Luka 3

Akonaki a Soane-Patita

1I le kau agafulu tupu lima fetuu o le pule o Tipele Sesale, - na kovana Posio Pilato i Sutea, ti na sau Elote i Kalilea, ti na sau lona taina ko Filipo i Itulea mo le telituale o Talakonita, ti na sau Lisaniasi i Apilene, 2ti na pule faisakilifisio Anasi mo Kaifa, - na fakasa loa le folafola a le Atua kia Soane, vosa o Sakalia i le toafa.

3Ti na ano loa a ia i le fenua katoa i le tafatafa o le Solotane, o akonaki ki le papitema o le fakasemala, o tupu ko le fakamolemole o agasala,

4o mulimuli ki le nea leia kua tosi i le folafola a le polofeta ko Isaia :

Ko le leo o leia e kalaga i le toafa :

Kotou teuteu le ala o le Aliki,

Kotou fakatokatoka ona anoaga.

5 Ke tanu a vaivailiua fuli,

Ke soloi ki lalo a mauga mo patu fuli ;

Ke fakasakosako a ala pikopiko,

Ti ke fakalautatau a ala patupatu.

6 Ti e tio loa a kanofi fuli ki le fakamauli o le Atua.

7Na pati loa Soane kia latou ala na au ke papitema e ia : Lanu o gata velo, ko ai na ako atu ia kia koutou ke kotou fesolaki mei le sausau ka au ? 8Kotou fakatupu mua ni fua ala e gali mo le fakasemala, kae aua na kotou pati i okoutou loto : E motou tamana kia Apalaamo ! Talie e kau fakasa kia koutou e mafai noa le fakatupu e le Atua mei fatu anei ni fanau kia Apalaamo. 9Kua tuu foki le toki i aka o laakau : Ko laakau fuli ala e leaise maua ia ni fua malilie, e tuuti loa o ti ki le afi.

10Na vesili le kakai kiate ia, o pati : Kolea loa le nea leia e tonu ke motou fai ? 11Na tali loa Soane kia latou : Ko leia e maua ia ni kofu e lua ke vaevae e ia mo leia e sala kofu, ti ko leia e maua ia se nea kai ke toe fai fenaaki.

12Na au foki ni popelikano ke papitema, ti na lotou pati loa kiate ia : Pule, kolea e tonu ke motou fai ? 13Na tali loa a ia kia latou : Ke aua na kotou siki a totogi kae kotou mulimuli ata ki le nea leia kua fakatotonu e le lao.

14Ti na vesili foki ni tagata solia kiate ia : Ti ko matou, kolea e tonu ke motou fai ? Na tali loa Soane kia latou : Ke aua na kotou kaia se paaga i le fakamakeke pe ko le kaka ki se tasi, kae ke kotou fiafia i lokoutou totogi.

15I le nofo talitali a le kakai, ti mo le fia iloa i olatou loto pe ko Soane ko le Kilisito, 16na pati loa Soane kia latou fuli : Ko au, e kau papitema koutou ki le vai ; kae e au loa leia e makeke ake iate au, ti e leaise kau gali ke kau tatala ia a sai o ona taka. Ko ia leia e papitema ia loa koutou ki le Laumalie Maokioki mo le afi.

17E too e ia i lona lima lana laakau sasa fulumeto ; e fakamea loa e ia lona sasaaga fulumeto, ti e tanaki loa e ia le fulumeto ki lona fale tanaki magiti, kae e tutu loa e ia a kaui fulumeto i se afi leia e leaise toe mate loa.

18Na fakasa fenaaki e Soane le logo malie ki le kakai, o toe tuku foki e ia kia latou ni iki folafola fakalotomakeke o lasi ai. 19Kae na valoki e Soane le sau ko Elote, o tupu ko Elotiasi, avaga o lona taina totonu ko Filipo, ti mo nea veveli fuli ala na fai e ia. 20Ti na toe fakalasi foki e Elote ana agaveli fuli, o fakaulu Soane ki le pilisoni.

Papitema o Sesu

21I le oki o le papitema o le kakai katoa, na papitema foki Sesu ; ti i le lolotoga o lana faikole, na mavaa loa le lagi, 22ti na ifo loa le Laumalie Maokioki kiate ia o fakaata ki se lupe. Ti na fakasa loa e se leo mei le lagi, o pati : Ko koe ko loku Alo alofaina, ti ko koe leia kua kau tuku ki ai loku alofa katoa.

Sakoga o Sesu-Kilisito

23Na fetuu kau tolu Sesu i lana kamata fai lana gaoi, kae na pati ko le vosa a ia o Sosefo, vosa o Eli, 24vosa o Matate, vosa o Levi, vosa o Melesi, vosa o Sanai, vosa o Sosefo, 25vosa o Matatiasi, vosa o Amosi, vosa o Naume, vosa o Esili, vosa o Nakai, 26vosa o Maati, vosa o Matatiasi, vosa o Semei, vosa o Soseke, vosa o Sota, 27vosa o Soanane, vosa o Lesa, vosa o Solopapele, vosa o Salatiele, vosa o Neli, 28vosa o Melesi, vosa o Ati, vosa o Kosame, vosa o Elimatame, vosa o Ele, 29vosa o Sesu, vosa o Eliesele, vosa o Solime, vosa o Matate, vosa o Levi, 30vosa o Simeone, vosa o Suta, vosa o Sosefo, vosa o Soname, vosa o Eliakimi, 31vosa o Melea, vosa o Mena, vosa o Matata, vosa o Natane, vosa o Tavite, 32vosa o Isaia, vosa o Opeto, vosa o Poose, vosa o Salomone, vosa o Naasone, 33vosa o Aminatape, vosa o Atemini, vosa o Alini, vosa o Eselome, vosa o Pelesi, vosa o Suta, 34vosa o Sakopo, vosa o Isaake, vosa o Apalaamo, vosa o Telake, vosa o Nakole, 35vosa o Seluke, vosa o Lakau, vosa o Faleke, vosa o Epele, vosa o Sala, 36vosa o Kainame, vosa o Alepakesate, vosa o Seme, vosa o Noe, vosa o Lameke, 37vosa o Matusala, vosa o Enoke, vosa o Saleti, vosa o Maleleele, vosa o Kainane, 38vosa o Enosi, vosa o Seti, vosa o Atama, vosa o le Atua.

Currently Selected:

Luka 3: FB2000

Highlight

Copy

Compare