Tohi a Paulo ki te kau FILIPE 3
3
Faifaitakiaga o Paulo
1Pea koeni, oku tehina, koutou fakafiafia i te Aliki. E mole au fiu i te faitohi atu kia koutou o uhiga mo te u mea pe aia, e aoga ia kia koutou.
2Koutou tokaga ki te u kuli, koutou tokaga ki te kau gaue kovi, koutou tokaga ki te kau silikosisio lohi. 3Koteuhi ko te kau silikosisio ko tatou, e tou fai ki te Atua tatatou atolasio aki te Laumalie o te Atua, pea e tou fakakololia ia Sesu-Kilisito, pea e mole tou tuku tatatou falala ki te kakano.
4Ko au foki, e feala ke au tuku taku falala ki te kakano. Kapau e manatu he tahi e feala ke falala ia ki te kakano, e au laka age, 5ko au, nee silikosisioi au i te valu aho, mai te lanu o Iselaele, mai te faahiga o Pesamino, Hepeleo nee tupu mai he u Hepeleo, pea Faliseo i te lao; 6pea ki te tauhi lotu, nee au fakatagai te Ekelesia; pea ki te faitotonu o te lao, nee au hee mele. 7Kae ko te u mea aia nee hage kia au ko oku fakakoloa, kua au sio kia natou o hage ko he puli noa uhi ko Kilisito. 8Pea kua au sio foki ki te u mea fuli o hage ko he puli noa, uhi ko te mauhiga o te iloi o Sesu-Kilisito toku Aliki, ae kua au fakafisi ai ki te u mea fuli; pea e au sio ki te u mea aena o hage ko he pela, koteuhi ke mau ia Kilisito; 9pea ke mau au ia ia, o mole aki taku faitotonu ae e hau mai te lao, kae aki te faitotonu e mau i te tui kia Kilisito, te faitotonu e hau mai te Atua aki te tui. 10Pea e au iloi anai ia Kilisito, pea mo te malohi o tana toe tuuake, pea mo te komunio o ona mamahi, i taku fakatatau kia ia i tona mate, ke au kaku ai, 11mo kapau e au fealagia, ki te toe tuuake mai te kau mate.
Lele ki te tauaga
12E mole uhi kua au mau foki te fakapale, pee kua au kakusia te katoa o te lelei pau, kae e au lele, o faiga ke au kukumi ia, koteuhi kua kukumi foki au e Sesu-Kilisito. 13U tehina, e mole au manatu kua au kukumi ia ia; kae e au fai he mea e tahi: e au galoi te u mea i muli, kae e au mafao o sio ki te u mea i mua, 14pea e au lele ki te tauaga, ke au mau te fakapale o te kalaga mai lagi a te Atua ia Sesu-Kilisito.
15Koia ko tatou fuli ae ko ni tagata kua katoa, ke tou mau te manatu aeni, pea kapau e kotou mau he tahi age manatu, e fakamalamai anai koutou e te Atua i te mea foki aena. 16Koia, i te nofo kua tou kaku ki ai, ke tou haele i he laka e tahi.
17Koutou faifaitaki mai kia au, u tehina, pea koutou sio kia natou e haele o mulimuli ki te faifaitakiaga e koutou mau ia matou. 18Koteuhi e kaugamalie natou ae e haele ko ni fili o te koluse o Sesu-Kilisito, ae kua tua lahi taku tau palalau ki ai, pea e au toe palalau atu nei ki ai mo ni tagi. 19Ko tonatou fakaosi ko te pulinoa; e natou atua ki onatou fatu, pea e natou fakakololiai natou i te u mea ae e tonu ke natou matagafua ai, koteuhi e natou manatu pe ki te u mea o te malamanei. 20Kae kia tatou, e tuu totatou kolo i lagi, ae e tou talitali foki mai ai ki totatou Fakamauli, te Aliki ko Sesu-Kilisito, 21ae e ina fetogi anai totatou sino fakaofaofa, ke tatau mo tona sino fakakololia, i te pule ae e ina mau ke aumai ai te u mea fuli ke fakalogo kia ia.
Currently Selected:
Tohi a Paulo ki te kau FILIPE 3: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
