EKESOTE 24
24
Moisese i te mouga o Sinai
1Nee ui leva e te Atua kia Moisese: Hake ki te Eteleno, ia koe mo Alone, mo Natape, mo Apiu, mo he toko fitugofulu i te kau matua o Iselaele; pea e kotou punonou anai mai mamao. 2E fakaovi anai ia Moisese toko tahi ki te Eteleno; e mole anai fakaovi mai natou ae, pea e mole hahake anai te hahai ki te mouga.
3Nee alu leva ia Moisese o fakaha ki te hahai te u palalau fuli a te Eteleno mo ana lao fuli. Pea nee tali fakatahi leva e te hahai katoa: E matou fai anai te u mea fuli ae kua lea ki ai te Eteleno.
4Nee tohi leva e Moisese te u folafola fuli a te Eteleno. Pea nee ala uhuuhu ia ia o fakatuu he aletale i lalo o te mouga, pea nee ina tanaki leva ni maka e hogofulu ma lua o fakatatau ki te u famili e toko hogofulu ma lua o Iselaele. 5Nee ina fekaui leva ni tama tupulaga o te u fanau a Iselaele, ke natou momoli ki te Eteleno ni failaulau, pea ke natou tamatei ni pipi tagata ki ni sakilifisio fakafetai. 6Nee too leva e Moisese te vaelua o te toto o te u manu o tuku ki ni pesini, kae nee ina liligi leva te vaelua ae ki oluga o te aletale. 7Nee ina too leva te tohi o te hai o lau i mua o te hahai; pea nee natou ui leva: E matou fai te u mea fuli ae kua lea ki ai te Eteleno, pea e matou fakalogo anai ki ana folafola. 8Nee too leva e Moisese te toto o afuhi ki te hahai, o ui: Ko te toto aeni o te hai ae kua fai e te Eteleno mo koutou o mulimuli ki ana folafola fuli.
9Nee hake leva ia Moisese, mo Alone, mo Natape, mo Apiu, pea mo he toko fitugofulu o te kau matua o Iselaele. 10Nee natou sisio leva ki te Atua o Iselaele; i lalo o ona vae, nee hage ko he laui sioata ae nee faliki aki te safile*, pea nee uui o hage ko te lagi moka laulelei haohaoa. 11Nee mole hiki leva e te Eteleno tona nima ki te u fakafofoga o te u fanau a Iselaele. Nee natou sisio leva ki te Atua, pea nee natou kakai mo iinu leva.
12Nee ui leva e te Eteleno kia Moisese: Hake mai kia au i te mouga, pea ke nofo i ai; e au foaki atu anai kia koe ni laui maka, te lao mo te u fakatotonu ae nee au tohi ke akoi ai natou. 13Nee tuu ake leva ia Moisese, mo Sosue ae nee faifekau kia ia, pea nee hake leva ia Moisese ki te mouga o te Atua. 14Nee ina ui leva ki te kau matua: Koutou talitali kia maua i heni, o kaku ki tama toe liliu mai kia koutou. Koeni, e nofo Alone mo Ulu, mo koutou; kapau e i ai he mea a he tagata ke fai, ke alu ia ia o fakaha kia naua.
15Nee hake leva ia Moisese ki te mouga, pea nee uufi leva e te ao te mouga. 16Nee hifo leva te kololia o te Eteleno ki te mouga o Sinai, pea nee uufi leva e te ao ia ia ia aho e ono. Pea i te fitu aho, nee paui leva te Eteleno kia Moisese mai te ao. 17Nee ha leva te kololia o te Eteleno kia mata o te u fanau o Iselaele o hage ko he afi kakaha i te tumutumu o te mouga. 18Nee ulu leva ia Moisese ki lotomalie o te ao, o hake ki te mouga. Pea nee nofo leva ia Moisese i te mouga ia aho e fagofulu mo po e fagofulu.
Currently Selected:
EKESOTE 24: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
