Tohi a Paulo ki te kau FILIPE 2
2
Kilisito, faifaitakiaga o te fakamalalo
1Koia kapau e i ai he fakapelepele ia Kilisito, kapau e i ai he fakafimalie i te ofa, kapau e i ai he komunio i te loto, kapau e i ai he ofa ki te mamahi pea mo he ofa ki te masiva, 2koutou fakakatoa toku fiafia, i takotou mau he manatu e tahi, mo he ofa e tahi, mo he laumalie e tahi, pea mo he loto e tahi. 3Aua naa koutou fai he mea i te fefiliaki, pee i te fiaha, kae i te agavaivai ke kotou sio kia natou ake ae o hage e natou maoluga age ia koutou totonu. 4Ke aua naa tahi tokaga pe te tagata ki ana mea pe, kae ke tokaga foki ia ki te u mea a natou ake ae. 5Ke kotou mau te u manatu loto nee mau e Sesu-Kilisito: 6Ia ia ae e ina mau te agaaga o te Atua, nee mole pe ina ohofi ia ke liliu o tatau mo te Atua, 7kae nee ina fakanoai ia ia totonu, o ina too te agaaga o te faifekau, o liliu ia o tatau mo te u tagata; pea nee ha ia o hage ko he tagata mooni, 8nee ina tali ke mauli i te fakavaivai, pea nee liliu ia o fakalogo o kaku ki te mate, ki te mate foki i te koluse. 9Koia foki ae nee hiki fakaalialiki ai ia e te Atua, pea nee ina foaki age kia ia te higoa ae e maoluga pau i te higoa fuli pe, 10koteuhi i te higoa o Sesu ke hu ifo te tuli fuli i te lagi, mo te kele, pea mo te lalo kele, 11pea ke fakaha e te alelo fuli ko Sesu-Kilisito ko te Aliki, ki te kololia o te Atua te Tamai.
Gigila o hage ko ni foi malama
12Koia, oku ofaaga, o hage ko takotou fakalogo nee kotou fai tuumau, o mole gata pe i te temi e au nofo ai mo koutou, kae tafito i te temi e au puli ai, koutou gaue ki tokotou haofaki i te mataku mo te tete. 13He ko te Atua ae e ina fakatupu ia koutou te fiafai mo te faafai o tona finegalo lelei. 14Koutou fai te u mea fuli mo te hala lalau mo te hala lotolotolua, 15ke koutou liliu ai o hee mele mo maa, o hage ko he u fanau totonu a te Atua i te lotolotoga o he taitupu kaka mo maveuveu ae e koutou ha i ai o hage ko he u malama i te malamanei, 16o kotou taofi mau te folafola o te mauli, pea ke feala ai taku fakafiafia i te aho o Kilisito, he nee mole leva au lele noa pee nee au gaue noa. 17Pea kapau e tonu ke liligi toku toto ki te sakilifisio pea ki te tauhi o takotou tui, e au fiafia i ai, pea e au fiafia fakatahi mo koutou fuli. 18Ko koutou foki, koutou fiafia, pea koutou fakafiafia fakatahi mo au.
Gaue a Timoteo mo Epafolotito
19E au falala ki te Aliki Sesu, e au fekaui vave atu anai kia koutou ia Timoteo, ke fakamalohii ai toku loto i taku iloi te u logo o uhiga mo kotou. 20Koteuhi e mole au mau he tahi i heni ke manatu tatau mo au, pea ke tokaga mooni kia koutou; 21he ko natou fuli e natou tahi kumi pe ki te u mea e lelei kia natou, e mole natou kumi ki te u mea e lelei kia Sesu-Kilisito. 22E kotou iloi te u fakamooni o uhiga mo tona agatonu, i tana kaugana fakatahi mo au ki te Evaselio, o hage ko he fanau mo tana tamai. 23Koia e au amanaki lelei ai ke au fekaui atu nei ia kia koutou moka au iloi lelei anai toku aluaga. 24Kae e au mau te falala aeni i te Aliki e vave foki taku alu atu, ia au totonu, kia koutou.
25Nee au manatu e aoga ke fekaui atu kia koutou toku tehina ko Epafolotito, toku hoa i te gaue pea mo te tau, ae nee kotou fakakaku mai ai kia au te tokoni nee aoga kia au. 26Koteuhi nee kua lahi tona fia sio kia koutou fuli pea mo tona hoha i takotou iloi tona mahaki. 27He nee mahaki ia, pea nee mehii ia ke mate; kae nee ofa te Atua kia ia, pea nee mole gata pe kia ia, kae kia au foki, ke aua naa au mau mamahi, mai te mamahi ki te mamahi. 28Koia, nee au fai mo vave o fekaui atu ia kia koutou, ke koutou fiafia i takotou toe sio kia ia, pea ke fakasiisii ai mo toku mamahi. 29Koia, ke kotou tali ia i te Aliki mo he fiafia katoa, pea ke kotou mau te fakaapaapa ki te faahiga tagata aia. 30Koteuhi nee amanaki ia ke mate o uhiga mo te gaue a Kilisito, pea nee ina momoli tona mauli ke ina fakakatoa takotou tauhi kia au.
Currently Selected:
Tohi a Paulo ki te kau FILIPE 2: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
