Numelo 11
11
Le afi a le Eteleno
1Na lalau loa le kakai ki taliga o le Eteleno, ti na veli loa le nea lena kiate ia. I le logo a le Eteleno ki le nea lena, na mu loa lona sausau ; ti na vela loa le afi o le Eteleno ia latou, o tamate le potupotu o le nofolaga. 2Na tagi loa le kakai kia Moisese. Ti na faikole loa Moisese ki le Eteleno, ti na mate loa le afi. 3Na tuku loa ki le ganea lena le igoa ko Tapela, o tupu na mu le afi o le Eteleno i loto malie o Iselaele.
Tagi a Iselaele ki se kanoi manu
4Na vilo loa ki le oli fakatino le kakai kese leia na fanoga i loto malie o fanau a Iselaele. Ti na toe kamata lalau foki fanau a Iselaele, o pati : Ko ai leia e soli ia mai loa kia tatou se kanoi manu ke kai ? 5E tou manamanatu ki ika ala na tou kai noa i Esipito, mo kokope, mo melo, mo pualo, mo aniani, ti mo lai. 6I leinei kua malo noa o tou fatakia : e leaise maua fua se nea e tasi i nea ana ; e tio ata otou mata ki le mane.
7Na fai le mane pe se fuai koliate, ti na tea a ia ofaipe le pulu o le peteliomi. 8Na mavetevete loa le kakai i tafatafa o le nofolaga, o tae le mane i le mafoata ; ti na lotou fakamaluu loa a ia ki ni fatu fakamaluu, ti na lotou tuki loa a ia i ni ipu sima ; ti na lotou fakamoso loa a ia i ni kulo kapa, ti na lotou fai loa ki ai ni keke. Na kano malie a ia ofaipe ni keke ala na fai ki le lolo foou. 9Na ifo loa le mane i le pouli ki le nofolaga i le temi leia na ifo ai le sasau.
10Na logo loa Moisese ki le lalau a le kakai i olatou famili, le tagata taki toka tasi i le uluaga o lona falela. Ti na mu loa le sausau o le Eteleno o lasi ai. 11Na mamae ai le loto o Moisese, ti na pati loa a ia ki le Eteleno : Kolea e ke fakamamae ai le loto o lau tagata fakasausau ? Kolea e ke fakafiti ai kiate au lou agamalie ? Kolea e ke teki ai kiate au le kavega o le kakai fuli leinei ? 12Pe ko au leia na fakatupu ia le kakai fuli leinei ? Pe ko au leia na fanaui ia a ia, ke ke pati mai ai kiate au : luluku a ia i lou fatafata, ofaipe se fafine leia e puaki ia se toe, ti ke ave a ia ke kaku ki le fenua leia na ke fakapapau ki ona tamana ke soli kiate ia ? 13E kau maua loa ifea se kanoi manu leia ke soli ki le kakai fuli leinei ? Talie e lotou fetagisi fuli i oku tafa, o pati : soli mai kia matou se kanoi manu ke kai ! 14E leaise kau mafai ia le amo toka tasi o le kakai fuli leinei, talie e mamafa veli ai a ia kiate au. 15Ti kapau e ke fai fenaaki kiate au, ti e malie ake ke ke tamate au ! E ke fakasa loa i ai lou agamalie kiate au, ti e leaise kau tio loa ki le malaia o loku kakai.
Ko kau matua e tino fitu
16Na pati loa le Eteleno kia Moisese : Fakatasii mai kiate au se tino fitu o le kau matuatua o Iselaele, latou ala e ke iloa ko fakamatuatua mo takitaki o le kakai. Aumai latou ki mua o le falela tapu, ti ke lotou tutuu i ai mo koe. 17E kau ifo mai loa, ti e kau masau loa kiate koe i lena. E kau too ia loa se potu o le laumalie leia e nofo iate koe, o tuku kia latou, ke lotou amo mo koe le kavega o le kakai, ti ke aua na ke amo toka tasi a ia. 18E ke pati loa ki le kakai : Kotou fakamea ki apogipogi, ti e kotou kai loa se kanoi manu, talie kua kotou tagi ki taliga o le Eteleno, o pati : Ko ai leia e fagai ia loa matou ki se kanoi manu ? Talie na motou mauli malie i Esipito. E soli atu loa e le Eteleno se kanoi manu kia koutou, ti e kotou kai loa a ia. 19E kotou kai loa a ia, o leaise gato fua i se aso e tasi, pe lua, pe lima, pe kau agafulu, pe kau lua, 20kae i se masina katoa, o kaku ki lana sali mei okoutou pogoisu, ti ke kotou fakalialia loa ki ai, talie na kotou tiaki le Eteleno leia e nofo i loto malie o koutou, talie na kotou tagi i ona mua, o pati : Kolea na tou mavae ai mei Esipito ?
21Na pati loa Moisese : Ko tino lelau afe e ono tagata, ko le api a ia o le kakai leia e fanoga mo au, kae ke pati : e kau soli loa se kanoi manu kia latou, ti e lotou kai loa a ia i se masina katoa ! 22Kapau e motou tamate loa amatou ovi fuli, mo amatou koti fuli, ti mo amatou pipi fuli, e leaise feauga loa le nea lena ; ti kapau e motou aumai a ika fuli o le tai, e leaise feauga aifai le nea lena ! 23Na pati loa le Eteleno kia Moisese : Pe kua toetoe loa le lima o le Eteleno ? I le aso nei e ke tio ai loa pe soko pe leai le nea leia kua kau pati ki ai.
24Na ulu loa Moisese ki fafo mei le falela tapu o fakasa ki le kakai a masau a le Eteleno. Ti na fakatasii loa e ia le tino fitu o le kau fakamatuatua o le kakai, ti na fakatuutuu loa e ia latou o takatakai ia le falela tapu. 25Na ifo loa le Eteleno i le ao, o masau kia Moisese. Ti na too loa e ia se potu o le laumalie leia na nofo iate ia, o tuku loa a ia ki le kau fakamatuatua e tino fitu. I le temi fai leia na ifo ai loa le laumalie kia latou, na lotou masau loa ofaipe le kau polofeta ; kae na leaise lotou soko atu a ia.
Kikite a Eletate mo Metate
26Na i ai loa ni tagata e toka lua, ko Elitati mo Metati, ala na nofo i le nofolaga talie na leaise la ano ki le falela tapu ; ti na ifo loa le laumalie kia laua, talie na la kau ia latou ala kua tosi, ti na la masau loa ofaipe le kau polofeta i loto malie o le nofolaga. 27Na makape loa se tama tupulaga o fakasa le nea lena kia Moisese, o pati : E masau fakakikite Elitati mo Metati i loto malie o le nofolaga. 28Ti na pati loa Sosue, vosa o Nune, tagata fakasausau a Moisese talu mei lona ikiiki : Moisese, loku aliki, taofi laua ! 29Na tali loa Moisese kiate ia : Pe ke finenonofo o tupu ko au ? E fakaamu ake ke liliu le kakai fuli o le Eteleno ko ni polofeta, ti ke finegalo malie le Eteleno o tuku lona Laumalie kia latou ! 30Ti na ano loa Moisese ki le nofolaga, mo le kau fakamatuatua o Iselaele.
Ko kaia mo le tautea
31Na fakaagi loa e le Eteleno mei le tai se matagi leia na aumai ia loa se ao kaia, ti na fakavilo loa e ia latou ki le nofolaga. Na maua loa latou i tafatafa o le nofolaga o kaku ki le gatoaga o le saele i se aso katoa, ti na lotou lele fua i aluga o le kele i se meta e tasi. 32Na tutuu ake loa le kakai ki aluga, o tae a kaia i le aso katoa lena, mo le po katoa lena, ti mo le aso katoa ake leia. Ko leia na ikiiki lana tae na maua e ia o lau afe ana kilo. Na lotou fakalaalaa loa a kaia i le takatakai o le nofolaga. 33Kae koi lotou lolotoga uuti loa le kanoi manu, ti na leikiaise lotou lamulamu fua a ia, na mu loa se sausau o le Eteleno ki le kakai, ti na tautea loa e le Eteleno le kakai ki se masaki fakaii. 34Na tuku loa ki le ganea lena le igoa ko Kipiloti-Ataava, tanuma o le olioli, talie ko le ganea lena na tanu ai le kakai leia na apele i olioli fakatino.
35Ti na mavae loa le kakai i Kipiloti-Ataava o ano ki Aseloti ; ti na lotou nonofo loa i Aseloti.
Currently Selected:
Numelo 11: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
