Numelo 10
10
Fakatagi pupusi siliva e lua
1Na masau loa le Eteleno kia Moisese, o pati : 2Fai kiate koe ni fakatagi pupusi siliva e lua ; e ke fai loa laua ki se siliva leia kua tuki ki le amale. E fakaaoga loa laua ki le fakatasii o le kakai ti mo le fakasa o le mavae o le nofolaga. 3Ka pupusi loa laua, e fakatasi loa le kakai katoa kiate koe, i le uluaga o le falela tapu. 4Kapau e pupusi loa se fakatagi pupusi e tasi, ti e fakatasi loa kiate koe a pule famili, mo pule o afe o Iselaele. 5Kapau e pupusi fakamakeke loa a fakatagi pupusi, e mavae loa latou ala e nonofo i le potu esite. 6Ka kotou pupusi fakamakeke loa o tua lua, e mavae loa latou ala e nonofo i le fetuu saute. E pupusi fakamakeke loa ki lolatou mavae. 7E kotou toe pupusi loa ke fakatasii ai le kakai, kae e leaise kotou pupusi fakamakeke loa 8E gato tasi loa ki le kau tagata faisakilifisio, vosa o Alone, e pupusi ia loa a fakatagi pupusi. E kotou taupau loa le lao lena mo okoutou sakoga i temi fuli. 9I lokoutou fenua, ka kotou ano loa o tau ki le fili leia na osoi ia koutou, e kotou pupusi fakamakeke loa a fakatagi pupusi, ti e manatui loa koutou e le Eteleno, ko lokoutou Atua, ti e saofaki loa e ia koutou mei okoutou fili. 10I okoutou aso fakafiafia, mo okoutou aso lalasi, ti mo okoutou masina foou, e kotou pupusi loa a fakatagi pupusi, mo ka kotou momoli loa akoutou failaulau mo akoutou sakilifisio fakafetai, ti e lotou fakamanatu loa koutou ki lokoutou Atua. Ko au ko le Eteleno, ko lokoutou Atua.
Mavae i Sinai
11I le lua o fetuu, i le aso kau lua o le lua o masina, na malaga loa le ao i aluga o le tapenakulo o le fakamaoki. 12Ti na mavae loa fanau a Iselaele i le toafa o Sinai, o mulimuli ki le fakatotonu leia kua fakatuutuu e le Eteleno ki lalatou fanoga. Na tuu loa le ao i le toafa o Palani. 13Na lotou fai loa le uluaki fanoga lena i le fakatotonu a le Eteleno kia Moisese.
14Na uluaki mavae loa le manumanu o le nofolaga o Suta, mo ona kau tau. Na taki le kau tau o Suta e Nasoni, vosa o Aminatape ; 15na taki le kau tau o le faasiga o vosa o Isakale e Netaneele, vosa o Sua ; 16na taki le kau tau o le faasiga o vosa o Sapulone e Eliape, vosa o Elone.
17Na vete loa le falela tapu, ti na ano loa a vosa o Kelesoni mo vosa o Melali, o amo le tapenakulo.
18Na ano loa le manumanu o le nofolaga o Lupeni, mo ona kau tau. Na taki le kau tau a Lupeni e Elisule, vosa o Seteule ; 19na taki le kau tau o le faasiga o vosa o Simeone e Selumiele, vosa o Sulisatai ; 20na taki le kau tau o le faasiga o vosa o Kate e Eliasafe, vosa o Teueli.
21Na ano loa le kau Keati, o amo le sagatualio ; ti na fakatuu loa le tapenakulo o talitali ke lotou kaku ake.
22Na ano loa le manumanu o le nofolaga o vosa o Efalaimi, mo ona kau tau. Na taki le kau tau o Efalaimi e Elisama, vosa o Amiute ; 23na taki le kau tau o le faasiga o vosa o Manase e Kameliele, vosa o Petasu ; 24na taki le kau tau o le faasiga o vosa o Pesamino e Apitane, vosa o Kiteoni.
25Na ano loa le manumanu o le nofolaga o vosa o Tane, mo ona kau tau : na lotou tapono ia loa le fanoga o nofolaga. Na taki le kau tau o Tane e Aiesele, vosa o Amisatai ; 26na taki le kau tau o le faasiga o vosa o Asele e Pakiele, vosa o Okalane ; 27na taki le kau tau o le faasiga o vosa o Nefetali e Aila, vosa o Enani.
28Ko lena le fakatuutuu leia na fanoga ai a fanau a Iselaele o mulimuli ki olatou kau tau, ti na lotou mavae fenaaki loa.
Ko Opapi
29Na pati loa Moisese kia Opapi, vosa o Leuele, tagata o Matiane, tamana o le avaga o Moisese : E motou ano ki le fenua leia na pati ki ai le Eteleno : e kau soli loa a ia kia koutou. Au ke tou ano, ti e motou fai loa kiate koe se nea malie, talie kua fakapapau le Eteleno ke fai se nea malie ki Iselaele. 30Na tali loa Opapi kiate ia : E leaise kau ano loa mo koutou ; kae kau toe liliu loa ki loku fenua mo loku famili. 31Ti na pati loa Moisese : e kau kole atu kiate koe, ke aua na ke mavae ia matou ; talie e ke iloa ia a ganea o le toafa ala e feala ke motou fakatuu ai loa omatou nofolaga, e ke fai loa kia matou pe se tagata takitaki. 32Ti kapau e ke au loa mo matou, e motou fakakau loa a koe ki nea malilie ala ka fai loa e le Eteleno kia matou.
33Na lotou mavae loa mei le mauga o le Eteleno, ti na lotou saele loa i aso e tolu : na muamua loa ia latou le aleka o le fakamaoki o le Eteleno, ti na fai loa e ia se saele i aso e tolu, o afa se ganea malolo kia latou. 34Na tuu le ao o le Eteleno i aluga o latou i le ao, i lalatou mavae i le nofolaga.
35Ka mavae loa le Aleka, na pati loa Moisese : Tuu ki aluga, Eteleno ! ti ke fakamavete ou fili ! ti ke fesolaki i ou mua latou ala e vesia kiate koe ! 36Ti ka tuku loa le Aleka ki lalo, na pati loa Moisese : Toe liliu mai, Eteleno, ki atu miliate mo afe o Iselaele !
Currently Selected:
Numelo 10: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
