Tohi a Paulo ki te kau LOMA 10
10
Ko te tui gataa ko te tupuaga aia o te taofi o te u fakapapau ki Iselaele
1U tehina, ko te fakaamu o toku loto pea ko taku kole ki te Atua o uhiga mo natou, ke haofaki natou. 2Koteuhi e au fakamooni kia natou, e natou mau te ofa ki te Atua, kae hala atamai: 3I tonatou fakapouli ki te faitotonu a te Atua, pea mo tanatou faiga ke fakatuu tanatou faitotonu, nee mole natou fia fakalogo ki te faitotonu a te Atua; 4koteuhi ko Kilisito ko te fakaosiaga ia o te lao, ke fakamatatonu ai natou fuli ae e tui.
5Koia nee fakaha ai e Moisese te faitotonu ae e hau mai te lao: Ko te tagata ae e ina fai anai te u mea aia, e mauli anai ia natou. 6Kae koeni te palalau a te faitotonu ae e hau mai te tui: Aua naa ke ui i tou loto: Ko ai ka hake anai ki te lagi? Ko te fakahifo mai aia o Kilisito; 7pee: Ko ai ka hifo anai ki te vanu? Ko te hakeaki aia o Kilisito mai te kau mate. 8Kotea te ui a te faitotonu? E ovi te folafola kia koe, i tou gutu mo tou loto. Pea ko te folafola o te tui, ae e matou fakaha. 9Kapau e ke kofesio i tou gutu te Aliki Sesu, pea kapau e ke tui i tou loto kua toe fakatuuake ia e te Atua mai te kau mate, e haofaki anai ia koe. 10Koteuhi aki te tui i te loto e kaku ai ki te faitotonu, pea aki te fakaha i te gutu e kaku ai ki te mauli, o hage ko tona fakaha e te Tohi:
11 E mole ufiufi anai ae e tui kia ia.
12E mole fai kehekehe ki te Sutea mo te Keleka, koteuhi e na Aliki toko lua ki te Aliki e tahi, ae e mau koloa kia natou fuli e paui kia ia. 13Koteuhi ko ae e paui anai ki te huafa o te Aliki e haofaki anai ia.
E tonu ke fakaha te Evaselio ki te malamanei katoa
14E feafeai anai ke natou paui ki ae nee mole natou tui ki ai? Pea e feafeai anai ke natou tui ki ae nee heeki natou logo ki ai? Pea e feafeai anai ke natou logo kia ia, mo kapau e mole he tahi ae e akonaki? 15Pea e feafeai anai ke mau ni tagata faiakonaki, mo kapau e mole fekaui natou? O hage ko tona tuu i te Tohi:
E matalelei osi, te u vae o natou ae e natou fakaha te tokalelei,
O natou ae e natou fakaha ni logo lelei.
16Kae nee mole fakalogo te u tagata fuli ki te logo lelei. Koia nee ui ai e Esaia:
Aliki, ko ai nee tui ki tamatou akonaki?
17Koia e hau ai te tui mai te mea e logo ki ai, pea ko te mea e logo ki ai, e hau ia mai te folafola a Kilisito.
18Kae e au ui: Pe nee mole natou logo? Io!
Kua taka onatou leo i te kele katoa,
Pea kua kaku anatou folafola ki te u potupotu o te malamanei.
19Kae e au ui: Pe nee mole iloi e Iselaele te mea aia? Nee uluaki palalau ia Moisese: e au fakaliliu anai koutou ke finenonofo ki te mea ae e mole ko he puleaga; e au fakaliliu anai koutou ke itaita ki he puleaga hala atamai. 20Pea nee toa ia Esaia, o fakaha:
Kua mau au e natou ae nee mole natou kumi au,
Kua fakaha au kia natou ae nee mole natou fehui au.
21Kae nee ina ui ki Iselaele:
Nee au folahi oku nima i te aho katoa ki he hahai logogataa pea mo taugutu.
Currently Selected:
Tohi a Paulo ki te kau LOMA 10: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
