Lua tohi a Paulo ki te kau TESALONIKA 2
2
1O uhiga mo te toe liliu mai o totatou Aliki ko Sesu-Kilisito pea mo tatatou fakatahi mo ia, e matou kole atu, u tehina, 2ke aua naa vavataga faigafua takotou fakakaukau, pea ke aua naa kotou oho noa, o uhi ko he sio fakalaumalie, pee ko he kikite, pee ko he tohi maia matou, o hage kua hoko te aho o te Aliki. 3Ke aua naa kakaai koutou e he tahi i he mea pe; koteuhi e maua ke hoko te aposetasia* i mua pea ke fakaha te tagata o te agahala, te foha o te malaia, 4te tagata agatuu ae e malaga ki oluga o te u mea fuli ae e higoa ko te Atua, pee ko te u mea fuli ae e atolasio ki ai; pea e kaku ia o nofo o hage ko te Atua i te fale tapu o te Atua, o fakaha ia ia totonu ko te Atua.
5Pe e mole kotou manatui nee au fakaha atu te u mea aia kia koutou i te temi nee au nofo ai mo koutou? 6Pea e kotou iloi te mea ae e ina taofi ia i te temi nei, ke ha ia i tona temi totonu. 7Koteuhi kua gaue nei te misitelio o te agahala; e tonu pe ke puli ia ae e ina taofi ia i te temi nei. 8Pea ka osi ia, e ha anai te tagata agakovi, ae e tamatei anai ia e te Aliki Sesu aki te tukumanava o tona gutu, pea mo maumaui anai ia aki te gigila o tana toe liliu mai. 9E fai anai te ha a te tagata agatuu aia i te malohi o Satana, aki ni milakulo kehekehe, mo ni fakailoga, pea mo ni mea fakamanamana loi, 10pea mo te u kaka fuli o te agahala kia natou ae e mamate, he nee mole natou tali te ofa ki te mooni ke fakamauli ai natou. 11Koia e fekaui mai anai e te Atua he malohi kaka kia natou, ke natou tui ki te loi, 12pea ke tautea ai natou fuli ae nee mole tui ki te mooni, kae nee fiafia ki te hee agatonu.
Fakamalohii o te kau Tesalonika
13Kia matou, u tehina ofaina i te Aliki, e tonu ke matou fakafetai tuumau ki te Atua o uhiga mo koutou, koteuhi nee filifili koutou e te Atua talu mai te kamataaga ki te haofaki, aki te fakamaa a te Laumalie pea mo te tui ki te mooni. 14Ko te mea aia nee ina paui koutou ki ai aki tamatou Evaselio, ke kotou mau te kololia o totatou Aliki ko Sesu-Kilisito.
15Koia, u tehina, koutou tuu malohi, pea kotou taofi te u akonaki nee kotou tali, pee i tamatou akonaki, pee i tamatou tohi. 16Ko totatou Aliki ko Sesu-Kilisito totonu, pea mo te Atua ko tatatou Tamai, ae nee ofa kia tatou, pea nee ina foaki kia tatou i tona kalasia he fakafimalie heegata pea mo he falala lelei, 17ke na fakafimaliei okotou loto mo na fakamalohii koutou i te u gaue lelei fuli pea mo te u palalau lelei fuli!
Currently Selected:
Lua tohi a Paulo ki te kau TESALONIKA 2: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
