Numelo 8
8
Fakatuutuu o malama i le satelie
1Na masau loa le Eteleno kia Moisese, o pati : 2Masau kia Alone, ti ke pati loa kiate ia : ka ke fakatuutuu ia loa a fa malama, tokaga ke mu a fa malama e fitu ki mua o le tuuaga malama, 3Na fai loa Alone ki ai : na fakatuutuu loa e ia a fa malama ke mu ki mua o le tuuaga malama, o mulimuli ki le fakatotonu a le Eteleno. 4Na fai feneeki loa le tuuaga malama : na fai a ia ki le potu aulo e tasi leia na tuki ki le amale, mei le vae o kaku ki ona sei laakau. Na fai loa le tuuaga malama o fakatatau ki le paaki leia na fakatio Moisese ki ai e le Eteleno.
Fakatapu o le kau Levi
5Na masau loa le Eteleno kia Moisese, o pati : 6Ke ke vaei kese le kau Levi mei fanau a Iselaele ti ke fakamea loa latou. 7Ko leinei le nea leia ke ke fai loa ke fakamea ai latou. E ke fai loa kia latou se afusi ki le vai o le fakamea ; e lotou tele loa a fulu i olatou kuaga katoa ti e lotou fo loa olatou kofu, ti e lotou mea loa. 8E lotou too loa se pipi tagata muli, mo le moliga falina leia kua lusi fakatasi mo le lolo, ti e lotou too loa mo se tasi ake a pipi tagata muli, ki le sakilifisio fakamalie. 9E ke fakafeofi ake loa le kau Levi ki mua o le falela tapu, ti e ke fakatasii ake loa le kakai katoa o Iselaele. 10E ke fakafeofi ake loa le kau Levi ki mua o le Eteleno ; ti e teki loa e fanau a Iselaele olatou lima ki le kau Levi. 11E fakamaliuliu loa e Alone le kau Levi ki fetuu mo fetuu i mua o le Eteleno, ofaipe se moliga a fanau o Iselaele ; ti e fakatapui loa latou ke fakasausau ki le Eteleno. 12E teki loa e le kau Levi olatou lima ki ulu o pipi tagata e lua ; ti e momoli loa se tasi a pipi ki le sakilifisio o le fakamalie, ti ko se tasi a pipi ki le failaulau, ke fai ai le fakamalie ki le kau Levi. 13E ke fakatutuu loa le kau Levi i mua o Alone mo ona vosa, ti e ke fakamaliuliu loa latou ki fetuu mo fetuu ofaipe se moliga ki le Eteleno. 14E ke vaei kese loa le kau Levi mei fanau a Iselaele ; ti e kau maua loa le kau Levi ma aku. 15I le oki o le nea lena, e au loa le kau Levi o fai le tausi o le falela tapu. Ko lena le nea leia e tonu ke ke fai ke fakamea ai latou ti ke fakatapui ai latou ofaipe se moliga. 16Talie e soli mai loa latou fuli kiate au mei loto malie o fanau a Iselaele : kua kau too latou ma aku o fetogi ai a uluaki tupu, a uluaki tupu fuli o fanau a Iselaele. 17Talie e kau maua loa a uluaki tupu fuli o fanau a Iselaele, tatau fai i tagata mo manu ; i le aso leia na kau tamate ai a fanau uluaki fuli o le fenua ko Esipito, na kau fakatapui latou ma aku. 18Ti na kau too le kau Levi o fetogi ai a fanau uluaki fuli o fanau a Iselaele. 19Kua kau soli le kau Levi fuli kia Alone mo ona vosa, mei loto malie o fanau a Iselaele, ke lotou fai le tausi a fanau o Iselaele i le falela tapu, ke lotou fai le fakamalie ki fanau a Iselaele, ti ke aua na soko loa se malaia ki fanau a Iselaele, o tupu na lotou fakafeofi ki le sagatualio.
20Na fai loa e Moisese, mo Alone, mo le kakai katoa o Iselaele, ki le kau Levi, a fakatotonu fuli ala na tuku e le Eteleno kia Moisese o uiga mo le kau Levi ; na fai fenaaki loa kia latou e fanau a Iselaele. 21Na fakamea loa le kau Levi ti na lotou fo loa olatou kofu ; ti na fakamaliuliu loa latou e Alone ki le fetuu mo le fetuu ofaipe se moliga i mua o le Eteleno, ti na fai loa e ia le fakamalie kia latou, ke fakamea ai latou.
22I le oki o le nea lena, na ano loa le kau Levi o fai lalatou tausi i le falela tapu, i mua o Alone mo ona vosa, o mulimuli ki le nea leia na fakatotonu e le Eteleno kia Moisese o uiga mo le kau Levi.
23Na masau loa le Eteleno kia Moisese, o pati : 24Ko leinei le nea o uiga mo le kau Levi. Mei le fetuu kau lua tupu lima o fai ki aluga, e ulu loa Levi fuli ki le tausi o le falela tapu, o too se gaoi. 25Kae i le fetuu kau lima, e mavae loa a ia i lana gaoi, e leaise toe tausi loa a ia. 26E tokoi loa a ia ki ona fetaina i le falela tapu, o taupau a nea ala kua tuku ke lotou tokaga ki ai ; kae e leaise toe fai loa e ia se tausi. E ke fai fenaaki loa ki le kau Levi o uiga mo alatou gaoi.
Currently Selected:
Numelo 8: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
