 24Koia kua ina paui tatou, o mole gata pe mai te hahai Sutea, kae mai te hahai pagani foki, 25o hage ko tona fakaha i te Tohi a Oseo: E au fakahigoa anai ko taku hahai ae nee mole ko taku hahai, pea ko toku ofaaga te fafine ae nee mole ko he ofaaga; 26pea i te kogamea ae e ui ai kia natou: E mole ko koutou ko taku hahai! E fakahigoa anai natou ko te u foha o te Atua mauli. 27Kae nee tagi ia Esaia o uhiga mo Iselaele:
Ka kaugamalie anai te u foha o Iselaele o hage ko te one o te tai,
E fakamauli anai he kii toega pe.
28 Koteuhi e fakahoko anai e te Aliki tana folafola katoa i te kele,
Pea e ina fai vave anai tana fakapapau.
29Pea e hage ko tona fakaha e Esaia i mua atu:
Ka na nee mole tuku mai
E te Aliki o te atu fua tau kia tatou he fakaili,
Nee tou lilu leva o hage ko Sotoma,
Nee tou tatau leva mo Komola.
Iselaele mo te faitotonu i te tui
30Kotea anai ke tou ui? Ko te kau pagani, ae nee mole natou kumi te faitotonu kua natou mau te faitotonu, te faitotonu ae e hau mai te tui, 31kae ko Iselaele, ae nee ina kumi he lao o te faitotonu, nee mole kaku ia ki te lao aia. 32O uhi kotea? Koteuhi nee kumi e Iselaele ia ia, o mole aki te tui, kae aki te u gaue. Nee natou tukia i te maka fakatupu higa, 33o hage ko tona tuu i te Tohi:
Koeni, e au tuku i Sione he maka fakatupu higa
Pea mo he utu fakatupu malaia,
Pea ko ae e tui kia ia e mole ufiufi anai.
Currently Selected:
Tohi a Paulo ki te kau LOMA 9: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
