Tohi a Paulo ki te kau LOMA 12
12
Te mauli i te Atua
1Koia e au fakamalohii ai koutou, u tehina, i te manavaofa o te Atua, ke kotou momoli okotou sino o hage ko he sakilifisio mauli, mo maonioni, mo lelei ki te Atua; koena takotou atolasio mooni kia ia: 2Aua naa kotou fakatatau ki te sekulo aeni, kae ke fetogi koutou e te fakafoou o te loto, ke kotou iloi te finegalo o te Atua: Te mea ae e lelei, mo aoga, pea mo haohaoa.
3I te kalasia ae nee foaki mai kia au, e au fakaha ki te tagata takitahi o koutou, ke aua naa ina mau he manatu e maoluga age ia ia totonu, kae ke ina kofu ni manatu totonu, o mulimuli ki te lahi o te tui ae kua vaevae e te Atua ki te tagata takitahi. 4Koteuhi o hage ko te sino e tahi, e ina mau ni kogasino e lahi, pea ko te u kogasino fuli e mole natou mau te gaue e tahi, 5e tatau foki mo tatou, e tou kaugamalie, pea e tou fau he sino e tahi ia Kilisito, pea e tou feaogaaki fuli, o hage ko ni kogasino e pipiki tahi. 6Kae koteuhi e tou mau ni meaofa kehekehe, o mulimuli ki te kalasia kua foaki mai kia tatou, ko ae e faikikite ke ina fai o fakatatau ki te lahi o te tui; 7ko ae kua paui ke faifekau, ke pipiki ki te faifekau; ko ae e akonaki ke pipiki ki tana akonaki, 8ko ae e fakamalohi ke pipiki ia ki te fakamalohi; ko ae e foaki ke ina fai mo te loto lelei; ko ae e takitaki ke ina fai mo te loto katoa; pea ko ae e ofa ki te kau masiva ke ina fai mo te loto fiafia.
Te mauli o te u fanau a te Atua
9Ke mooni tokoutou ofa. Ke kotou fakalialia ki te kovi pea ke kotou pipiki fakamalohi ki te lelei. 10Ke kotou feofaofani i he ofa fakatautehina; ke kotou tokaga ki te fakaapaapa i okotou vahaa. 11Ke kotou faafai, kae aua naa kotou pipiko. Ke kotou loto mafana. Ke kotou tauhi ki te Aliki. 12Ke kotou fakafiafia i te amanaki lelei. Ke kotou kataki fualoa i te mamahi. Ke kotou agatonu i te faikole. 13Ke kotou tokaga ki te u mea e aoga ki te kau sagato masiva. Ke kotou fakatalitali kaiga.
14Ke kotou tapuaki kia natou e fakataga atu kia koutou, koutou tapuaki kae aua naa kotou tutuku.
15Ke kotou fakafiafia mo natou e fiafia; ke kotou fetagihi mo natou e fetagihi. 16Ke kotou mau ni manatuloto tatau i okotou vahaa. Ke aua naa kotou holi ki te u mea maoluga, kae ke kotou holi ki te u mea malalo. Ke aua naa kotou fia poto.
Te Kilisitiano mo natou i tafa
17Aua naa kotou totogi ki he tahi te kovi aki te kovi. Koutou kumi te mea e lelei ia mua o te u tagata fuli. 18Kapau e feala, pea e fakalogo kia koutou, ke kotou mauli i te tokalelei mo te u tagata fuli. 19Aua naa kotou taui koutou totonu, ofaaga, kae kotou tuku te ita ke fai, koteuhi e tuu i te Tohi: E ui e te Aliki: A aku te lagavaka, a aku te totogi, 20kae kapau e fia kai tou fili, foaki kia ia he meakai; kapau e fia inu ia, foaki kia ia he meainu; koteuhi i tau fai te mea aia, e ke tanaki anai ni mamala kakaha ki tona fuga ulu. 21Ke aua naa ke tuku ke malo te kovi ia koe, kae ke ke malo i te kovi aki te lelei.
Currently Selected:
Tohi a Paulo ki te kau LOMA 12: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
