Ekesote 39
39
Le fai o kofu tapu o Alone
1Na fai loa ki ni kie usi, mo kula malie, mo kula fakapouli, ti mo tea, a kofu gaoi ki gaoi i le sagatualio, ti mo kofu tapu o Alone, o mulimuli ki le nea leia na fakatotonu e le Eteleno kia Moisese.
2Na fai loa le efote ki le aulo, mo le filo usi, mo kula malie, mo kula fakapouli, ti mo le filo tea makeke. 3Na tuki loa ni laui aulo ke maninifi, ti na koti loa i ai ni filo o lalaga fakatasi mo ni filo usi, mo ni filo kula malie, mo ni filo kula fakapouli, ti mo ni filo tea makeke. Na fai fakateuteu loa le gaoi lena. 4Na fai loa i ai ni tuauma e lua ala na fakapipiki ia a ia ; ti na fakatasi a ia i ona kapa e lua. 5Na fai le kilii pipi ofaipe le fai o le efote, ti na fakamau a ia ki ai ; na fai a ia ki le aulo mea, mo le filo usi, mo kula malie, mo kula fakapouli, ti mo le filo tea makeke, o mulimuli ki le nea leia na fakatotonu e le Eteleno kia Moisese. 6Na takatakai loa ki ni fakamau aulo ni fatu ko le onise, ala na togi ai loa a igoa o vosa o Iselaele, ofaipe le togi o mama fakamaoki.
7Na fakapikipiki loa latou ki tuauma fakateuteu o le efote, ke fakamanatu ai a vosa o Iselaele, o mulimuli ki le nea leia na fakatotonu e le Eteleno kia Moisese.
8Na fai loa le peketolale, o fakateuteu, ofaipe le gaoi o le efote, ki le aulo, mo le filo kula malie, mo kula fakapouli, ti mo le filo tea makeke. 9Na tapa fa tatau a ia, ti na fai a ia ke lolua ; ko lona loa ko le alofilima e tasi, ti ko lona laulasi ko le alofilima e tasi. Na lolua a ia. 10Na teuteui loa a ia ki ni atu fatu e fa : ko le uluaki atu ko le saletuane, mo le topasi, mo le emelote ; 11ko le lua o atu : ko le kelenate, mo le safile, mo le taimane ; 12ko le tolu o atu : ko le opale, mo le akate, mo le ametisite ; 13ko le fa o atu : ko le kilisolite, ko le onise, mo le sasepe. Na fakapikipiki a fatu ana ki olatou fakamau aulo. 14Na i ai ni fatu e kau agafulu tupu lua, o mulimuli ki igoa o vosa o Iselaele ; ti na togi latou ofaipe ni mama, ti na lotou tasi mo ia le igoa o famili e kau agafulu tupu lua o Iselaele. 15Na fai loa i le peketolale ni ga tini aulo mea, kua fili ofaipe ni ga maea. 16Na fai loa ni takafi aulo e lua mo ni kavei aulo e lua, ti na fakapipiki loa a kavei e lua ki potupotu e lua o le peketolale. 17Ti na fakaulu loa ni tini aulo e lua i loto o kavei e lua ala i potupotu e lua o le peketolale ; 18ti na fakagato loa i mua a potupotu o tini e lua ki fakamau e lua ala i aluga o tuauma fakateuteu o le efote. 19Na toe fai loa ni kavei aulo e lua, o fakapikipiki ki potupotu e lua o le peketolale, i le tapa loto leia e pipiki ki le efote. 20Na toe fai foki ni iki kavei aulo e lua, o fakapipiki ki tapatapa lalo o tuauma fakateuteu e lua o le efote i mua, i tafa o le sokoga, i aluga o le kilii pipi o le efote.
21Na nonoa loa le peketolale i ona kavei ki kavei o le efote, ki se ga maea usi, o tupu ke nofo le peketolale i aluga o le kilii pipi o le efote, ti ke aua na mafai ke masau a ia mei le efote, o mulimuli ki le nea leia na fakatotonu e le Eteleno kia Moisese.
22Na fau loa le kofu loloa o le efote, leia na tui katoa loa ki le kie usi. 23Na i ai i loto malie o le kofu, se mavaa ki le ua o le kofu, ti na tui fakamakeke le mavaa lena i lona tafatafa katoa, talie ke aua na masae le kofu. 24Na tui loa ki tapatapa o le kofu ni fuai kelenati usi, mo kula malama, mo kula fakapouli, ti mo tea makeke. 25Na fai loa ki le aulo mea ni ga pele liliki, ti na fakapikipiki loa latou i vasa o fuai kelenati, i le takatakai katoa o le tapatapa o le kofu, i vasa o fuai kelenati :
26Ko le ga pele mo le fa kelenati, ti ga pele mo le fa kelenati, i le takatakai katoa o le tapatapa o le kofu, ki le fai o le gaoi, o mulimuli ki le nea leia na fakatotonu e le Eteleno kia Moisese.
27Na fai loa a kofu loloa ki le kie tea makeke, kia Alone mo ona vosa ; 28na fai loa le tiale ki le kie tea, ti na fai foki le puloga mo vavae ki le kie tea makeke ; 29na fai loa le kilii pipi ki le kie tea makeke o tui fakateuteu ki le filo usi, mo kula malie, mo kula fakapouli, o mulimuli ki le nea leia na fakatotonu e le Eteleno kia Moisese. 30Na fai loa le palaa ki le aulo mea, le palaa tapu, ti na tosi loa i ai ofaipe le fakateuteu o se mama : Maokioki ki le Eteleno.
31Na nonoa loa a ia ki se ga maea usi ki le tiale, i aluga, o mulimuli ki le nea leia na fakatotonu e le Eteleno kia Moisese.
32Ti na oki loa gaoi fuli o le tapenakulo, o le falela tapu. Na fai loa e fanau a Iselaele a nea fuli ala na fakatotonu e le Eteleno kia Moisese ; na lotou fai loa o fenaaki. 33Na aumai loa le tapenakulo kia Moisese : le falela mo nea fuli ala na kau ki ai : ona fakamau, mo ona papa, mo ona amo, mo ona pou, ti mo ona tuuaga ; 34mo le la kilii ovi kula, mo le la kilii kakaututuu, ti mo le lito leia e vaelua ia le potu tapu mo le potu taputapu ; 35mo le aleka o le fakapapau mo ona amo, ti mo le nofoaga o le manava alofa ; 36mo le laupapa, mo ona nea gaoi fuli, mo pane tapu ; 37mo le tuuaga malama aulo magamaga, mo ona malama, mo malama kua teuteui, mo ona nea gaoi fuli, mo le lolo ki le tuuaga malama ; 38mo le aletale aulo, mo le lolo tapu, mo le kaloni fakamanogi, ti mo le lito o le uluaga o le falela ; 39mo le aletale sila mo lona ukamea pupu, mo ona amo, ti mo ona nea gaoi fuli ; mo le tanoa mo lona tuuaga ; 40mo kie puipui o le malae, mo ona pou, mo ona tuuaga, mo le lito o le matapa o le lototoa, mo ona maea, mo ona pike, ti mo nea gaoi fuli ki le gaoi i le tapenakulo mo le falela tapu ;
41mo kofu gaoi ki le sagatualio, mo kofu tapu o le tagata faisakilifisio ko Alone, mo kofu o ona vosa ki le fai o le gaoi fakapelepitelo.
42Na fai loa e fanau a Iselaele a gaoi fuli ana, o mulimuli totonu ki fakatotonu fuli ala na tuku e le Eteleno kia Moisese. 43Na tioi loa e Moisese a gaoi fuli ; ti ko leinei, kua lotou fai a nea fuli o mulimuli totonu ki nea ala na fakatotonu e le Eteleno, na lotou fai fenaaki loa. Ti na tapuaki loa Moisese kia latou.
Currently Selected:
Ekesote 39: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
