Levitiko 5
5
Sakilifisio o le fakamolemole
1E soko loa i se aso, e logo loa se tagata ki le afa o latou ala na tio mata ki se nea leia na soko ; ti kapau e leaise ano loa a ia o fakasa le nea leia na tio a ia ki ai pe na logo a ia ki ai, e agasala loa le tagata lena, ti e amo loa e ia lona veli. 2Kapau e lave loa se tagata ki se nea kelekele, pe ko se manu mate, ofaipe se manu vao, pe se manu lalata, pe se manu totolo, e liliu loa le tagata lena o kelekele ti e agasala loa a ia. 3Kapau na lave se tagata ki se tasi leia e nofo mo se masaki kelekele leia e kava, kae na leaise iloa e ia i le temi lena ; ti kapau e iloa loa e ia a ia ki muli mai, e agasala loa a ia i le nea lena. 4Kapau na leaise fakakaukau se tagata, o fai e ia se fakapapau pe malie pe veli ki se tasi tagata, ti kapau e malama loa a ia ki muli mai ki le nea a ia, ti e visia loa a ia i ai.
5Ko le tagata leia kua visia i se agasala i agasala ana, e tonu ke kofesio loa e ia le nea lena na tupu ai lana agasala, 6Ti e momoli loa e ia ki le Eteleno, o uiga mo lana agasala, se manu ikiiki fafine, se ovi fafine pe ko se koti fafine, ke fai ai se sakilifisio ki le agasala. Ti e fai loa e le tagata faisakilifisio kiate ia le fakamolemole o lana agasala.
7Ti kapau e leaise maua loa e le tagata se nea leia ke totogi ai se manu ikiiki, pe ko se ovi fafine pe ko se koti fafine, ti e momoli loa e ia ki le Eteleno ki le agasala leia kua visia ai a ia ni kulukulu e lua pe ko ni lupe muli e lua ; e momoli loa e ia se tasi a manu ki le agasala, ti ko le tasi a manu ki le failaulau. 8E ave loa e ia a manu ki le tagata faisakilifisio, leia e uluaki momoli ia loa le sakilifisio ki le agasala ; e fatii loa e ia le ua o le manu ki lona matininia, kae e leaise motusi oki loa e ia le fa ulu o le manu. 9Ti e afusi loa e le tagata faisakilifisio ki le aletale le toto o le vikitima leia na momoli ki le agasala, ti e liligi loa e ia le toe o le toto ki le vae o le aletale ; ko se sakilifisio a ia ki le agasala. 10E fai loa e ia ki leia ake a manu se failaulau, o mulimuli ki le lekula o failaulau. Ko lena le nea leia e tonu ke fai e le tagata faisakilifisio ki le tagata lena ke fakamolemole ai lana agasala leia na fai, ti e fakamolemole loa a ia kiate ia.
11Ti kapau e leaise maua loa e ia se nea leia ke totogi ai ni kulukulu e lua pe ko ni lupe muli e lua, e momoli loa e ia ki lana agasala ni kilo falina tea e fa ; kae e leaise liligi loa e ia se lolo i aluga, pe teki loa e ia i aluga se iseso, talie ko se sakilifisio a ia ki le agasala. 12E ave loa e ia le falina ki le tagata faisakilifisio leia e alii ia loa i ai ki lona alofilima se ga falina, leia e igoa ko le fakamanatu, ti e tutu loa e ia le nea lena i aluga o le aletale ofaipe la ake sakilifisio tutu ki le Eteleno. Ko se moliga a ia ki le fakamolemole o le agasala.
13Ko lena le nea leia e tonu ke fai e le tagata faisakilifisio ki le tagata lena o uiga mo le fakamolemole o lana agasala ki se nea i nea ana, ti e fakamolemole loa kiate ia. Ti e tuku loa le nea leia e toe ki le tagata faisakilifisio.
14Na masau loa le Eteleno kia Moisese, o pati :
15Kapau e fai loa e se tagata, i lona loto noa, se sala ki moliga ala kua fakatapu ki le Eteleno, e tonu ke fai loa e ia le nea leinei : E momoli loa e ia ki le Eteleno, ki le totogi o lana agasala, se ovi tagata lee mele, leia kua totogi ki se paaga, o mulimuli ki le totogi leia e fakaaoga i le sagatualio ; e fakaaoga loa le manu lena ki le sakilifisio o le faisala. 16E tonu foki ke toe totogi e le tagata lena le puli o le sagatualio, o toe tuku e ia ki le totogi lena le vaega lima o le totogi, ti e tuku loa e ia a nea fuli ana ki le tagata faisakilifisio. Ti e momoli loa e le tagata faisakilifisio kiate ia le ovi tagata leia ke fai ai le sakilifisio o le fakamolemole o lana agasala, ti e fakamolemole loa kiate ia.
17Kapau e fai loa e se tagata, i lona loto noa, se nea leia na tapui e se folafola a le Eteleno, ti e agasala loa a ia, o visia i lana agasala. 18E tonu ke ave loa e ia ki le tagata faisakilifisio se ovi tagata lee mele, leia na totogi ki le paaga leia kua fakatuutuu ki le sakilifisio o le totogi ; Ti e fai loa e le tagata faisakilifisio kiate ia le fakamolemole o lana agasala leia na fai kae na leaise iloa e ia, ti e fakamolemole loa a ia kiate ia. 19Ko se sakilifisio a ia o le faisala talie na sala maoki le tagata lena ki le Eteleno.
20Na masau loa le Eteleno kia Moisese, o pati :
21Kapau e fai loa e se tagata se agaveli ki le Eteleno, o loi ki lona oloi o uiga mo se nea leia na tuku ake kiate ia, pe na kole fakatemi e ia, pe na kaia e ia, pe na fufu e ia, 22Ti na loi loa a ia na leaise maua e ia se nea, pe na fakapapau loi a ia ke fufu ai lana agaveli leia na fai i agaveli fuli ana ; 23E agasala loa le tagata lena na fai ia se agaveli fenaaki ; e tonu loa ke liufaki e ia le nea leia na kaia e ia, pe na fufu e ia, pe na maua e ia, pe na taofi e ia, 24pe ko le nea leia na tupu ai lana fakapapau loi. E leaise gato fua i lana liufaki katoa le nea, kae e tonu foki ke toe teki e ia ki ai le vaega lima o le totogi o le nea lena ; e tuku loa e ia a nea ana ki le tagata leia a ana le nea lena i le temi fai leia e fakamaoki ai a ia ki lana agasala. 25Ti e ave loa e ia ki le tagata faisakilifisio se ovi tagata lee mele, leia na totogi ki le totogi masani o le sagatualio, ke fai ai se sakilifisio ki le Eteleno o uiga mo le fakamolemole o lana agasala. 26Ti e fai loa e le tagata faisakilifisio kiate ia le sakilifisio o le fakamolemole o le agasala i mua o le Eteleno, ti e fakamolemole loa a ia kiate ia e le Eteleno.
Currently Selected:
Levitiko 5: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
