SENESI 50
50
1Nee punou leva ia Sosefo kia mata o tana tamai o tagi mo uma ki ai. 2Pea nee ina fakatotonu leva ki te u toketa ae nee gaue kia ia ke natou fakatologa te sino o tana tamai, pea nee fakatologa leva e te u toketa ia Iselaele. 3Nee fai te fakatologa ia aho e fagofulu. Pea nee fetagihi te kau Esipito kia ia ia aho e fitugofulu.
4I te osi o te u aho putu, nee palalau leva ia Sosefo ki te hahai o te fale o Falaone, o ui: Koeni, kapau kua au mau he kalasia i okotou mua, pea e au kole atu kia koutou, ke koutou fakaha te mea aeni kia Falaone: 5I mua o tona mate, nee kole mai e taku tamai kia au, ke au fakapapau age kia ia, o ui: Koeni ka au mate, e ke tanu anai au i te tanuma ae nee au totogi i te fenua o Kanaane. Koia e au loto ai ke au alu ki ai o tanu taku tamai, pea hoki au toe liliu mai anai. 6Nee tali leva e Falaone: Hake o tanu tau tamai, o fakahoko tau fakapapau kia ia.
7Pea nee hake leva ia Sosefo o tanu tana tamai. Pea nee hake leva mo ia te u minisi fuli a Falaone, mo te u tagata mauhiga fuli o te fale o Falaone, mo te u tagata lalahi fuli o Esipito, 8mo te fale katoa o Sosefo, mo ona tehina, mo te fale katoa o tana tamai. Nee gata pe ki te u fanau liliki, mo te u ovi, pea mo te u pipi, nee tuku leva i te fenua o Koseni. 9Pea nee toe alu foki mo ia ni saliote, mo ni tagata heka hosi; pea nee kaugamalie osi te fagona. 10I te kaku o te fagona ki te kogamea haha fulumeto o Atati, ae nee tuu i te kauvai atu ae o te Solotane, pea nee natou fai leva i ai, ni tagi lahi mo ni fakamamahi; pea nee fai leva e Sosefo he putu ki tana tamai ia aho e fitu. 11Ko te kau Kanaane, ae ko te hahai o te fenua, nee sisio leva ki te putu aia nee fai i Atati, pea nee natou ui leva: Ko he putu lahi aeni a te kau Esipito! Koia nee foaki ai te higoa ko Apele-Miselaime ki te kogamea haha fulumeto aia, ae nee tuu i te kauvai atu ae o te Solotane. 12Nee fakahoko leva i ai e te u foha o Sakopo te mea ae nee fakatotonu age e tanatou tamai kia natou: 13Nee natou ave leva tanatou tamai ki te fenua o Kanaane, pea nee natou tanu leva ia ia i te ana o te gaueaga o Makepela, ae nee totogi e Apalahamo kia Efelone, ko te tagata Eti, mo ona tanuma fakafamili, pea nee ovi ki Mamele. 14I te osi o te tanu o tana tamai, nee toe liliu leva ia Sosefo ki Esipito mo ona tehina, pea mo natou fuli ae nee hahake mo ia, o tanu tana tamai.
15I te sio leva a te u tehina o Sosefo kua mate tanatou tamai, nee natou ui leva: Kapau e nofo ia Sosefo mo hona fehia kia tatou, pea e ina totogi kia tatou te u kovi fuli ae nee tou fai kia ia! 16Pea nee natou fakakaku leva kia Sosefo te mea aeni: Nee tuku mai e tau tamai te fakatotonu aeni ia mua o tona mate: 17E koutou palalau anai kia Sosefo, o ui: Siomatou tehina, fakamolemole mai ki te agakovi o ou tehina, ki te agahala lahi ae nee matou fai kia koe! Fakamolemole i te aho nei ki te agahala a te u tagata faifekau a te Atua o tau tamai! Nee tagi leva ia Sosefo i tana logo ki te u palalau aia. 18Pea nee omai leva ona tehina totonu kia ia, o punou i ona mua, o ui: Ko au tagata faifekau matou. 19Pea nee ui leva e Sosefo kia natou: Aua naa koutou tuania. E mole ko au ae e tonu ke nofo i te tuulaga o te Atua! 20Nee koutou loto ke fai he mea kovi kia au, kae nee fulihi ia e te Atua ko he mea lelei, o tupu ke fakahoko te mea ae kua hoko i te aho aeni, ke haofaki ai te mauli o he hahai kaugamalie. 21Koia ke aua naa koutou tuania he mea; e au tauhi anai koutou mo okotou famili. Pea nee ina fakafimaliei leva natou i tana palalau ki onatou loto.
Aho fakaosi o Sosefo: tona mate
22Nee nofo leva ia Sosefo i Esipito, ia ia mo te famili o tana tamai. Nee mauli leva ia ia ia tau e teau hogofulu. 23Nee sio leva ia Sosefo ki te u foha o Efalaimi o kaku ki te tolu taitupu; pea ko te u foha o Makile, foha o Manase, nee heheka foki i ona kauaga. 24Nee ui leva e Sosefo ki ona tehina: Kua hoko toku temi mate; kae e ahiahi mooni anai te Atua kia koutou, pea e ina fakamavae anai koutou i te fenua aeni ki te fenua ae kua ina fakapapau ke foaki kia Apalahamo, mo Isaake, mo Sakopo. 25Pea nee ui leva e Sosefo ki te u fanau a Iselaele: Koutou fakapapau mai kia au, e koutou ave anai oku hui ke mamao i heni, i te aho ae e ahiahi mai ai anai te Atua kia koutou. 26Nee mate leva ia Sosefo i tona tau teau hogofulu. Nee fakatologa leva tona sino, pea nee tuku leva ia ki he puha i Esipito.
Currently Selected:
SENESI 50: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
