YouVersion Logo
Search Icon

EVASELIO A MATEO 15

15
Ko te kau faliseo mo te talatisio
1Pea nee omai leva ni faliseo mo ni sekelipa mai Selusalemi kia Sesu, pea nee natou ui leva: 2Kotea e maumaui ai e au tisipulo te talatisio a te kau matua afea? Koteuhi e mole natou fufulu onatou nima moka natou kakai. 3Nee tali leva ia ia kia natou: Pea ko koutou, kotea e kotou maumaui ai te fakatotonu a te Atua, o tupu ko takotou talatisio? 4Koteuhi nee ui e te Atua: Fakaapaapa ki tau tamai mo tau fae; pea: Ko ae e laukovi anai ki tana tamai pee ki tana fae e tautea anai ia ia ki te mate. 5Kae ko koutou, e kotou ui: Ko ae e ina ui anai ki tana tamai pee ki tana fae: Ko te mea ae nee feala ke au foaki kia koe ko he molaga ia ki te Atua, e mole toe maua anai ia ia ki tana tamai pee ki tana fae. 6E koutou fakanoai i ai te folafola a te Atua, o tupu ko takotou talatisio. 7Kau malualoi, nee tonu osi ia Esaia i tana folafola kikite kia koutou, o ui:
8 E fakaapaapa te hahai aeni kia au i onatou laugutu,
Kae e mamao onatou loto ia au.
9 E maumau noa tanatou fakavikiviki kia au,
Koteuhi e natou tuku ni lekula fakatagata o hage ko ni pelesepeto mai a au.
Te aluaga mooni o te loto o te tagata
10Pea nee ina paui leva te hahai, o ui kia natou: Kotou fakalogo, pea kotou mahihino. 11E mole ko te mea ae e ulu ki te gutu e ina ulihi te tagata; kae ko te mea ae e mavae mai te gutu e ina ulihi te tagata.
12Pea nee fakaoviovi age leva ana tisipulo, o ui kia ia: Pe e ke iloi nee higa te kau faliseo i tanatou logo ki te folafola aena? 13Nee tali leva ia ia: Ko te akau fuli pe nee mole to e taku Tamai i selo e taaki anai. 14Koutou tuku noa natou: Ko ni kivi natou ae e natou taki ni kivi; kapau e taki e he kivi he tahi kivi, e na fetoki toko lua anai ki he luo.
15Nee palalau leva ia Petelo, o ui kia ia: Fakamahino mai kia matou te folafola fakatata aena. 16Pea nee ui leva e Sesu: Mo koutou foki, pe e kei koutou hala atamai aipe? 17Pe e mole koutou mahihino ko te u mea fuli ae e ulu ki te gutu e alu ki te fatu, pea e liaki ki te u kogamea fakapulipuli? 18Kae ko te mea ae e mavae mai te gutu e hau mai te loto, pea ko te mea aia e ina ulihi te tagata. 19Koteuhi ko te loto ae e mavae mai ai te u manatu kovi, te u fakapo, te u tono, te u faikovi, te u kaihaa, te u fakamooni loi, te u fasituu. 20Koena te u mea ae e natou ulihi te tagata; kae ki te kai kae e mole fufulu te u nima, e mole ina ulihi te tagata.
Sesu mo te fafine Kanaane
21I tana mavae mai hena, nee alu leva ia Sesu ki te fenua o Tile mo Sitone. 22Pea koeni, nee hau leva he fafine Kanaane mai te u fenua aena, o kalaga kia ia: Ofa mai kia au, Aliki, Foha o Tavite! Kua kovi osi taku taahine i te ulu sino a te temonio ia ia. 23Nee mole pe tali e Sesu kia ia, pea nee fakaoviovi age leva ana tisipulo, o kole fakamalohi kia ia: Fekaui te fafine ke alu, koteuhi e taukalaga ia ia i otatou muli. 24Nee tali leva e Sesu: Nee fekaui mai au ki te u ovi hehe o te fale o Iselaele. 25Kae nee hau leva te fafine o tulolo i ona mua, o ui: Aliki, tokoni mai kia au! 26Nee tali leva e Sesu: E mole lelei ke too te pane a te u fanau, o laku ki ni uhii kuli. 27Nee tali leva e te fafine: Io, Aliki, kae e kai e te u uhii kuli te u eveeve ae e maluku mai te laupapa o onatou pule. 28Pea nee ui leva e Sesu kia ia: Fafine, e lahi tau tui; ke fai kia koe o hage ko te mea ae e ke loto ki ai. Pea nee mauli leva tana taahine i te hola pe aia.
Fakamauli o te u mahaki kehekehe
29Nee mavae leva Sesu i te u kogamea aia, pea nee alu leva ia ia o ovi ki te tai o Kalilea. Nee hake leva ia ia ki te mouga, pea nee nofo ifo leva ia i ai. 30Pea nee fakaovi age leva kia ia he hahai kaugamalie, o fakatahi mo natou ni vae ketu, ni kivi, ni gutu mate, ni maimoa, mo ihi hahai mahaki kaugamalie age. Nee tuku leva natou kia vae o Sesu, pea nee ina fakamauli leva natou; 31pea nee punamauuli te hahai i tanatou sisio kua palalau te u gutu mate, kua mauuli te u maimoa, kua haele te u vae ketu, kua sisio te u kivi; pea nee fakakololia leva te hahai ki te Atua o Iselaele.
Liuliuga o te u pane ki te toko fa afe
32Nee paui leva e Sesu ana tisipulo, o ui: E au ofa mamahi ki te hahai aeni; koteuhi ko te aho tolu aeni o tanatou nonofo mo au, pea e mole natou mau he meakai. E mole au loto ke fekau natou ke olo pakupaku, koteuhi naa puli tonatou malohi i te ala. 33Nee ui leva e te kau tisipulo kia ia: Pe e feafeai hamatou mau i te kogamea lavaki aeni ni pane feauga ke fafaga ai ke makona he hahai kaugamalie fenei? 34Nee fehui leva e Sesu kia natou: Pe ko foi pane e fia ae e koutou mau? Nee natou tali leva: E fitu, pea mo ni kii ika liliki. 35Pea nee ina fakanonofo leva te hahai ki te kele, 36pea nee ina too leva te u foi pane e fitu mo te u ika, pea, i te osi o tana fakafetai, nee ina tofitofi leva natou, pea nee ina foaki leva natou ki ana tisipulo, ae nee natou tufa leva ki te hahai. 37Nee natou kakai fuli leva, pea nee natou makokona leva, pea nee ave leva ni kato e fitu kua fofonu i te u toega kai. 38Ko natou ae nee kakai ko te toko fa afe tagata, nee mole lau te u fafine mo te u toe liliki.
39Pea osi, nee fakamavetevete leva e Sesu te hahai, pea nee heka leva ia ia ki te vaka, o alu ki te fenua o Makatane.

Currently Selected:

EVASELIO A MATEO 15: WB2011

Highlight

Share

Copy

None

Want to have your highlights saved across all your devices? Sign up or sign in