EKESOTE 1
1
Popula o Iselaele i Esipito
1Koeni te u higoa o te u foha o Iselaele, ae nee hihifo ki Esipito mo Sakopo pea mo onatou famili taki tahi. 2Ko Lupeni, mo Simeone, mo Levi, mo Suta, 3mo Isakale, mo Sapulone, mo Pesamino, 4mo Tane, mo Nefetali, mo Kate, mo Asele. 5Ko natou fuli aia nee hihifo maia Sakopo ko te toko fitugofulu. Nee nofo ia Sosefo i te temi aia i Esipito. 6Pea nee mate leva ia Sosefo, mo ona tehina fuli pea mo te taitupu katoa aia. 7Nee fanaunau leva te u fanau a Iselaele o lahi osi, pea nee natou liliu leva o malolohi mo mauhiga. Pea nee fonu leva te fenua ia natou.
8Nee malaga ake leva i Esipito he hau foou, ae nee mole ina iloi ia Sosefo. 9Pea nee ina ui leva ki tana hahai: Koeni kua liliu te u fanau a Iselaele ko he hahai kaugamalie mo malohi age ia tatou. 10Koeni, ke tou tokaga kia natou; ke tou fai ni puleaki ke aua naa natou lalahi age ia tatou, koteuhi naa hoko anai he tau, pea e natou kau anai mo otatou fili o taui tatou, pea e natou mavae anai i te fenua. 11Pea nee fakanofo leva ni pule gaue, o tupu ke natou fakamamahii natou aki ni kavega mamafa. Koia nee fakatuu ai leva te u kolo ko Pitomi mo Lamisese, ke tanaki ai te u koloa o Falaone. 12Kae nee logo ai tonatou fakamamahii, nee toe asilisili age tonatou kaugamalie mo tonatou malohi; nee toe asilisili age te fehia ki te u fanau a Iselaele. 13Koia nee fakapopulai kovi leva e te kau Esipito te u fanau a Iselaele. 14Nee natou fakamamahii tonatou mauli aki ni gaue mamafa ki te kelepulu, mo te fau piliki, pea mo te u gaue kehekehe i te u gaueaga. Pea nee natou fakamaua kia natou te u gaue fuli aia aki te agafakapo.
15Pea nee palalau foki te hau o Esipito ki te u fafine faifanau a te kau Hepeleo, ko te tahi nee higoa ko Sifela, pea ko te tahi ko Pua. 16Nee ina ui leva kia naua: Ka kolua fakafanau anai te u fafine a te kau Hepeleo, pea kapau e kolua sisio anai i te to age o te fanau, ko he fanau tagata, pea kolua tamatei ia ia, kae kapau ko he fanau fafine, pea kolua tuku ia ia ke mauli. 17Kae nee matataku leva te u fafine faifanau ki te Atua, pea nee mole na fakalogo leva ki te mea ae nee ui ki ai e te hau o Esipito; kae nee na tuku leva ke mauli te u fanau. 18Pea nee paui leva e te hau o Esipito te u fafine faifanau, o ui kia naua: Kotea nee kolua fai feia ai, kotea nee kolua tuku ai ke mauli te u fanau? 19Nee tali leva e te u fafine faifanau kia Falaone: E tupu e mole tatau te u fafine a te kau Hepeleo mo te u fafine a te kau Esipito; e natou malolohi pea e natou fanau i mua o te kaku atu a te fafine faifanau. 20Nee tapuaki leva e te Atua ki te u fafine faifanau; pea nee liuliuga leva te kau Iselaele, o liliu leva o kaugamalie osi. 21Koteuhi nee matataku te u fafine faifanau ki te Atua, nee tapuakii leva e te Atua ona famili.
22Pea nee tuku leva e Falaone te fakatotonu aeni ki tana hahai katoa: E koutou li anai ki te vaitafe te u fanau tagata fuli ae e tupu anai, kae e koutou tuku anai ke mauli te u fanau fafine fuli.
Currently Selected:
EKESOTE 1: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
