Tohi a Paulo ki te kau EFESO 5
5
Mauli i te malama
1Koia kotou liliu ko te u faifaitaki o te Atua, o hage ko he u fanau ofaina; 2pea kotou haele i te ofa o faifaitaki kia Kilisito ae nee ofa kia tatou, pea nee ina foaki ia ia totonu ki te Atua o uhiga mo tatou, o hage ko he molaga mo he sakilifisio magoni ki te Atua.
3Ke aua pe naa palalaui ia koutou te feauaki, mo te u mea uli fuli, mo te manumanu, koteuhi e mole gali ia mo te kau sagato. 4Ke aua naa logo ia koutou ki ni palalau kovi, mo ni palalau fakavale, mo ni fakahuahua, koteuhi e mole gali te u mea aia mo te fakaapaapa; kae ke logo tafito ki ni fakafetai. 5Koteuhi, ke kotou iloi, e mole he tagata feauaki, mo he tagata agauli, mo he tagata manumanu, (ko tona uhiga e tauhi taulaatua) e ina mau tofiga te puleaga o Kilisito mo te Atua. 6Ke aua naa kakaai koutou e he tahi aki ni palalau vaiga; koteuhi ko te u mea aena nee tupu ai te hifo o te hauhau o te Atua ki te u fanau logogataa. 7Koia ke aua pe naa kotou fakatahi i he mea mo natou,
8koteuhi i mua nee kotou fakapouli, kae i te temi nei kua kotou malama i te Aliki. Koutou haele o hage ko ni fanau o te malama! 9Koteuhi ko te fua o te malama ko te u agalelei fuli, mo te u faitotonu fuli, pea mo te u mooni fuli. 10Kotou kumi te mea ae e lelei ki te Aliki; 11kae aua naa kotou kau ki te u gaue hee fua a te fakapouli, kae kotou aumai natou ki te malama. 12(Koteuhi e fakaufiufi te palalau ki te mea ae e natou fai fakafufu;) 13kae kapau e fakaha te u mea fuli aena ki te malama, e ha anai tonatou natula totonu, koteuhi ko te u mea fuli e fakaha fena e liliu o malama. 14Koia e ui ai:
Ke ke alaala, ia koe ae e moe,
Ke ke tuu mai te kau mate,
Pea e fakamalamai anai ia koe e Kilisito.
15Koia kotou tokaga aupito ki takotou haele, ke aua naa kotou hage ko he kau vale, kae kotou hage ko he kau poto; 16kotou totogi te temi, koteuhi kua kovi te u aho. 17Koia ke aua naa kotou hala atamai, kae ke koutou mahino ki te finegalo o te Aliki. 18Aua naa kotou konahia i te vino, ko te mauli fakavale aia; kae ke kotou fonu i te Laumalie. 19Kotou fefakalotomalohiaki aki ni pesalemo, mo ni katiko, pea mo ni hiva fakalaumalie, o kotou hiva mo fakavikiviki ki te Aliki i tokotou loto katoa. 20Kotou fakafetai tuumau ki te Atua te Tamai i te u mea fuli, i te huafa o totatou Aliki ko Sesu-Kilisito. 21Kotou fefakalogoaki ia koutou i te fakaapaapa kia Kilisito.
Te famili fakakilisitiano
22U fafine ohoana, ke kotou tahi fakalogo ki tona ohoana, o fakatatau ki te Aliki; 23koteuhi ko te tagata ko te pule ia o te fafine, o hage ko Kilisito ko te pule ia o te Ekelesia, ae ko tona sino, pea ko ia foki ko tona Fakamauli. 24Kae, o hage ko te Ekelesia ae e fakalogo kia Kilisito, ke fakalogo foki te fafine ki tona ohoana i te u mea fuli.
25U tagata ohoana, koutou tahi ofa ki tona ohoana, o hage ko Kilisito nee ofa ki te Ekelesia, pea nee ina foaki ia ia totonu o uhiga mo ia, 26ke ina fakamaonioni ia, mo ina fakamaa ia, pea mo ina fufulu ia aki te vai o te folafola, 27koteuhi ke ina fakaha ia kia ia, ko te Ekelesia fakakololia, hee uli, hee fefe, hee maimoa, kae maonioni mo hee mele. 28E tonu ke ofa fena te tagata ki tona ohoana o hage ko tona sino totonu. Ko te tagata ae e ofa ki tona ohoana e ofa kia ia totonu. 29Koteuhi e heeki he tagata kua fehia ki tona sino totonu, kae e ina fafaga ia mo tokaga ki ai, o hage ko Kilisito ki te Ekelesia, 30he ko te u kogasino tatou o tona sino. 31Koia e mavae anai te tagata mai tana tamai mo tana fae, pea e pipiki anai ia ki tona ohoana, pea e na liliu anai ko he kakano e tahi. 32E lahi te misitelio aeni; pea e au fakaha ko te mea aeni e uhiga mo Kilisito pea mo te Ekelesia. 33Kae e toe uhiga foki mo koutou: Ke tahi ofa te tagata ki tona ohoana o hage kia ia totonu, pea ke fakaapaapa te fafine ki tona ohoana.
Currently Selected:
Tohi a Paulo ki te kau EFESO 5: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
Tohi a Paulo ki te kau EFESO 5
5
Mauli i te malama
1Koia kotou liliu ko te u faifaitaki o te Atua, o hage ko he u fanau ofaina; 2pea kotou haele i te ofa o faifaitaki kia Kilisito ae nee ofa kia tatou, pea nee ina foaki ia ia totonu ki te Atua o uhiga mo tatou, o hage ko he molaga mo he sakilifisio magoni ki te Atua.
3Ke aua pe naa palalaui ia koutou te feauaki, mo te u mea uli fuli, mo te manumanu, koteuhi e mole gali ia mo te kau sagato. 4Ke aua naa logo ia koutou ki ni palalau kovi, mo ni palalau fakavale, mo ni fakahuahua, koteuhi e mole gali te u mea aia mo te fakaapaapa; kae ke logo tafito ki ni fakafetai. 5Koteuhi, ke kotou iloi, e mole he tagata feauaki, mo he tagata agauli, mo he tagata manumanu, (ko tona uhiga e tauhi taulaatua) e ina mau tofiga te puleaga o Kilisito mo te Atua. 6Ke aua naa kakaai koutou e he tahi aki ni palalau vaiga; koteuhi ko te u mea aena nee tupu ai te hifo o te hauhau o te Atua ki te u fanau logogataa. 7Koia ke aua pe naa kotou fakatahi i he mea mo natou,
8koteuhi i mua nee kotou fakapouli, kae i te temi nei kua kotou malama i te Aliki. Koutou haele o hage ko ni fanau o te malama! 9Koteuhi ko te fua o te malama ko te u agalelei fuli, mo te u faitotonu fuli, pea mo te u mooni fuli. 10Kotou kumi te mea ae e lelei ki te Aliki; 11kae aua naa kotou kau ki te u gaue hee fua a te fakapouli, kae kotou aumai natou ki te malama. 12(Koteuhi e fakaufiufi te palalau ki te mea ae e natou fai fakafufu;) 13kae kapau e fakaha te u mea fuli aena ki te malama, e ha anai tonatou natula totonu, koteuhi ko te u mea fuli e fakaha fena e liliu o malama. 14Koia e ui ai:
Ke ke alaala, ia koe ae e moe,
Ke ke tuu mai te kau mate,
Pea e fakamalamai anai ia koe e Kilisito.
15Koia kotou tokaga aupito ki takotou haele, ke aua naa kotou hage ko he kau vale, kae kotou hage ko he kau poto; 16kotou totogi te temi, koteuhi kua kovi te u aho. 17Koia ke aua naa kotou hala atamai, kae ke koutou mahino ki te finegalo o te Aliki. 18Aua naa kotou konahia i te vino, ko te mauli fakavale aia; kae ke kotou fonu i te Laumalie. 19Kotou fefakalotomalohiaki aki ni pesalemo, mo ni katiko, pea mo ni hiva fakalaumalie, o kotou hiva mo fakavikiviki ki te Aliki i tokotou loto katoa. 20Kotou fakafetai tuumau ki te Atua te Tamai i te u mea fuli, i te huafa o totatou Aliki ko Sesu-Kilisito. 21Kotou fefakalogoaki ia koutou i te fakaapaapa kia Kilisito.
Te famili fakakilisitiano
22U fafine ohoana, ke kotou tahi fakalogo ki tona ohoana, o fakatatau ki te Aliki; 23koteuhi ko te tagata ko te pule ia o te fafine, o hage ko Kilisito ko te pule ia o te Ekelesia, ae ko tona sino, pea ko ia foki ko tona Fakamauli. 24Kae, o hage ko te Ekelesia ae e fakalogo kia Kilisito, ke fakalogo foki te fafine ki tona ohoana i te u mea fuli.
25U tagata ohoana, koutou tahi ofa ki tona ohoana, o hage ko Kilisito nee ofa ki te Ekelesia, pea nee ina foaki ia ia totonu o uhiga mo ia, 26ke ina fakamaonioni ia, mo ina fakamaa ia, pea mo ina fufulu ia aki te vai o te folafola, 27koteuhi ke ina fakaha ia kia ia, ko te Ekelesia fakakololia, hee uli, hee fefe, hee maimoa, kae maonioni mo hee mele. 28E tonu ke ofa fena te tagata ki tona ohoana o hage ko tona sino totonu. Ko te tagata ae e ofa ki tona ohoana e ofa kia ia totonu. 29Koteuhi e heeki he tagata kua fehia ki tona sino totonu, kae e ina fafaga ia mo tokaga ki ai, o hage ko Kilisito ki te Ekelesia, 30he ko te u kogasino tatou o tona sino. 31Koia e mavae anai te tagata mai tana tamai mo tana fae, pea e pipiki anai ia ki tona ohoana, pea e na liliu anai ko he kakano e tahi. 32E lahi te misitelio aeni; pea e au fakaha ko te mea aeni e uhiga mo Kilisito pea mo te Ekelesia. 33Kae e toe uhiga foki mo koutou: Ke tahi ofa te tagata ki tona ohoana o hage kia ia totonu, pea ke fakaapaapa te fafine ki tona ohoana.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland