Uluaki tohi a Paulo kia TIMOTEO 2
2
Faikole o uhiga mo tagata fuli
1Koia e au fakalotomalohii koutou, i mua o te mea fuli, ke fai he u kole, mo he u hufaki, mo he u tagi, pea mo he u fakafetai, o uhiga mo te tagata fuli, 2o uhiga mo te u hau pea mo natou fuli nee hiki e he tuulaga, koteuhi ke tou mau he mauli tokalelei mo fimalie, i te katoa e te tauhi fakalotu pea mo te agatonu. 3E lelei pea e aoga te mea aia ia mua o te Atua totatou Fakamauli, 4ia ia ae e loto ke fakamauli te tagata fuli, pea ke natou kaku ki te iloi katoa o te mooni. 5Koteuhi ko te Atua e tahi, mo te fakafofoga e tahi i te vaha o te Atua mo te tagata, Sesu-Kilisito tagata, 6ae nee ina foaki ia ia totonu ke totogi ai te tagata fuli. Koena te fakamooni nee ina tuku i tona temi totonu. 7Uhi ko te mea aia nee fakanofo ai au ko he tagata faiakonaki, pea mo he apositolo (e au fakaha te mooni, e mole au loi), ke akonaki ki te hahai pagani o uhiga mo te tui pea mo te mooni.
8Koia e au loto ai ke faikole te tagata fuli i te kogamea fuli, o hiki he u nima e maa, hala ita mo hala manatu kovi.
Mauli o te fafine i te Ekelesia
9E au loto foki ke teu te u fafine ki ni kofu e tuha mo natou, mo mata fakaapaapa pea mo mata fiamalalo, kae aua naa natou teuteu aki ni kaui fi, mo ni aulo, mo ni fuai kahoa, pea mo ni teu totogi kovi, 10kae ke natou teu aki ni gaue lelei, o hage ko he u fafine e natou fakaha e natou tauhi ki te Atua. 11Ke tali e te fafine te akonaki i te fakalologo, mo he loto fakamalalo katoa. 12E mole au fakagafua ke akonaki te fafine, pee ke ina too te pule a te tagata; kae e tonu ke nofo fakalogologo ia. 13Koteuhi nee uluaki fakatupu ia Atama, kae nee muli ia Eva; 14nee mole kakaai ia Atama, kae ko te fafine ae nee kakaai pea nee to ki te logogataa. 15Kae logo ai te mea aia e fakamauli anai te fafine i tana liliu ko he fae, mo kapau e kataki fualoa ia i te fakapotopoto, mo te tui, mo te ofa, pea mo te maonioni.
Currently Selected:
Uluaki tohi a Paulo kia TIMOTEO 2: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
