Mikea 7
7
1Malaia kiate au ! talie kua kau fai pe se tagata leia e ano o afa ni fuai laakau i le oki o le tau kai,
Leia e ano o afa ni fui vite i le oki o le tau o le vite :
E leaise maua e ia se fui vite ke kai, pe ko se fa fiki suamalie leia e manako ki ai lona laumalie.
2Kua puli le tagata agamalie i le fenua,
Ti e leaise koi i ai se tagata agatonu i lotolotoga o tagata ;
Kua lotou mumuni fuli o lamalama ke liligi le toto,
Kua tasi fai e le tagata se masele ki lona taina.
3Kua poto olatou lima i le fai o le veli : Kua fakamakeke e le aliki ni nea alofa,
Kua fakamaua e le tui fakamaau se totogi,
Kua fakasa e le tagata lasi lona manumanu,
Ti kua lotou kau fakatasi fuli latou ana.
4Ko leia e malie ia latou e faipe se laakau talatala,
Ko leia e faitotonu ia latou e veli ake i le vao sukisuki.
Ko leinei kua ofi mai le aso leia na fakasa e au kau polofeta, le aso o lou tautea.
I le aso lena e lotou nofo loa i le luma.
5Aua na ke tui ki se kaukau nea,
Aua na ke fanaki ki sou kaiga totonu ;
Tapono matapa o lou gutu
I mua o le fafine leia e malolo i lou fatafata.
6Talie e lauveli le vosa ki le tamana,
E malaga le taine ki lona tinana,
E agatuu le fugao ki lona tinana ;
Ko le fili o le tagata ko le kakai o lona fale.
Amanaki mo fakapapau ki Iselaele
7Kiate au, e kau maliu loa ki le Eteleno,
E kau tuku loa laku amanaki malie ki le Atua o loku fakamauli ;
E tali loa loku Atua ki aku kole.
8Aua na ke fakafiafia o tupu ko au, ei loku fili !
Talie kapau na kau siga, e kau toe tuuake loa ki aluga ;
Kapau na kau tonatona i le fakapouli,
E liliu loa le Eteleno ko loku malama.
9E kau kataki loa le sausau o le Eteleno,
O tupu na kau agasala kiate ia,
O kaku ki le lakaga e puipui ai loa e ia au ti e fakatonu ia loa e ia au ;
E taki loa e ia au ki le malama,
Ti e kau tio loa ki lona faitotonu.
10E tio loa ki ai loku fili ti e apele loa a ia i le luma,
A ia leia na pati mai kiate au : Kofea le Eteleno, lou Atua ?
E fiafia loa oku mata i le tio kiate ia ;
Kae takatakafi loa a ia ofaipe le pela o ala.
11I le aso leia e toe laga ai loa ou kaua,
I le aso lena e siki ai loa ou koiga ke mamao atu.
12I le aso lena, e au loa au fanau kiate koe,
Mei Asilia mo kolo o Esipito,
Mei laugutu o vaitafe o Esipito,
Mei se tai ki se tasi a tai, mei se mauga ki se tasi mauga.
13E maumaui loa le fenua o tupu ko ona kakai,
O tupu ko fua o alatou gaoi.
14Eteleno, fagai lou kakai ki lau laakau, le kau manu o lou tofiga,
Leia e nofo toka tasi i le vaomatua i loto malie o le Kalemelo !
Ke lotou kai i Pasani mo Kalaate,
Ofaipe aso o le temi mua.
15Ofaipe le aso leia na ke mavae ai i le fenua o Esipito,
E kau fakatio loa a koe ki ni nea fakamanamana !
16E tio loa ki ai a atu puleaga, ti e lotou luma loa,
Logo ai lolatou makeke katoa ;
E lotou tapono loa olatou gutu ki olatou lima,
E tulituli loa olatou taliga.
17E lotou epo loa le efu, ofaipe le gata,
Ofaipe manu totolo o le kele ;
E maua loa latou e le i, i tafa olatou kolo tau ;
E lotou lulu loa i mua o le Eteleno, lotatou Atua ;
E lotou i loa kiate koe.
18Ko le Atua fea leia e tatau mo koe,
Leia e fakamolemole ia le agaveli, leia e galoi ia agasala
O le toetoega o lou tofiga ?
E leaise taupau e ia lona sausau o lee gato,
Talie e fiafia a ia i le manava alofa.
19E toe manava alofa loa a ia kia matou,
E tuku loa e ia ki lalo o ona vae amatou agaveli ;
E ke ti loa ki le takele o le moana alatou agasala fuli.
20E ke fakasa loa lou agatonu kia Sakopo,
Mo lou agamalie kia Apalaamo,
Ofaipe le nea na ke fakapapau ki omatou tamana i aso o le temi afea
Currently Selected:
Mikea 7: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
