Mateo 22
22
Folafola o le kai o le faiavaga
1Na toe masau loa Sesu kia latou i ni folafola fakatata, o pati :
2E fakatatau le puleaga o le atu lagi ki se sau leia na fai ia se kaitasi ki le avaga o lona vosa. 3Na kakau loa e ia ana tagata fakasausau ke ano o kalagai latou ala na fakaafe ki le kaitasi ; kae na leaise lotou fia au. 4Na toe kakau loa e ia ni iki ake tagata fakasausau, o pati : Kotou pati ki le kau fakaafe : Ko leinei kua kau teuteui laku kaitasi ; kua tamate aku pipi tagata mo aku manu pepeti, ti kua tokamalie a nea fuli, kotou au ki le kaitasi. 5Kae na leaise tuatua fua le kau fakaafe ki le fakaafe, ti na lotou tasi ano loa, ko leia ki lona faisaga, ti ko leia ake ki lona koloa ; 6ti na too loa e iki ni tagata fakasausau, o fakavelivelii mo tamate latou. 7Na ita lasi ai le sau ; ti na kakau loa e ia lana kau solia ke ano o tamate le kau tukipo lena, ti mo tutu lolatou kolo. 8Ti na pati loa a ia ki ana tagata fakasausau : Kua tokamalie le kaitasi ; kae e leaise gali le kau fakaafe mo le kaitasi. 9Kotou ano loa ki ala lalasi, ti kotou fakaafe mai ki le kaitasi latou fuli ala e kotou maua ia loa. 10Na ano loa a tagata fakasausau ki ala, o lotou tae latou fuli ala na lotou maua loa i ai, le kau agaveli mo le kau agamalie, ti na apele loa le kogafale o le kaitasi i le kau fakaafe. 11Na ulu loa le sau o tio kia latou ala na eke i le laupapa kai, ti na fakatokagai loa e ia se tagata leia na leaise kofu ki se kofu o le faiavaga. 12Na pati loa le sau kiate ia : Ei loku kaukau nea, na feaki lau ulu mai ki leinei kae e leaise ke maua le kofu o le faiavaga ? Na leaise gu loa le tagata lena. 13Ti na pati loa le sau ki ana tagata fakasausau : Kotou sai ona vae mo ona lima, ti kotou ti a ia ki le fakapouli i fafo, leia e logo ai loa ki ni tagi mo ni fetati o nifo. 14Talie e toka api le kau kalagai, kae e toka teiki fua le kau filifilia.
Le tukusau kia Sesale
15Na ano loa le kau faliseo o fonofono ki se puleaki leia ke maua ai se sala ma Sesu i ana masau totonu.
16Na lotou kakau loa kiate ia alatou tisipulo mo le kau Elote, o pati : Pule, e motou iloa e ke maoki, ti e ke ako le ala o le Atua o mulimuli ki le maoki, ti e leaise ke tuatua fua ki se tasi, talie e leaise ke tio ki le nea leia e sa i tafa o tagata. 17Koia fakasa mai ai mua lau manatu : Pe taga, pe leai, ke tuku le tukusau kia Sesale ? 18I le iloa e Sesu lalatou agaveli, na tali loa a ia : Kolea e kotou asiasii ai au, kau malualoi ? 19Fakasa mai ake le fa piesi o le tukusau. Ti na lotou fakasa ake loa kiate ia se fa tenalio. 20Na vesili loa a ia kia latou : O ai le paaki mo le igoa leia e tuu i ai ? 21Ti na lotou tali loa kiate ia : O Sesale. Ti na pati loa Sesu kia latou : Kotou tuku kia Sesale le nea a Sesale, ti e ki le Atua le nea a le Atua. 22Na lotou ofolele loa i le nea leia na lotou logo ki ai, ti na lotou tuku loa a ia, kae lotou ano loa.
Fakamaoki o le toe tuuake
23I le aso lena, na au loa kia Sesu le kau Satuseo, ala e pati e leaise toe tuuake, o fai le vesili leinei : 24Pule, na pati Moisese : Kapau e mate se tasi kae sala fanau, e tonu loa ke avaga lona taina mo lana avaga, ke fakatupu ai se sakoga ki lona taina. 25Kae na i ai i lotolotoga o matou ni fetaina e toka fitu. Na avaga loa le uluaki, ti na mate loa a ia ; kae o tupu na leaise maua e ia sana fanau, na tuku loa e ia lona avaga ki lona taina. 26Na toe fenaaki loa ki le lua, mo le tolu, o kaku ki le fitu. 27I le oki o latou fuli, na mate loa le fafine. 28I le toe tuuake, ko ai i le toka fitu lena e avaga loa mo le fafine ? Talie na lotou avaga fuli mo ia. 29Na tali loa Sesu kia latou : E kotou nofo i le faisala, talie e leaise kotou matala fua ki le tosi ti mo le mafimafi o le Atua. 30Talie, i le toe tuuake, e leaise toe too loa e tagata ni fafine, ti e leaise toe too loa e fafine ni tagata, kae e lotou liliu loa ofaipe le kau aselo o le Atua i le lagi. 31O uiga mo le toe tuuake o le kau mate, pe na leaise kotou lau le nea leia na fakasa e le Atua kia koutou : 32Ko le Atua au o Apalaamo, le Atua o Isaake, le Atua o Sakopo ? Ko le Atua e leaise ko le Atua a ia o le kau mate, kae ko le Atua a ia o le kau mauli. 33Ko le kakai leia na fakalogo na ofolele ai i le akonaki a Sesu.
Le fakatotonu lasi oki
34I le logo a le kau faliseo kua tapono e Sesu a gutu o le kau Satuseo, na lotou fakatasi loa, 35ti na fai loa e se tasi o latou, ko se toketa poto, le vesili leinei kia Sesu, ke asiasii ai a ia : 36Pule, kolea le fakatotonu o le lao e lasi oki ? 37Na tali loa Sesu kiate ia : E ke alofa loa ki le Aliki, lou Atua, i lou loto katoa, mo lou laumalie katoa, ti mo lau manatu katoa. 38Ko lena le uluaki ti mo le fakatotonu lasi oki. 39Ti ko leinei le lua, leia e tatau mo ia : E ke alofa loa ki lou oloi ofaipe lou alofa kiate koe totonu. 40E fakasoko e fakatotonu ana e lua le lao katoa ti mo le kau polofeta.
Fakavesili o le kau faliseo ki le Mesia
41I le koi fakatasi a le kau faliseo, na vesili loa Sesu kia latou, o pati : 42Kolea lakoutou manatu kia Kilisito ? Pe ko le vosa a ia o ai ? Na lotou tali loa kiate ia : O Tavite.
43Ti na tali loa Sesu kia latou : Ti kolea na pati ai Tavite i le Laumalie Maokioki kiate ia : Aliki ! i lana pati :
44 Na pati le Aliki ki loku Aliki :
Ke ke ekeeke i loku fetuu atamai,
O kaku ke kau fakaliliu ou fili ko lou tekiaga vae ?
45Kapau na pati Tavite kia Kilisito ko le Aliki, e feaki loa lana liliu ko lona vosa ? 46Na leaise mafai ke tali se tasi kiate ia i se kupu fua e tasi. Talu mei le aso lena, na leaise toe toa loa se tasi o fai ni vesili kiate ia.
Valoki o le kau sekelipa
Currently Selected:
Mateo 22: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
