Numelo 4
4
Gaoi o vosa o Levi
1Na masau loa le Eteleno kia Moisese mo Alone, o pati : 2Kolua tosi a tagata Levi fuli ala e ifo meia Keati, o mulimuli ki olatou famili, o mulimuli ki fale olatou tamana, 3mei le fetuu kau tolu o fai ki le fetuu kau lima, latou fuli ala kua aoga ki le fai o se gaoi i le falela tapu.
4Ko nei loa a gaoi a vosa o Keati, i le falela tapu : e latou tokaga loa ki nea tapu. 5I le mavae o le nofolaga, e au loa Alone mo ona vosa o vete le lito tapono o le sagatualio, ti e lotou fakapulou loa ki ai le aleka o le fakamaoki ; 6Ti e lotou teki loa i ona aluga le la kilii kakaututuu, ti e lotou folasi loa i aluga se kie usi katoa, ti e lotou fakapipiki loa a laakau amo o le aleka tapu. 7E lotou folasi loa se kie usi i aluga o le laupapa o pane tapu, ti e lotou teki loa ki aluga a pa, mo ipu lalasi, mo ipu loloto, ti mo kalise ki lipasio ; e tuku tuumau loa a pane i ai. 8E lotou folasi loa i aluga o nea ana se kie fului ovi kula, ti e lotou uufi loa a nea fuli ki se kie kilii kakaututuu ; ti e lotou fakapipiki loa a laakau amo o le laupapa tapu. 9E lotou kofu loa le tuuaga malama ki se kie usi ti mo ona nea gaoi fuli, mo ona malama, mo ona koti vavai, mo ona tanakiaga mugalafu, ti mo ona fagu lolo fuli, 10ti e lotou tuku loa a nea fuli ana ki se tasi a kie kilii kakaututuu, ti e lotou teki loa le kofukofuga katoa ki aluga o le fata. 11E lotou folasi loa se tasi a kie usi ki aluga o le aletale aulo, ti e lotou kofu loa a ia ki se tasi a kie kilii kakaututuu ; ti e lotou fakapipiki loa ona laakau amo. 12E lotou tanaki loa a nea gaoi fuli o le sagatualio, ti e lotou kofu loa latou ki se kie usi, ti e lotou uufi loa a nea fuli ana ki se kie kilii kakaututuu ; ti e lotou teki loa a nea ana ki le fata. 13E lotou too loa a mugalafu o le aletale o failaulau, ti e lotou folasi loa i aluga se kie kula fakapouli. 14E lotou tanaki loa i aluga ona nea gaoi fuli, a ipu tukuaga afi, mo suki lalasi, mo supeti, mo kalise, ti e lotou folasi loa i aluga se tasi a kie kilii kakaututuu ; ti e lotou fakapipiki loa a laakau amo o le aletale. 15Ka oki loa le kofu e Alone mo ona vosa o nea tapu mo nea gaoi fuli o le falela tapu, e ano loa a vosa o Keati, i le kamata o le fanoga, o amo latou ; kae e leaise tonu ke lotou lave loa ki se nea tapu, talie e lotou mamate loa. Ko lena le gaoi o vosa o Keati i le falela tapu.
16Ko Eleasale, vosa o le tagata faisakilifisio ko Alone, e tokaga loa ki le lolo o le tuuaga malama, mo le kaloni fakamanogi, mo le moliga nea kai o aso taki tasi, ti mo le lolo tapu ; ko ia leia e leoleo loa ki le falela tapu mo nea fuli i loto, tatau fai a nea tapu mo nea gaoi tapu.
17Na masau loa le Eteleno kia Moisese mo Alone, o pati : 18Aua na ke tuku ke puli a famili o Keati i loto malie o le kau Levi. 19Kotou fai loa le nea leinei kia latou, o tupu ke lotou mauli ti ke aua na lotou mamate loa, mo ka lotou fakafeofi loa ki se nea tapu : e au loa Alone mo ona vosa o fakatuu le tagata taki toka tasi ki lana gaoi mo lana kavega.
20E leaise lotou ulu loa o tio ki le kofu o nea tapu, talie e lotou mate loa.
21Na masau loa le Eteleno kia Moisese, o pati : 22Ke ke tosi foki a vosa o Kelesoni, o mulimuli ki fale o olatou tamana, o mulimuli ki olatou famili ; 23e ke tosi loa latou, mei le fetuu kau tolu o fai ki aluga ki le fetuu kau lima, latou fuli ala kua aoga ki le fai o se gaoi i le falela tapu.
24Ko leinei le gaoi o faasiga o Kelesoni, alatou gaoi mo alatou kavega : 25E lotou amo loa a la puipui o le falela taputapu mo le falela tapu, ti mo le la kilii ovi tagata, ti mo le la kilii kakaututuu leia e teki loa i aluga, ti mo le lito leia e tau i le uluaga o le falela tapu ; 26ti mo kie puipui o le lotoa, mo le kie tapono o le uluaga o le lotoa takatakai o le falela tapu ti mo le aletale o failaulau, ti mo maea o le a takatakai, ti mo nea gaoi fuli ala na kau ki ai. Ti e lotou fai loa a tausi fuli ki ai. 27I alatou gaoi, e fakalogo loa a vosa o Kelesoni kia Alone mo ona vosa, o uiga mo nea fuli ala e lotou amo loa ti mo le tausi katoa leia e tonu ke lotou fai loa. E kolua fakasa loa kia latou a nea fuli ala e tonu ke lotou amo.
28Ko na gaoi a famili o vosa o Kelesoni i le falela tapu. Ko Itamale, vosa o le tagata faisakilifisio ko Alone, e leoleo ia lalatou gaoi.
29E ke fai loa le tosi o vosa o Melali, o mulimuli ki olatou famili, o mulimuli ki fale o olatou tamana ; 30E ke tosi loa, mei le fetuu kau tolu o fai ki aluga ki le fetuu kau lima, a tagata fuli ala kua aoga ke ulu o gaoi i le falela tapu.
31Ko leinei le nea leia e tonu ke lotou tokaga ki ai mo le nea leia e tonu ke lotou amo, i le tausi o le falela tapu : e lotou tokaga loa ki papa o le falela tapu, mo ona laakau fakamau, mo ona pou, mo ona tuuaga pou, 32mo pou takatakai o le lotoa, mo ona tuuaga pou, mo ona pike, mo ona maea, ti mo nea gaoi fuli ala e aoga ki ai. E kolua lau loa i olatou igoa a nea ala e tonu ke lotou tokaga ki ai ti ke lotou amo. 33Ko na a gaoi a famili o Melali, alotou tuulaga fuli i le falela tapu, i le taki a Itamale, vosa o le tagata faisakilifisio ko Alone.
34Na tosi loa e Moisese, mo Alone, ti mo pule o fanau a Iselaele a vosa o Keati, o mulimuli ki olatou famili, o mulimuli ki fale o olatou tamana, 35latou fuli ala, mei le fetuu kau tolu o fai ki aluga ki le fetuu kau lima, kua aoga ke ulu o gaoi i le falela tapu. 36Ko latou ala na tosi, o mulimuli ki olatou famili, ko le lua afe tino lelau fitu tino lima (2 750). 37Ko na latou ala o famili o Keati na tosi, ala kua aoga ke gaoi i le falela tapu. Na tosi latou e Moisese mo Alone o mulimuli ki le fakatotonu a le Eteleno kia Moisese.
38Ko vosa o Kelesoni ala na tosi, o mulimuli ki olatou famili, o mulimuli ki fale o olatou tamana, 39mei le fetuu kau tolu o fai ki aluga ki le fetuu kau lima, latou fuli ala kua aoga ke ulu o gaoi i le falela tapu, 40ko latou ala na tosi, o mulimuli ki olatou famili, o mulimuli ki fale o olatou tamana, na afe lua tino lelau ono tino tolu (2 630). 41Ko na latou o famili o vosa o Kelesoni ala na tosi, latou fuli ala na gaoi i le falela tapu ; na tosi latou e Moisese mo Alone o mulimuli ki le fakatotonu a le Eteleno.
42Ko latou o famili o vosa o Melali ala na tosi, o mulimuli ki olatou famili, o mulimuli ki fale o olatou tamana, 43mei le fetuu kau tolu o fai ki aluga ki le fetuu kau lima, latou fuli ala kua aoga ke ulu o gaoi i le falela tapu, 44ko latou ala na tosi, o mulimuli ki olatou famili, na tolu afe tino lelau lua (3 200). 45Ko na latou o famili o vosa o Melali ala na tosi ; na tosi latou e Moisese mo Alone o mulimuli ki le fakatotonu a le Eteleno kia Moisese.
46Ko latou fuli o le kau Levi ala na tosi e Moisese, mo Alone, ti mo pule o Iselaele, o mulimuli ki olatou famili, o mulimuli ki fale o olatou tamana, 47mei le fetuu kau tolu o fai ki aluga ki le fetuu kau lima, latou fuli ala kua aoga ke ulu o gaoi mo amo i le falela tapu, 48latou fuli ala na tosi na afe valu tino lelau lima tino valu (8 580). 49Na tosi latou o mulimuli ki le fakatotonu a le Eteleno kia Moisese, o fakasa ki le tagata taki toka tasi lana gaoi mo lana kavega ; na tosi latou o mulimuli ki le fakatotonu leia na tuku e le Eteleno kia Moisese.
Currently Selected:
Numelo 4: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
