Loma 11
11
Na leaise tiaki e le Atua lona kakai
1E kau pati loa : Pe kua tiaki e le Atua lona kakai ? E leai ai ! Talie ko au foki, e kau Iselaele, mei le sakoga o Apalaamo, mei le faasiga o Pesamino. 2Na leaise tiaki e le Atua lona kakai, leia na iloa fakatomua e ia. Pe leaise kotou iloa le nea e fakasa e le Tosi o uiga mo Elia, lana tagi leia na fai ki le Atua o uiga mo Iselaele : 3Aliki, kua lotou tamate au polofeta, kua lotou maumaui ou aletale ; ko au toka tasi koi toe, ti e lotou afa ke too loku mauli ? 4Kae kolea le tali a le Atua ? Kua kau fakatoe kiate au se kau tagata e tino afe e fitu ala na leikiaise peluki olatou tuli i mua o Paale. 5Ti e toe fenaaki foki i le temi nei, e i ai se toetoega o mulimuli ki le filifili o le kalasia. 6Ti kapau na filifili i le kalasia ti e leaise koi filifili loa i gaoi ; talie kapau e leaise fenaaki, ko le kalasia e leaise ko se kalasia loa. Ti kapau na filifili i gaoi ti e leaise ko se kalasia loa, talie kapau e leaise fenaaki, ko le gaoi e leaise ko se gaoi loa.
7Kolea koia ? Ko le nea leia na afa e Iselaele na leaise maua e ia, kae ko le kau filifiliia kua lotou maua a ia, ti ko la ake kua fakafefeka latou,
8o mulimuli ki le nea leia e tuu i le Tosi :
Kua tuku e le Atua kia latou se loto tulemoe,
Ni mata ke aua na tio,
Ti mo ni taliga ke aua na logo,
Okaku mai ki le aso nei.
Ti na pati Tavite :
9 Ke liliu lolatou laupapa ko se masele kia latou,
Ko se kupega, ko se nea fakatupu siga, ti ko se totogi !
10 Ke fakapouli olatou mata ke aua na lotou tio,
Ti ke piko tuumau olatou tua !
Fakatokaga ki le kau pagani
11Koia e kau pati ai : Pe kua lotou tukia ke lotou siga o talu oki ? E leai ai ! Kae, i lolatou siga, kua maua ai le fakamauli e le kau pagani ke tupu ai le finenonofo o le kau Iselaele. 12Ti kapau na liliu lolatou faisala ko le fakakoloaaga o le malama nei, ti ko lolatou fakamativa ko le fakakoloaaga a ia o le kau pagani, ti e feaki ake loa le lasi o koloa mo ka lotou tafoki fuli loa. 13E kau fakasa atu kia koutou, kau pagani : i loku uiga ko le apositolo o le kau pagani, e kau fakafiafia i laku gaoi fakaapositolo : 14E kau fakaamu ke fakatupu i ai, mo kapau e feala, le finenonofo o latou o loku lanu, ti ke saofaki ai ni iki. 15Talie kapau ko lolatou tiaki, ko le fakatokatoka a ia o le malama nei mo le Atua, e feaki ake loa lolatou toe aumai ? Ko le mauli loa aia kia latou ala na mamate ?
16Talie kapau e maokioki a uluaki fua, e toe fenaaki foki mo le fua katoa ; ti kapau e maokioki le aka, e toe fenaaki foki mo laa. 17Kae kapau na tuuti ni iki o laa, ti kapau ko koe, leia na olive vao, kua fakapipiki a koe ki lolatou pikiaga, ti kapau kua ke kau ki le aka leia e fagai ia le oliveto, 18aua na ke tio fakaveli ki la ake na tuuti. Kapau e ke nekenekea, ke ke iloa e leaise ko koe leia e mauli ai le aka, kae ko le aka leia e ke mauli ai. 19E ke pati loa : Na tuuti a laa o tupu ke fakapipiki ai au ki le aka. 20E tonu le nea a ia ; na tuuti latou o tupu ko lolatou tui gataa, ti ko koe, e ke tuu i le tui. Aua na ke fia taualuga, kae ke ke i loa ; 21talie kapau na leaise fakasao e le Atua a laa totonu, e leaise fakasao loa e ia a koe foki. 22Koia tio ki le agamalie mo le itaita o le Atua : itaita kia latou kua siga, ti agamalie kiate koe, mo kapau e ke nofo tuumau i le agamalie lena ; ka leai, ti e toe tuuti loa mo koe foki. 23Ti ko latou foki, kapau e leaise lotou tuumau i lolatou tui gataa, ti e toe fakapipiki loa latou ; talie e mafimafi le Atua ke toe fakapipiki ia latou. 24Kapau ko koe, na tuuti a koe mei le oliveto vao, o mulimuli ki lou natula totonu, ti kua fakapipiki a koe, o fakafesagai ki lou natula totonu, ki le oliveto maalaala, e toe tasi ake loa le fakapipiki o latou, o mulimuli ki lolatou natula totonu, ki lolatou oliveto totonu.
E saofaki loa Iselaele mo ka fakasemala a ia
25Talie e leaise kau loto, fetaina, ke kotou fakapouli ki le misitelio leinei, o tupu ke aua na kotou fia nealasi : kua vilo se potu o Iselaele ki le fakafefeka, o kaku ki le temi leia e katoa ai loa le kau pagani ala e tonu ke ulu ki le fakamauli.
26Ti o fakamauli loa a Iselaele katoa, o mulimuli ki le nea e tuu i le Tosi :
E au loa le fakamauli mei Sione,
Efakamaliu loa e ia meia Sakopo a agasala ;
27Ti e fakasoko loa laku sai mo latou, I le aso leia e kau too ai loa alatou agasala.
28O uiga mo le Evaselio, kua lotou fili o tupu ko koutou ; kae o uiga mo le filifili, e alofaia latou o tupu ko olatou tamana. 29Talie e leaise toe fakasemala le Atua ki ana nea alofa ala kua soli ti mo lana kalaga. 30Ko koutou, i mua na kotou patigataa ki le Atua ; kae i le temi nei kua kotou maua le manavaalofa o le Atua, o tupu ko lolatou patigataa. 31Ti e tatau foki mo latou, i le temi nei kua lotou patigataa, o tupu, i le manavaalofa leia kua fai atu e le Atua kia koutou, ke feala foki kia latou ke lotou iloa i temi nei le manavaalofa leia kua fai atu kia koutou. 32Talie kua tuku e le Atua a tagata fuli ki le patigataa, o tupu ke fakasa e ia lona manavaalofa ki tagata fuli.
Poto lee tatau o le Atua
33Oiau ! le loloto o koloa, mo le poto, ti mo le iloa o le Atua ! Ko ai e mafai ke fakamatala ia ana fakamaau, ti ko ai e mafai ke iloa ia ona ala ! Ofaipe le fakasa e le Tosi
34 Ko ai na iloa ia le manatu a le Aliki,
Pe ko ai na ako ia a ia ?
35 Ko ai na uluaki soli kiate ia, ke toe totogi ake e ia kiate ia ?
36Ko nea fuli e tupu meiate ia, e maua iate ia, ti e kaku kiate ia. Kiate ia le kololia i sekulo fuli ! Amene !
Currently Selected:
Loma 11: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
