Levitiko 27
27
Fakapapau mo vaega kau agafulu
1Na masau loa le Eteleno kia Moisese, o pati : 2Masau ki fanau a Iselaele, o ke pati loa kia latou : Ka fai loa e se tagata se fakapapau mamafa ke momoli se tasi ki le Eteleno, e fakasoko loa e ia lana fakapapau, o soli loa e ia le totogi o le tagata lena, o mulimuli ki le lekula leinei : 3Kapau ko se tasi e fetuu kau lua o kaku ki le fetuu kau ono : ko lona totogi ko fa sikele paaga e kau lima, i le paaga o le sagatualio, ki se tagata, 4ti kapau ko se fafine e ke fuafua loa ko fa sikele paaga e kau tolu. 5Kapau ko se tasi e fetuu lima o kaku ki le fetuu kau lua : ko fa sikele paaga e kau lua ki le tama, ti ko fa sikele paaga e kau agafulu ki le taine. 6Kapau ko se tasi e masina tasi ki le fetuu lima : ko fa sikele paaga e lima ki le toe tagata, ti ko fa sikele paaga e tolu ki le toe fafine. 7Kapau ko se tasi e fetuu kau ono o fai ki aluga : ko fa sikele paaga e kau agafulu tupu lima ki se tagata, ti ko fa sikele paaga e kau agafulu ki se fafine. 8Ti kapau e mativa veli se tasi ke totogi ai le paaga totonu, e ave loa e ia leia e tonu ke totogi ki mua o le tagata faisakilifisio ; ti e fakafuafua loa e le tagata faisakilifisio le lasi o le totogi o mulimuli ki le nea leia e maua e le tagata lena na fai ia le fakapapau.
9Ti kapau na fai le fakapapau o uiga mo se manu i manu ala e aoga ki sakilifisio ki le Eteleno, e liliu loa le manu lena o tapu : 10E leaise feala loa ke toe fetogi a ia ki se tasi ake a manu, pe malie ake pe veli ake. Ti kapau e fetogi loa le manu lena ki se tasi ake a manu, e tapu loa a manu ana e lua. 11Ti kapau na fai le fakapapau o uiga mo se manu kelekele, i manu ala e leaise feala ke momoli ki le Eteleno i se sakilifisio, e ave loa e le tagata lena le manu ki le tagata faisakilifisio : 12Ti e tuku loa e le tagata faisakilifisio le totogi o le manu, o fakafuafua ki lona malie mo lona veli ; ti e tonu loa ke fai ki le totogi lena.
13Ti kapau e loto loa le tagata lena ke toe totogi e ia lana manu, e totogi loa e ia se tupu, ko le vaega lima o le totogi o le manu.
14Ti kapau e fakatapui loa e se tagata lona fale ki le Eteleno, e fakasa loa e le tagata faisakilifisio le totogi o mulimuli ki le malie mo le veli o le fale ; e fai loa ki le totogi lena. 15Ti kapau e loto loa le tagata ke toe totogi e ia lona fale, e totogi loa e ia mo se tupu ko le vaega lima o le totogi lena kua fakasa e le tagata faisakilifisio, ti e toe maua loa e ia lona fale.
16Ti kapau e fakatapui loa e se tagata lana faisaga ki le Eteleno, e fakafuafua loa lona totogi ki le lasi o le pulapula leia e to i ai : ko fa sikele paaga e kau lima ki kilo fulumeto e kau lelau tolu. 17Ti kapau e fakatapui loa le faisaga i le fetuu totonu o le supileo, e katoa loa le totogi. 18Ti kapau na fakatapui le faisaga i le oki o le fetuu o le supileo, e fuafua loa e le tagata faisakilifisio se totogi maamaa o mulimuli ki le lasi o fetuu ala koi toe ki le supileo foou. 19Ti kapau e loto loa le tagata a ana le faisaga ke toe totogi e ia lana faisaga, e totogi loa e ia se tupu ko le vaega lima o le totogi leia kua fakasa e le tagata faisakilifisio. 20Ti kapau e leaise toe totogi loa e ia lana faisaga, kae fakatau loa e ia a ia ki se tasi, e leaise mafai loa ke toe totogi e ia lana faisaga : 21I le fetuu o le supileo e maua loa le faisaga lena e le Eteleno, ti e tuku loa a ia ki le kau tagata faisakilifisio, ofaipe se faisaga leia kua fakatapui ki le Eteleno o lee gato.
22Ti kapau e fakatapui loa e se tasi ki le Eteleno se faisaga leia kua totogi e ia kae na leaise kau ki lona tofiga, 23e fakasa loa e le tagata faisakilifisio lona totogi o mulimuli ki le lasi o fetuu ala koi toe ki le supileo foou, ti e soli loa e le tagata lena le totogi i le aso fai lena. E fakatapui loa le paaga ki le Eteleno 24Kae i le fetuu o le supileo, e toe liliu loa le faisaga ki le tagata uluaki, ki leia na maua tofiga ia a ia.
25E fai loa a totogi fuli ki le paaga o le sagatualio, leia ko kalami e kau agafulu le fa sikele paaga e tasi.
Nea e tolu a le Eteleno : Manu uluaki tupu
26E leaise taga loa ke fakatapui e se tagata ki le Eteleno se manu uluaki o lona kau manu, talie e maua a manu uluaki fuli e le Eteleno : le pipi, mo le akeno, mo le koti. 27Ti kapau ko se uluaki o se manu kelekele, e toe totogi loa a ia o mulimuli ki lau fakafuafua, o fakalasi ki se tupu ko le vaega lima o le totogi leia kua fakasa. Ti kapau e leaise toe totogi loa a ia, e fakatau loa a ia o mulimuli ki lau fakafuafua.
Nea kua fakatapu
28Ko nea fuli ala e fakatapui loa o tukupau e se tagata ki le Eteleno i ana nea fuli, e leaise toe feala loa ke toe fakatau a ia, pe ke toe totogi a ia, tatau fai pe ko se tagata, pe ko se manu, pe ko se faisaga ; ko nea fuli ala e fakatapui loa o tukupau ki le Eteleno e tuku loa ki le Eteleno o lee gato. 29E leaise feala loa ke toe totogi leia kua fakatapui ki le Eteleno o lee gato, e tamate loa a ia.
Vaega kau agafulu
30E maua e le Eteleno a vaega kau agafulu fuli o magiti o le kele ti mo fua o laakau ; ko se nea a ia kua fakatapui ki le Eteleno. 31Kapau e loto se tagata ke toe totogi e ia se koga o lona vaega kau agafulu, e fakalasi loa e ia a ia ki se vaega lima. 32I pipi, mo ovi, mo koti, e fakamailoga loa le manu e tasi i manu e kau agafulu ke fakatapui a ia ki le Eteleno. 33E leaise tioi loa pe malie pe veli le manu lena, ti e leaise fai loa se fetogi manu ; ti kapau e fetogi loa se manu ki se tasi ake a manu, e tuku loa a manu ana e lua ki le Eteleno, ti e leaise feala loa ke toe totogi laua.
34Ko na a lao ala na fakasa e le Eteleno kia Moisese ki fanau a Iselaele, i aluga o le mauga o Sinai.
Currently Selected:
Levitiko 27: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
