EKESOTE 25
25
Te Tapenakulo: Molaga
1Nee palalau leva te Eteleno kia Moisese, o ui: 2Palalau ki te u fanau a Iselaele. Ke natou aumai kia au he molaga; e koutou tali anai ia kia au mai te u tagata fuli ae e natou fia fai he molaga kia au i tona loto lelei. 3Koeni te u mea ae e koutou tali anai maia natou ko ni molaga: ko te aulo, mo te siliva, mo te sila; 4mo ni kie uui, mo ni kie kula fakapouli, mo ni kie kula malama, mo ni kie silika, pea mo he fului tao; 5mo ni kilii ovi tagata kua pena kula, pea mo ni kilii tutuu; mo ni papa akasia; 6mo he lolo ki te malama tutu, mo ni akau fakamagoni aki te lolo tapu mo te kaloni fakamagoni; 7mo te onise* pea mo ni ihi age maka mauhiga ke teuteui ai te efote* mo te peketolale*. 8E natou fau anai kia au he sagatualio, pea e au nofo anai i te lotolotoga o natou. 9E kotou fai anai te tapenakulo mo ona mea gaue fuli o fakatatau ki te paaki ae e au fakaha atu anai kia koe.
Te aleka o te hai
10E natou fai anai he aleka aki te akasia, ko te loa o te aleka ko te meta e tahi mo satimeta e uafulu ma nima, ko tona laulahi ko satimeta e fitugofulu ma nima, pea ko tona maoluga ko satimeta e fitugofulu ma nima. 11E ke aofi anai ia aki he aulo maa, pea e ke aofi anai ia i loto mo tua, pea e ke fai anai mo he tapatapa aulo i te takatakai. 12E ke fai anai ni ona mama aulo e fa, pea e ke fakapipiki anai natou ki ona mulii mea e lua, ko ni mama e lua i te tahi mulii mea, pea ko ni mama e lua ki te tahi mulii mea. 13E ke fai anai ni akau amo e lua aki te akasia, pea e ke haga leva o aofi aki te aulo. 14E ke fakaulu anai te u amo i te u mama i te mulii mea o te aleka, ke amo ai te aleka. 15E tuku mau anai te u amo i te u mama o te aleka, pea e mole toe too anai naua mai ai. 16E ke tuku anai ki te loto aleka te fakamooni ae e au foaki atu anai kia koe. 17E ke fai anai he pupunu o te aleka aki te aulo maa; ko tona loa ko te meta e tahi mo satimeta e uafulu ma nima, pea ko tona laulahi ko satimeta e fitugofulu ma nima. 18E ke fai anai ni selupino aulo e lua, e ke fau aki te aulo tuki, i ona mulii mea e lua o te nofoaga o te manavaofa; 19fau he selupino e tahi i te tahi mulii mea pea mo he tahi selupino e tahi i he tahi mulii mea; e kotou fau anai naua ke na ulu mai te nofoaga o te manavaofa, i ona mulii mea e lua. 20E folahi anai e te u selupino ona pakakau i oluga, o fakamalumalui te nofoaga o te manavaofa aki ona pakakau, pea e fehagaaki anai ki loto te u selupino, o sisio ki te nofoaga o te manavaofa. 21E ke hili anai te nofoaga o te manavaofa ki te aleka, pea e ke tuku anai ki loto o te aleka te fakamooni, ae e au foaki atu anai kia koe. 22Koena te kogamea ae e au felavei ai anai mo koe; i oluga o te nofoaga o te manavaofa, i te vaha o te u selupino e lua ae e tutuu i oluga o te aleka, e au tuku atu anai kia koe aku fakatotonu fuli ki te u fanau a Iselaele.
Te laupapa o te u pane tapu
23E ke fai anai he laupapa aki te akasia; ko tona loa ko te meta e tahi, pea ko tona laulahi ko satimeta e nimagofulu, pea ko tona maoluga ko satimeta e fitugofulu ma nima. 24E ke aofi anai te laupapa aki te aulo maa, pea e ke fai anai he tapatapa aulo ke takatakai ai. 25E ke fai anai ki ai he tapatapa takatakai, ko tona laulahi ko te alofi nima e tahi; pea e ke fai anai ki ai he tapatapa aulo ke takatakai aki. 26E ke fai anai ki te laupapa ni kavei aulo e fa, pea e ke fakapikipiki anai te u kavei ki ona tuliki e fa, ae e tuu i ona vae e fa. 27E tuu fakatuhatonu anai te u kavei mo te u tapa, ke fakaulu ai te u amo ae ke amo aki te laupapa. 28E ke fai anai te u amo aki te akasia, pea e ke aofi anai naua aki te aulo; ke amo aki te laupapa. 29E ke fai anai ona pa, mo ona ipu, mo ona kalise, pea mo ona ipu liliki ki te lolo; e ke fai anai te u mea aia aki te aulo maa. 30E ke tuku tuumau anai i oku mua, i oluga o te laupapa, te u pane taputapu.
Te tuuaga malama aulo
31E ke fai anai he tuuaga malama aulo maa; e fau anai te tuuaga malama aia aki te aulo tuki; ko tona tafito, mo tona sino, mo ona ipu liliki, mo ona fuai pome, pea mo ona matala, e fau anai aki he potu aulo e tahi. 32E mavae anai te u vaa e ono mai ona fahai, ko te u vaa e tolu i te tahi fahai o te tuuaga malama, pea ko vaa e tolu i te fahai ake ae o te tuuaga malama. 33E ke fai anai i te vaa e tahi ni kalise e tolu o hage ko te fuai amatie, mo ni fuai pome, mo ni matala; pea e toe feia anai ki te u vaa ae e ono o te tuuaga malama. 34I te sino o te tuuaga malama, e ke fau anai i ai ni kalise e fa o hage ko te foi amatie, mo ona foi pome, pea mo ona matala. 35E i ai anai he fuai pome e tahi i lalo o te u vaa ae e lua, ae e mavae mai te sino o te tuuaga malama; pea mo he tahi foi fuai pome i lalo age o ihi vaa e lua; pea mo he tahi foi fuai pome i lalo o ae ake vaa e lua; e fena anai ki te u vaa e ono ae e mavae mai te tuuaga malama. 36E fai anai ki te potu aulo e tahi te u fuai pome, mo te u vaa o te tuuaga malama; e fai katoa anai ia aki te aulo maa kua tuki. 37E ke fai anai ona malama e fitu, o fakatuu i oluga, ke malama ki mua. 38E ke fai anai aki te aulo maa ona kosi vavae mo ona tanakiaga lefulefu. 39E too anai he foi tenalio aulo maa e tahi ke fai ai te tuuaga malama mo ona mea gaue fuli. 40Sio, pea ke fai te u mea fuli o mulimuli ki tona fakatata ae nee fakaha kia koe i te mouga.
Currently Selected:
EKESOTE 25: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
