Luka 4

Fakasala o Sesu i le toafa

1Na toe liliu loa Sesu mei le Solotane, kua apele i le Laumalie Maokioki, ti na taki loa a ia e le Laumalie Maokioki ki le toafa. 2Ti na fakasalai loa a ia e le Tiapolo i aso e kau fa. Na leaise kai loa e ia se nea i aso ana ; ti na sili loa a aso ana, na fia kai loa a ia. 3Na pati loa le Tiapolo kiate ia : Kapau ko le Alo a koe o le Atua, fakatotonu ki le fa fatu lena ke liliu a ia ko se pane. 4Ti na tali loa Sesu kiate ia : E tuu i le tosi : E leaise mauli loa le tagata ki le pane fuai.

5Na taki loa a ia e le Tiapolo ki se mauga taualuga, o fakatio katoa a ia ki puleaga fuli o le kele, 6ti na pati loa a ia kiate ia : E kau soli loa kiate koe le mafimafi katoa lena, ti mo le kololia o puleaga ana, talie kua soli mai a ia kiate au, ti e kau soli a ia ki leia e kau loto ki ai. 7Koia kapau e ke atolasio ai kiate au, a au katoa loa a ia. 8Na tali loa Sesu kiate ia : E tuu i le tosi : E ke atolasio loa ki le Aliki, lou Atua, ti e ke tausi loa kiate ia toka tasi.

9Na toe ave loa a ia e le Tiapolo ki Selusalemi, o fakatuu i aluga o le fale tapu, ti na pati loa a ia kiate ia : Kapau ko le Alo a koe o le Atua, sopo a koe i leinei ki lalo, talie e tuu i le tosi :

10 E tuku loa e ia ni fakatotonu ki lana kau aselo o uiga mo koe,

O tupu ke lotou taupau a koe ;

11ti :

E lotou amo loa a koe i olatou lima,

Ke aua na tegea lou vae i se fatu.

12Na tali loa Sesu kiate ia : Kua fakasa : Aua na ke asiasii loa le Aliki, lou Atua.

13I le oki o lona fakasalai ki fakasala fuli ana, na fakamamao loa le Tiapolo iate ia o talitali ki se tasi ake faigamalie.

Kamata o le gaoi a Sesu i Kalilea

14Na toe liliu loa Sesu ki Kalilea, kua kofu a ia ki le makeke o le Laumalie Maokioki, ti na mafola loa lona logologona i le fenua katoa. 15Na akonaki a ia i sinakoka, ti na fakakololia kiate ia le kakai katoa.

Sesu i le sinakoka o Nasaleti

16Na ano loa Sesu ki Nasaleti, leia na lasi ake ai a ia ; ti na ulu loa a ia ki le sinakoka i le aso o le sapato, ofaipe lana fai masani. Na tuu loa a ia ki aluga ke lautosi, 17ti na avake loa kiate ia le tosi a le polofeta ko Isaia. I lana folasi le tosi, na maua loa e ia le ganea leia e tosi ai :

18E iate au le Laumalie o le Aliki, Talie kua fakanofo e ia au ke fakasa ia le logo malie ki le kau mativa ;

Na kakau mai e ia au ke fakamauli latou ala kua loto fatifatii,

19 Ke fakasa le saofaki ki le kau popula,

Ti mo le mavaa o mata ki le kau kivi,

Ke kakau ke ano i le lauatea latou na taomia,

Ke fakasa se fetuu o le kalasia o le Aliki.

20Ti na toe tapono loa e ia le tosi, o fakatoo ki le tagata fakasausau, kae nofo loa a ia ki lalo. Ko latou fuli ala na nonofo i le sinakoka, na tio fakamaumau kiate ia.

21Ti Na kamata fakasa loa e ia kia latou : I le aso nei kua fakamaoki le folafola leinei o le Tosi, leia kua kotou logo ki ai. 22Ti na fakamaoki le kakai fuli kiate ia ; na lotou punamauli i folafola malilie ala na mavae mei lona gutu, ti na lotou pati : Pe leaise ko le vosa a ia o Sosefo ? 23Na pati loa Sesu kia latou : E lagi kotou fai mai loa kiate au le taagapati leinei : Toketa, fakamauli mua e koe a koe totonu ; ti e kotou pati mai loa kiate au : Fai i leinei, i lou kolo totonu, a nea fuli ala na motou logo na ke fai i Kafanaume. 24Kae na toe pati loa a ia : E kau fakasa maoki atu kia koutou, e leaise tali malie se polofeta i lona fenua. 25E kau fakasa maoki atu kia koutou, na toka api a fafine lokonui i Iselaele i le temi o Elia, i le lakaga leia na mapono ai le lagi i fetuu e tolu mo masina e ono ti na to ai se oge lasi i le fenua katoa ; 26kae na leaise kakau Elia ke ano ki se tasi o latou, kae na kakau a ia ke ano ki se fafine lokonui i Salepeta, i le fenua o Sitone. 27Na toka api foki le kau kilia i Iselaele i le temi o le polofeta ko Eliseo ; kae na leaise fakamauli fua se toka tasi o latou i lona kilia, kae ko Naamane toka tasi, le tagata Silia.

28Na lotou itaita fuli loa i le sinakoka, i lalatou logo ki nea ana. 29Ti na lotou tutuu loa ki aluga, o kapu a ia mei le kolo, ti na lotou taki loa a ia o kaku ki le tumutumu o le mauga leia na fakatuu ai lolatou kolo, o tupu ke tulei a ia ki le vanu. 30Kae na ano loa Sesu i lotomalie o latou, o puli loa.

Kapu e Sesu o temonio i Kafanaume

31Na ifo loa a ia ki Kafanaume, ko le kolo o Kalilea ; ti na akonaki loa a ia i le aso o le sapato. 32Na lotou punamauli ai i lana akonaki, talie na masau a ia i se makeke.

33Na nofo loa i le sinakoka se tagata leia na nofo ai se laumalie veli o le temonio, ti na kalaga loa a ia o leo lasi : 34Oi ! Kolea e ke loto kia matou, Sesu mei Nasaleti ? Na ke au ke maumaui matou ? E kau iloa pe ko ai a koe : Ko le Sagato o le Atua. 35Na valoki loa e Sesu le laumalie veli, o pati kiate ia : Fakaleemu, ti ke mavae i le tagata lena. Na ti loa e le temonio le tagata ki loto malie o le fakatasi, ti na masau loa a ia meiate ia, kae na leaise fai loa e ia se nea veli ki le tagata. 36Na lotou i fuli loa, o lotou fepatiaki : Kolea le folafola leinei ? E lagiaki foki a ia i le pule mo le makeke ki laumalie veli, ti e lotou mavae ! 37Ti na mafola loa lona logologona i le fenua katoa.

Fakamauli o le tinana o le avaga o Petelo

38I le mavae a Sesu mei le sinakoka, na ano loa a ia ki le fale o Simone. Na fiva lasi le tinana o le avaga o Simone, ti na lotou kole loa kia Sesu o uiga mo ia. 39Na punou loa Sesu ki le fafine, o feau le fiva, ti na mavae loa le fiva iate ia. I le temi fai lena, na tuu loa le fafine ki aluga, o fakasausau kia latou.

Ni iki fakamauli o masaki

40I le galo o le laa, ko latou fuli ala na maua ia ni masaki i masaki kesekese, na taki mai loa latou kia Sesu. Na teki loa e Sesu ona lima kia latou taki toka tasi, ti na fakamauli loa e ia latou. 41Na mavae foki ni temonio mei ni kakai toka api, o taukalaga mo pati : Ko Alo a koe o le Atua. Kae na valoki latou e Sesu ti na leaise fakataga e ia ke lotou masau, talie na lotou iloa ko le Kilisito a ia.

42I le mafoa mai o le ao, na mavae loa Sesu o ano ki se ganea lavaki. Na afa loa a ia e se kakai toka api, ti i lalatou kaku kiate ia, na lotou fia taofi loa a ia ke aua na toe mavae ia latou. 43Kae na pati loa Sesu kia latou : E tonu foki ke kau fakasa ki la ake a kolo le logo malie o le Puleaga o le Atua ; talie koia leia na kau kakau mai ai. 44Ti na akonaki a ia i sinakoka o Kalilea.

Currently Selected:

Luka 4: FB2000

Highlight

Copy

Compare