Mateo 21

Ulu o Sesu-Kilisito ki Selusalemi

1I lalatou fakafeofi ki Selusalemi, na lotou kaku loa ki Petefase, i le mauga o Oliveto, ti na kakau loa e Sesu ni tisipulo e toka lua, 2o pati kia laua : Kolua ano ki le kolo leia e tuu i okoulua mua ; e kolua maua loa i ai se asino fafine leia e sisi, mo se uviki asino ; kolua tatala laua o aumai kiate au. 3Ka pati atu loa se tasi ki se nea, kolua tali : E aoga laua ki le Aliki. Ti e tuku loa e ia laua ke ano i le temi fai lena.

4Kae na soko le nea leinei ke fakasoko ai le nea leia na fakasa e le polofeta :

5 Pati ki le taine o Sione :

Ko leinei, e au lou sau kiate koe,

Apele i le agamalu, ti e eke i se asino,

I se uviki asino, le uviki o se asino fafine.

6Na ano loa a tisipulo, ti na la fai le nea leia na fakatotonu ake e Sesu kia laua. 7Na la taki mai loa le matua asino fafine mo le uviki asino, ti na la teki loa kia laua ola kofu, ti na la fakaeke loa Sesu ki aluga. 8Na folasi loa e le toka api o le kakai olatou kofu i le ala ; ti na tuuti loa e ni iki ni laai laakau, o tofaki i le ala. 9Ko latou ala na ano i mua ti mo latou na muli ia Sesu na kalaga : Osana ki le Vosa o Tavite ! Tapusa leia e saele mai i le suafa o le Aliki ! Osana i ganea taualuga ai ! 10I lana ulu ki Selusalemi, na gatuu loa le kolo katoa, o pati : Ko ai leinei ? 11Na tali loa le kakai : Ko Sesu, le polofeta, mei Nasaleti i Kalilea.

Kapu o le kau faikoloa i le fale tapu

12Na ulu loa Sesu ki le fale tapu o le Atua. Na kapu loa e ia latou fuli ala na fai fakatau ti mo totogi koloa i le fale tapu ; na tekai loa e ia a laupapa o le kau fetogi paaga, ti mo ekeekeaga o le kau fakatau lupe. 13Ti na pati loa Sesu kia latou : E tuu i le tosi : E fakaigoa loa loku fale ko se fale faikole. Kae ko kotou, kua kotou fakaliliu a ia ko se ana o tagata kaia.

14Na fakafeofi ake loa kiate ia ni kivi mo ni kito i le fale tapu. Ti na fakamauli loa e ia latou.

15Kae na loto veli loa le kau pule faisakilifisio mo le kau sekelipa, i lalatou tio ki nea fakamanamana ala na fai e ia, ti mo toe liliki ala kua kalaga i le loto fale tapu : Osana ki le Vosa o Tavite ! 16Ti na lotou pati loa kiate ia : Pe ke logo ki le nea leia e lotou pati ki ai ? Na tali loa Sesu kia latou : E io. Pe na leaise kotou lau ia folafola anei : Na ke maua ni fakavikiviki mei gutu o fanau liliki, ti mo latou ala koi u ?

17Ti na tuku loa e ia latou, kae na mavae loa a ia mei le kolo o ano ki Petania, o nofo ai i le pouli.

Le tafito fiki sala fua

18I le usu, i lana toe liliu ki le kolo, na fia kai loa a ia. 19Ti na tio loa a ia ki se fiki i le ala, ti na fakafeofi loa a ia ki ai ; kae na maua loa e ia ni lau ata, ti na pati loa a ia ki le fiki : Ke aua na toe tupu loa se fua iate koe ! Ti na malo loa le fiki i le temi fai lena. 20Ko le kau tisipulo, ala na tio ki le nea lena, na ofolele loa, o pati : Pe na feaki le liliu o le fiki leinei o malo i se ga temi toetoe fua ? 21Na tali loa Sesu kia latou : E kau pati maoki atu kia koutou, kapau e kotou maua le tui ti e leaise kotou toe lotolotolua fua, e leaise kotou fai fua le nea leinei kua fai ki le fiki nei, kae ka kotou pati loa ki le mauga leinei : Mavae i lena, o ano ki le tai, ti e soko loa le nea a ia. 22Ko nea fuli ala e kotou kole loa i le tui i le faikole, e kotou maua loa a ia.

Lotolotolua ki le pule a Sesu-Kilisito

23Na ano loa Sesu ki le fale tapu, i le lolotoga o lana akonaki, na au loa le kau pule faisakilifisio mo le kau fakamatuatua o le kakai, o pati kiate ia : Ko le pule fea leia e ke fai ai a nea ana, ti ko ai leia na soli atu ia kiate koe le pule lena ? 24Na tali loa Sesu kia latou : E kau fai foki kia koutou se vesili ; kapau e kotou tali mai a ia kiate au, ti e kau fakasa atu loa kia koutou pe ko le pule fea leia e kau fai ai a nea anei. 25Pe au meifea le papitema a Soane ? Mei lagi, pe mei tagata ? Kae na lotou manatu loa ia latou : Kapau e tou tali : Mei lagi, e pati mai loa a ia kia tatou : Kolea loa na leaise kotou tui ai kiate ia ? 26Ti kapau e tou tali : Mei tagata, e tonu ke tou i loa ki le kakai, talie e lotou taofi fuli ko Soane ko se polofeta. 27Koia na lotou tali ai loa kia Sesu : E leaise motou iloa. Ti na pati loa Sesu kia latou : Mo au foki, e leaise kau fakasa atu loa pe ko le pule fea leia e kau fai ai a nea anei.

Folafola o vosa e lua

28Kolea lakoutou manatu ? Na maua e se tagata ni vosa e toka lua ; ti na masau loa a ia ki le uluaki, o pati : Ei loku fanau, ano o gaoi i le aso nei i laku vite. 29Na tali loa a ia : E leaise kau loto ki ai. Ti oki, na fakasemala loa a ia, ti na ano loa a ia ki ai. 30Ti na masau loa a ia ki leia ake, o toe pati fenaaki. Ti na tali loa le vosa lena : E kau loto malie ai, aliki. Ti na leaise ano a ia. 31Ko ai ia laua na fai ia le finegalo o le tamana ? Na lotou tali loa : Ko le uluaki. Ti na pati loa Sesu kia latou : E kau pati maoki atu kia koutou, e muamua loa le kau popelikano mo fafine faiaga ki le puleaga o le Atua ia koutou. 32Talie na au Soane kia koutou i le ala o le faitotonu, ti na leaise kotou tui kiate ia. Kae na tui kiate ia le kau popelikano mo fafine faiaga ; ti ko koutou, ala na tio ki le nea lena, na leaise kotou fakasemala o tui kiate ia.

Folafola o tagata faivite

33Kotou fakalogo mai ki se tasi folafola fakatata. Na i ai se tagata, ko se pule kaiga, leia na to ia loa se vite. Na a takatakai loa e ia le vite, ti na kenu loa e ia se nea tatau vite, ti na fakatuu loa e ia se tule ; ti oki, ti na lue loa e ia lana vite ki ni tagata faivite, ti na mavae loa a ia i le fenua. 34I le temi o le fuata, na kakau loa e ia ana tagata fakasausau ke ano ki le kau tagata faivite, o afa le fua o lana vite. 35Kae na too loa e le kau tagata faivite a tagata fakasausau, ti na lotou sasa loa le tasi, ti tukipooi le lua, ti tuki fatui le tolu. 36Na toe kakau loa e ia ni iki ake tagata fakasausau, o toka api ake ia latou ala na mua ; ti na toe fai fenaaki latou e le kau tagata faivite. 37I le fakaoki, na kakau loa e ia kia latou lona vosa, o pati feneeki : E lotou fakaapaapa loa ki loku vosa. 38Kae i le tio a le kau tagata faivite ki le vosa, na lotou pati loa : Ko leinei le vosa leia e tonu ke maua ia le tofiga ; kotou au, tou tamate a ia, kae tou maua loa lona tofiga. 39Ti na lotou too loa a ia, o ti kese mei le vite, ti na lotou tamate loa a ia. 40I le lakaga nei, ka au loa le pule o le vite, kolea loa ka fai e ia ki tagata faivite ana ? 41Na lotou tali loa kia Sesu : E tamate fakaveliveli loa e ia a tagata itaita ana, kae toe lue loa e ia le vite ki ni iki ake tagata faivite, ala e soli ia loa kiate ia le fua o le vite i le temi o le fuata.

42Na pati loa Sesu kia latou : Pe na leaise kotou lau i le Tosi :

Ko le fa fatu leia na tiaki e le kau tufuga

Kua liliu ko le fatu tafito o le agele ;

Ko le nea lena e au mei le Aliki,

Ti ko se nea fakaofolele ki otatou mata ?

43Koia, e kau pati atu kia koutou, e too loa le puleaga o le Atua meia koutou, o tuku ki se puleaga leia e fakatupu ia loa ni fua. 44Ko leia e vilo loa ki le fa fatu lena e fatifati loa i ai, ti ko leia e vilo loa ki ai le fa fatu lena e lailai loa.

45I le oki o lalatou fakalogo ki folafola fakatata ana, na matala loa le kau pule faisakilifisio mo le kau faliseo na masau Sesu kia latou, 46ti na lotou faiga loa ke too a ia ; kae na lotou tuania ia le kakai, talie na taofi a ia kiate ia ko se polofeta.

Currently Selected:

Mateo 21: FB2000

Highlight

Copy

Compare