Numelo 3
3
Le tosi mo gaoi a le faasiga o Levi
1Ko leinei le famili o Alone mo Moisese, i le temi leia na masau ai le Eteleno kia Moisese i le mauga o Sinai.
2Ko nei a igoa o vosa o Alone : ko le uluaki ko Natape, mo Apiu, mo Eleasale, ti mo Itamale. 3Ko igoa ana o vosa o Alone ala na fakanofo ke faisakilifisio ti na ulu loa ki le gaoi o tagata faisakilifisio.
4Na mate loa Natape mo Apiu i mua o le Eteleno, o tupu na la ave ia se afi kese ki mua o le Eteleno i le toafa o Sinai ; na la sala vosa. Ti na fai loa e Eleasale mo Itamale le gaoi o tagata faisakilifisio i mua o lola tamana ko Alone.
5Na masau loa le Eteleno kia Moisese, o pati : 6Ke ke fakafeofi mai le faasiga o Levi, ti e ke tuku loa latou ke fakalogo ki le tagata faisakilifisio ko Alone, ti ke lotou fakasausau kiate ia. 7E lotou fai loa lalatou gaoi i mua o le falela tapu o fakasausau kia Alone mo le kakai katoa o Iselaele, ti e lotou fai loa a gaoi fuli ki le falela tapu. 8E lotou tokaga loa ki nea gaoi o le falela tapu ti e lotou fai loa ki le kakai o Iselaele a gaoi fuli ala e aoga ki le falela tapu. 9E ke fakasa loa ke fakalogo le kau Levi kia Alone mo ona vosa, ki le tausi o le sagatualio, ti ke lotou fakafofoga loa fanau a Iselaele. 10E ke fakanofo loa Alone mo ona vosa ke fai ia le gaoi o le tagata faisakilifisio lasi. Ti kapau e fakafeofi loa se tagata kese ki ai, ti e tautea loa a ia ki le mate.
11Ti na toe masau loa le Eteleno kia Moisese : 12Ko au totonu leia kua filifili ia le kau Levi i la ake fanau fuli o Iselaele. E lotou tausi loa kiate au o fetogi a uluaki fuli o fanau a Iselaele.
13Talie i le aso leia na kau tamate ai a uluaki o le kau Esipito, na kau fakatapui kiate au a vosa uluaki fuli o fanau a Iselaele mo uluaki fuli o alatou kau manu : a aku loa latou, ko au ko le Eteleno.
14Na masau loa le Eteleno kia Moisese, i le toafa o Sinai, o pati : 15Ke ke tosi loa a vosa o Levi o mulimuli ki olatou famili, ti mo olatou faasiga ; ke ke tosi loa a tagata fuli mei le masina tasi o fai ki aluga. 16Na tosi loa latou e Moisese i le fakatotonu a le Eteleno, o mulimuli ki le fakatotonu leia na tuku ake kiate ia.
17Ko igoa o vosa o Levi : ko Kelesoni, mo Keati, mo Melali. 18Ko nei a igoa o vosa o Kelesoni, o mulimuli ki olatou famili : ko Lipini mo Simei. 19Ko nei a vosa o Keati, o mulimuli ki olatou famili : ko Amilame, mo Isea, mo Epelone, mo Usiele ; 20ti mo vosa o Melali, o mulimuli ki olatou famili : ko Mali mo Musi. Ko famili ana o Levi, o mulimuli ki fale o olatou tamana.
21Na ifo meia Kelesoni le famili o Lipini mo le famili o Simei, ala ko famili o le kau Kelesoni. 22Ko latou ala na tosi, o lau mei le masina tasi o fai ki aluga, ko le toka fitu afe tino lelau lima tagata (7 500). 23Na nofo loa le faasiga o Kelesoni i muli o le falela tapu, i le fetuu Uesite. 24Ko le pule o le kau Kelesoni ko Eliasafe, vosa o Laele. 25Na tokaga loa le kau Kelesoni ki koga anei o le falela tapu : ki le falela taputapu mo le falela tapu, mo le la fakamalumalu o le falela tapu i tafa, mo le lito tapono o le uluaga ulu o le falela tapu, 26mo puipui o le lotoa, mo le lito tapono o le uluaga ki le lotoa leia e takatakai ia le falela tapu mo le aletale, ti mo maea o le falela tapu. E lotou tokaga loa ki le tausi o nea fuli ana.
27Na ifo meia Keati le famili o le kau Amilame, mo le famili o le kau Isea, mo le famili o le kau Epelone, mo le famili o le kau Usiele, ala ko famili o le kau Keati. 28Ko lolatou api ko le valu afe tino lelau ono tagata (8 600), mei le masina tasi o fai ki aluga. Na tuku kia latou le tausi o nea tapu. 29Na nofo loa famili o vosa o Keati i le fetuu saute o le falela tapu. 30Ko lolatou pule ko Elisafani, vosa o Usiele. 31Na tokaga loa le kau Keati ki le aleka tapu, mo le laupapa tapu, mo le tuuaga malaga, mo aletale, mo nea gaoi o le sagatualio, ti mo le lito tapono o le potu taputapu. Na lotou tokaga loa ki le tausi o nea fuli ana. 32Ko le pule lasi o le kau Levi ko Eleasale, vosa o le tagata faisakilifisio ko Alone ; ko ia leia na leoleo loa ki tagata ala na gaoi ki le sagatualio.
33Na ifo loa meia Melali le famili o le kau Mali mo le famili o le kau Musi. 34Ko lolatou api i le tosi ko le ono afe tino lelau lua tagata (6 200), mei le masina tasi o fai ki aluga. 35Ko lolatou pule ko Tuliele, vosa o Apiaile. Na lotou nonofo i le fetuu noleto o le falela tapu. 36Na tokaga loa le kau Melali ki papa o le falela tapu, mo ona laakau fakamaumau, mo ona pou, mo ona tuuaga pou, mo ona ipu fuli, ti mo ona nea gaoi fuli. 37Ti na lotou toe tokaga foki ki pou o le lotoa, mo tuuaga pou, mo pike, mo maea.
38Na nofo loa Moisese, mo Alone ti mo ona vosa i mua o le uluaga o le falela tapu, i le potu esite. Na lotou tokaga ki le taupau mo le tausi o le sagatualio, i le igoa o fanau a Iselaele ; ti e tautea loa ki le mate a tagata kese fuli ala e fakafeofi loa ki ai.
39Ko le api o le kau Levi ko le tino lua tupu lua afe tagata (22 000), mei le masina tasi o fai ki aluga. Na fai le tosi lena e Moisese mo Alone, o mulimuli ki le fakatotonu a le Eteleno, ke tosi a tagata fuli o mulimuli ki famili.
Totogi o tama uluaki tupu
40Na masau loa le Eteleno kia Moisese : Ke ke tosi a igoa taki tasi o tagata uluaki fuli o fanau a Iselaele, mei le masina tasi o fai ki aluga. 41Ti ke vaei kese loa le kau Levi kiate au, ko le Eteleno, o fetogi ai a tagata uluaki fuli o fanau a Iselaele, ti ko le kau manu o le kau Levi ke fetogi ai a manu uluaki fuli o fanau a Iselaele. 42Na tosi loa e Moisese a tagata uluaki fuli o fanau a Iselaele, o mulimuli ki le fakatotonu leia na tuku e le Eteleno kiate ia. 43Ko tagata fuli ala na tosi, o lau mei le masina tasi o fai ki aluga, ko le tino lua tupu lua afe tino lelau lua tino fitu tupu tolu (22 273).
44Na masau loa le Eteleno kia Moisese, o pati : 45Ke ke vaei kese kiate au le kau Levi ke fetogi ia a tagata uluaki fuli o fanau a Iselaele, ti mo le kau manu o le kau Levi ke fetogi ia alatou manu uluaki. Ti e fakalogo mai loa le kau Levi kiate au. Ko au ko le Eteleno. 46Ti na toe loa ke toe totogi a tino lelau lua tupu fitu tupu tolu (273) tagata uluaki o fanau a Iselaele, ala na fakalaka loa i le kau Levi. 47E ke tuku loa le totogi o le tagata ko fa piesi paaga e lima, i le paaga o le sagatualio, leia e kalami lima le mamafa o le fa piesi e tasi. 48Ti e ke tuku loa le paaga lena kia Alone mo ona vosa ; ko lena le nea leia e fai loa ki le toe totogi o tagata uluaki ala na fakalaka i le kau Levi. 49Na tanaki loa e Moisese le paaga ki le toe totogi o latou ala na leaise fetogi e le kau Levi. 50Ti na maua loa e ia mei vosa uluaki o Iselaele le afe kau lelau tolu kau ono tupu lima (1 365) fa piesi paaga, 51Ti na tuku loa e ia le paaga lena kia Alone mo ona vosa, o mulimuli ki le fakatotonu leia kua tuku e le Eteleno.
Currently Selected:
Numelo 3: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
