Numelo 24
24
1Na matala loa a Palaame kua malie ki le Eteleno ke tapuaki ki Iselaele ; ti na leaise toe ano loa a ia o afa se puleaki ke toe sa ake ai le Eteleno kiate ia, ofaipe la ake faiaga i mua. Kae na maliu loa ona mata ki le fetuu o le toafa. 2Na siki ake loa a mata o Palaame, ti na tio loa a ia ki Iselaele leia kua nofo i faasiga. Ti na ifo loa le Laumalie o le Atua kiate ia.
3Na fai loa e Palaame le masau fakatata, o pati :
Ko leinei le folafola a Palaame, vosa o Peoli !
Ko leinei le folafola a le tagata leia e tio malama !
4Ko leinei le folafola a le tagata leia e logo ki folafola a le Atua,
A leia e tio ki le tio a le Mafimafi,
A leia e punou kae mavaa ona mata.
5E fulumalie ai ou falela, ei Sakopo !
Ou nofoaga, ei Iselaele !
6E lotou mafolafola ofaipe ni vaivailiua,
Ofaipe ni oloto e ofi ki se vaitafe,
Ofaipe ni aloese na to e le Eteleno,
Ofaipe ni sete i tafa o se vai.
7E sali le vai mei ona pakete,
Ti e fakavai lona pulapula e ni atu vai lalasi.
E malaga lona sau o taualuga ake ia Akake,
Ti e liliu lona puleaga o makeke.
8Na fakamavae a ia e le Atua mei Esipito,
Ti e fai a ia kiate ia pe le makeke o le pipi vao.
E kai e ia a puleaga ala e malaga kiate ia,
E gugu e ia olatou ivi, ti e tamate e ia latou ki ana gasau.
9E peluki e ia ona tuli, ti e moe a ia ofaipe se laione tagata, ofaipe se laione fafine :
Ko ai e toe fakatuu ia loa a ia ki aluga ?
Ke tapuakina leia e tapuaki loa kiate koe,
Ti ke malaia leia e fakamalaia loa a koe !
10Na mu loa le ita o Palake kia Palaame ; ti na pasipasi loa e ia ona lima, o pati kia Palaame : Na kau aumai a koe ki leinei ke ke fakamalaia oku fili, ti ko leinei, kua tua tolu loa lau tapuaki kiate ia ! 11Sola nei, ano ki lou kaiga ! Na kau pati ke kau tuku loa kiate koe ni fakapale, kae kua taofi a koe e le Eteleno ke aua na ke tali latou ! 12Na tali loa Palaame kia Palake : Pe na leaise kau masau ki tagata ala na ke kakau mai kiate au, o pati : 13Pe soli mai foki e Palake kiate au lona fale leia kua apele i le paaga mo le aulo, e leaise kau mafai ia fua le fetogi o se ganea uvikipogi e tasi i fakatotonu a le Eteleno ; e kau fakasa ia loa le nea leia e pati loa ki ai le Eteleno ! 14Ti ko leinei e kau toe liliu loa ki loku kakai. Kae i mua, au, ke kau fakasa fakatomua atu kiate koe le nea leia e fai loa e fanau a Iselaele ki lou kakai i temi ki muli.
Kikite ki le puleaga o le Mesia
15Na fai loa e Palaame lana folafola fakatata, o pati :
Ko leinei le folafola a Palaame, vosa o Peoli,
Ko leinei le folafola fakatata a le tagata leia e tio malama,
16Ko leinei le folafola a leia e logo ki folafola a le Atua,
A leia e iloa ia a fakatuutuu loloto a le Taualuga,
A leia e tio ki le tio a le Mafimafi,
A leia e punou kae mavaa ona mata.
17E kau tio ki ai, kae e leai nei ;
E kau tio ki ai, kae koi mamao :
E ulu se fetuu meia Sakopo,
E malaga se sau i Iselaele.
E taai e ia a vakavaka o Moape,
Ti e tamate e ia a vosa fuli o Seti.
18E pule a ia ki Etome,
E pule a ia ki Seili, ko ona fili.
E fakasa e Iselaele lona makeke.
19Ko leia e ulu loa meia Sakopo e pule faitalisa,
E tamate e ia latou ala e sosola mei kolo.
20Na tio loa Palaame kia Amaleke. Na fai loa e ia lana folafola fakatata, o pati :
Ko Amaleke ko le uluaki a ia o atu puleaga, Kae e maumaui loa a ia i se aso.
21Na tio loa Palaame ki le kau Kenia. Ti na fai loa e ia lana folafola fakatata, o pati :
E makeke lou nofoaga,
Ti e teki lou ofaga i le utu.
22Kae e kapu loa le tagata Kenia.
E ave loa a koe o fakapopulai e le kau Asilia.
23Na fai loa e Palaame lana folafola fakatata, o toe pati :
Oiau ! Ko ai e mauli loa i le aso leia e fakanofo ai loa a ia e le Atua ?
24Kae e au loa ni vaka mei Kitimi,
E lotou fakamamae loa le kau Asilia, e lotou fakamamae loa le Epeleo ;
Ti e toe maumaui loa mo ia foki.
25Na tuu ake loa Palaame ki aluga, o ano, ti na toe liliu loa a ia ki lona fenua. Ti na toe liliu foki Palake ki lona fenua.
Currently Selected:
Numelo 24: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
