Ekesote 9

Mamate o kau manu

1Na pati loa le Eteleno kia Moisese : Ano kia Falaone, ti ke pati loa kiate ia : Ko leinei le folafola a le Eteleno, le Atua o le kau Epeleo : tuku loku kakai ke ano, ke lotou tausi kiate au. 2Kapau e leaise ke tuku loa le kakai ke ano, ti kapau e ke toe taofi loa a ia, 3e to loa le lima o le Eteleno ki au kau manu ala e nonofo i faisaga, ki osi, mo asino, mo kamelo, mo pipi, ti mo ovi ; e lasi loa le mamate. 4E vaei kese loa e le Eteleno a kau manu a Iselaele mei kau manu a le kau Esipito, ti e leaise mate loa se manu fua e tasi i manu fuli a fanau a Iselaele. 5Na fakatotonu loa e le Eteleno le aso, o pati : I apogipogi, e fakasoko loa e le Eteleno le nea lena i le fenua. 6Ti na fai loa e le Eteleno le nea lena i leia ake a aso. Na mamate loa a kau manu fuli a le kau Esipito, kae na leaise mate fua se manu e tasi i kau manu a fanau a Iselaele. 7Na afaafa loa e Falaone le nea leia na soko ; ti ko leinei na leaise mate fua se manu e tasi i kau manu a Iselaele. Kae na fakafefeka loa e Falaone lona loto, ti na leaise tuku loa e ia le kakai ke ano.

Papala i tagata mo manu

8Na pati loa le Eteleno kia Moisese mo Alone : Kolua fakaapele okoulua lima ki le mugalafu o le gutuumu, ti ke laku loa e Moisese le mugalafu lena ki le lagi, i mua o Falaone. 9E liliu loa le mugalafu lena ko se efu leia e kofu ia loa le fenua katoa o Esipito ; ti e fakatupu loa e le efu lena ni fakafufula mo ni papala i tagata mo manu o le fenua katoa o Esipito. 10Na too loa e Moisese mo Alone se mugalafu o se gutuumu, ti na la ano loa ki mua o Falaone. Na laku loa e Moisese le mugalafu ki le lagi, ti na mafuta loa i tagata mo manu ni fakafufula mo ni papala. 11Na leaise feala loa ke sa a tagata fai nea fakatalatupua i mua o Moisese, o tupu ko papala, talie na kaku foki a papala ki tagata fai nea fakatalatupua ofaipe le kau Esipito katoa. 12Na fakafefeka loa e le Eteleno le loto o Falaone, ti na leaise fakalogo loa Falaone kia Moisese mo Alone, o mulimuli ki le nea leia na fakasa e le Eteleno kia Moisese.

Ua fatu mo le afi

13Na pati loa le Eteleno kia Moisese : Tuu koi usu, ti ke ano ki mua o Falaone. E ke pati loa kiate ia : Ko leinei le folafola a le Eteleno, ko le Atua o le kau Epeleo : tuku loku kakai ke ano, o tupu ke tausi a ia kiate au. 14Talie, i le faiaga loa leinei, e kau tuku fuli loa aku tautea ki lou loto, ki au tagata fakasausau, ti mo lou kakai, o tupu ke ke iloa e leaise tatau se tasi mo au i le malama nei katoa. 15Kanapau na kau folasi loku lima, o kau tautea a koe ki le mate, a koe mo lou kakai, kua ke puli nei i aluga o le malama nei. 16Kae na kau fakamauli a koe, o tupu ke fakasa iate koe loku makeke, ti ke fakamafola loku suafa i le malama nei katoa. 17Kapau e ke toe fia malaga ki loku kakai, ti kapau e leaise ke tuku a ia ke ano, 18e kau fakato loa apogipogi, i le ola leinei, se ua fatu leia e kese oki ake lona makeke, ti e leikiaise maua sona tatau i Esipito nei, talu mei le fakatuu o Esipito o kaku mai ki le aso nei. 19Koia ke ke tanaki ai ki se ganea malumalu au kau manu mo au nea fuli ala e maua i faisaga. E to loa le ua fatu ki tagata fuli mo manu fuli ala e maua i faisaga ti na leaise fakaulu ki fale, ti e lotou mamate loa. 20Ko latou ala i tagata fakasausau a Falaone na i loa ki le folafola a le Eteleno, na fakaulu ia loa ki olatou fale alatou tagata fakasausau mo alatou kau manu. 21Kae ko latou ala na leaise too fakamalotoloto ia le folafola a le Eteleno, na tuku ia loa alatou tagata fakasausau mo alatou kau manu i faisaga.

22Na pati loa le Eteleno kia Moisese : Siki lou lima ki le lagi, ti ke to se ua fatu i le fenua katoa o Esipito ki tagata, mo manu, ti mo mutie fuli o faisaga, i le fenua o Esipito. 23Na siki loa e Moisese lona tokotoko ki le lagi, ti na tuku loa e le Eteleno ni mana mo se ua fatu ; ti na taka loa le afi i aluga o le fenua. Na fakato loa e le Eteleno se ua fatu ki le fenua o Esipito. 24Na to loa se ua fatu, ti na filo loa le afi mo le ua fatu ; na kese ai le makeke o le ua fatu lena, na leikiai sona fakatatau i le fenua katoa o Esipito, talu mei lona tuu ko se puleaga. 25Na to loa le ua fatu i le fenua katoa o Esipito, ki nea fuli ala na maua i faisaga, ki tagata o kaku ki manu. Na maumaui loa e le ua a mutie fuli o faisaga, ti na fatifatii loa e ia a laakau fuli o faisaga. 26Na gato fai ki le fenua o Koseni, leia na nofo ai fanau a Iselaele, na leaise to ai loa se ua fatu.

27Na kalagai loa e Falaone a Moisese mo Alone, o pati kia laua : I le faiaga loa leinei, kua kau agasala ; E maokioki le Eteleno, kae kua motou agasala, au mo loku kakai. 28Kolua kole ki le Eteleno ke taofi le mana mo le ua fatu ; ti e kau tuku loa koutou ke ano, talie e leaise kau toe taofi loa koutou. 29Na pati loa Moisese kiate ia : Ka kau mavae loa i le kolo, e kau siki loa oku lima ki le Eteleno, ti e tuku loa a mana, ti e leaise toe to loa se ua fatu, o tupu ke ke iloa e fakalogo le malama nei ki le Eteleno. 30Kae e kau iloa ko koe mo au tagata fakasausau, e leaise kotou i loa ki le Eteleno Atua. 31Na maumau loa le lino mo le olese, talie kua kamata fua le olese, ti kua kamata se le lino. 32Kae na leaise maumau loa le fulumeto mo le epote talie na leikiaise la sosomo ake. 33Na mavae loa Moisese mei le fale o Falaone, o ulu mei le kolo ; ti na siki loa e ia ona lima ki le Eteleno, ti na gato loa le mana mo le ua fatu ; ti na leaise toe to loa le ua ki le kele. 34I le tio a Falaone kua gato le ua, mo le ua fatu, ti mo le mana, na toe soko atu loa e ia lana agasala, o toe fakafefeka lona loto, o ona mo ana tagata fakasausau. 35Na fakafefeka loa le loto o Falaone, ti na leaise tuku loa e ia fanau a Iselaele ke ano, o mulimuli ki le nea leia na fakasa e le Eteleno kia Moisese.

Currently Selected:

Ekesote 9: FB2000

Highlight

Compare

Copy